XUSTIFICACIÓN

O Plan Dixital xurde como a resposta do ensino ao proceso de transformación dixital da sociedade actual. Este proceso abrangue unha serie de dimensións a ter en conta dende as nosas escolas: o desenvolvemento de competencias para unha cidadanía dixital, o acceso democrático á información e o coñecemento, a formación para o traballo e o emprego, a innovación das metodoloxías docentes, a creación de comunidades de aprendizaxe en rede e o desenvolvemento de competencias tecnolóxicas para a innovación.

A xustificación para a creación dos plans dixitais nos centros educativos emanan das directrices da Lei Orgánica 2/2006, do 3 de maio, de Educación que regula diferentes aspectos relacionados coa competencia dixital e a innovación educativa. Neste senso o artigo 121 establece que o Proxecto Educativo do centro recollerá, entre outros aspectos, a estratexia dixital do centro, de acordo co establecido no artigo 111 bis, no que se establece que as administracións educativas e os equipos directivos dos centros promoverán o uso das tecnoloxías da información e a comunicación (TICs) na aula como medio didáctico apropiado e valioso para levar a cabo as tarefas de ensino e aprendizaxe, utilizando os marcos de referencia da competencia dixital que orienten a formación inicial e permanente do profesorado e faciliten o desenvolvemento dunha cultura dixital nos centros e nas aulas. A competencia dos equipos directivos para o impulso destas iniciativas no marco do Proxecto Educativo queda establecida no artigo 132 da citada Lei.

No ámbito da nosa Comunidade, a Resolución do 17 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento das ensinanzas de educación infantil, educación primaria, educación secundaria obrigatoria e bacharelato no curso académico 2021/22 establece que os centros docentes elaborarán no curso 2021/22 o seu plan dixital de acordo coas instrucións que se diten. Estas instrucións serán implementadas na Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022. Adicionalmente, a ORDE do 26 de maio de 2023 pola que se desenvolve o Decreto 155/2022, do 15 de setembro, polo que se establecen a ordenación e o currículo da educación primaria na Comunidade Autónoma de Galicia e se regula a avaliación nesa etapa educativa establece a súa condición de plan educativo de centro e os seus contidos mínimos.

CONTEXTUALIZACIÓN E CONTRIBUCIÓN AO PROXECTO EDUCATIVO

O CEIP Castrelo de Miño atópase na localidade de Astariz, pertencente ao concello de Castrelo de Miño (Ourense). A principal característica do alumnado e as familias é a diversidade: existen diferencias socioeconómicas reflectidas no acceso á tecnoloxía e a competencia dixital, cunha parte significativa da comunidade escolar amosando carencias neste eido. Deste xeito o colexio é a principal ou única porta de acceso ao mundo dixital máis alá de opcións de ocio de escaso valor didáctico e/ou competencial.

O Claustro para o curso 2023-2024 contará cos 4 mestres definitivos e un mestre en expectativa de destino (audición e linguaxe), que asumirá a coordinación TIC e do Plan Dixital.

Este Plan Dixital de Centro enténdese como un instrumento que debe favorecer e impulsar o uso dos medios dixitais tanto nos procesos de ensinanza-aprendizaxe como no resto dos procesos de xestión do centro, sempre co obxectivo último de colaborar no desenvolvemento integral do alumnado. Por esa razón, será un instrumento que integraremos no Proxecto Educativo e na Programación Xeral Anual. Ademáis dotaremos ao Plan Dixital dun enfoque de centro sobre o uso dos recursos pedagóxicos dixitais dispoñibles para aproveitar ao máximo as súas posibilidades, de modo que se converta nun proxecto compartido por todos os membros da comunidade educativa que dea coherencia e guíe o uso das tecnoloxías.

PROCESO DE ACTUALIZACIÓN

No comezo do curso 2023/24 para o deseño e elaboración do Plan Dixital seguimos as seguintes pautas:

a) Avaliaremos a situación inicial deste curso, revisando o momento actual do noso SELFIE e da Competencia Dixital Docente (CDD) do claustro.

b) Revisaremos o noso informe sobre Debilidades, Ameazas, Fortalezas e Oportunidades (DAFO), realizando modificacións se fora preciso a partires da situación SELFIE e CDD analizada.

c) Realizaremos modificacións, adicións e eliminacións de obxectivos, accións e indicadores, de acordo coas valoracións xerais e as propostas de mellora recollidas no Plan Dixital 22/23, tendo en conta a situación de partida da revisión do DAFO.

d) Tras rematar a actualización do Plan Dixital, este será aprobado polo Consello Escolar, unha vez consultado o claustro.

Para avaliar o grao de consecución dos obxectivos propostos no noso Plan Dixital, é necesario valorar as accións asociadas a cada un deles. Nestas accións contaremos cuns indicadores específicos que nos permitirán estimar en términos claros e obxectivos o seu estado. Coa análise destes indicadores poderemos realizar unha avaliación efectiva do Plan dende dúas perspectivas ou contextos:

1. Unha avaliación procesual ou continua, cunha posta en común trimestral. Neste contexto teremos en conta os seguintes instrumentos e ferramentas:

a. Os indicadores específicos das accións deseñadas para cumprimentar cada obxectivo.

b. As experiencias diarias dos docentes implicados no desenvolvemento do Plan, necesarias para realizar axustes e/ou correccións e optimizar a súa aplicación.

2. A avaliación final, de carácter anual realizada ao remate do curso, e que formará parte da Memoria Anual do Centro. Neste momento teremos en conta os seguintes aspectos:

a. O grao de consecución dos obxectivos propostos, globalmente e en detalle a través das ferramentas descritas.

b. Análise actualizada dos avances do profesorado en materia dixital, de xeito subxectivo e en relación ás Acreditacións de Competencia Dixital Docente (CDD).

c. Posta en común das experiencias dos docentes implicados no desenvolvemento do Plan, co fin de obter unha visión global do mesmo e achegar propostas de mellora específicas máis alá dos marcadores obxectivos.

Valoración xeral

GRAO DE CONSECUCIÓN DOS OBXECTIVOS

1. Xestión Xeral do Plan Dixital. ACADADO

As accións de xestión do Plan Dixital desenvolvéronse axeitadamente e segundo as datas previstas. 

2. Potenciar a Competencia Dixital Docente. ACADADO

Os obxectivos propostos foron acadados a través das accións formativas deseñadas no marco do PFPP O2331072 'Optimización dos recursos dixitais do Polo Creativo para potenciar o ensino e a xestión'. O seu aproveitamento está reflectido nas Acreditacións da Competencia Dixital Docente do Claustro.

3. Aproveitamento da Aula Virtual do centro. PENDENTE

Este obxectivo non foi acadado e dende o centro valórase a súa supresión, pola moi escasa relevancia deste recurso na nosa práctica docente.

4. Promover o emprego funcional da ferramenta AbalarMóbil. PARCIALMENTE

Este obxectivo foi acadado parcialmente polo escaso impacto da ferramenta AbalarMóbil na nosa comunidade educativa, que segue a preferir, de maneira maioritaria, outras vías de comunicación co centro. 

5. Mellorar as habilidades dixitais do alumnado. ACADADO

Este obxectivo foi acadado de maneira destacada en todas as acción deseñadas para o seu desenvolvemento. O emprego dos paneis interactivos atópase completamente normalizado en todas as aulas, acadando o alumnado unha competencia significativa no seu manexo diario. As numerosas actividades realizadas no centro dedicadas á competencia dixital foron ben recibidas e aproveitadas polo alumnado, salientando as 3 sesións de Robótica e Programación impartidas pola academia Captioma de Ourense. Tamén valorouse positivamente a competencia dixital adquirida polo alumnado de 6º de primaria, co obxecto de favorecer o seu desenvolvemento curricular na Educación Secundaria Obrigatoria.

Propostas de mellora

1. Obxectivo O01PD: sistematizar prazos e procesos para axilizar aspectos organizativos, facilitando a incorporación dos novos docentes ás dinámicas de xestión.

2. Obxectivo O02PD: seguir promovendo o desenvolvemento profesional continuo dende a oferta formativa de FPROFE, os PFPP de competencia dixital docente e os Polos Creativos, tomando como marco as competencias recollidas nas Acreditacións.

3. Obxectivo O03PD: valorar a supresión deste obxectivo pola escasa utilidade práctica do seu desenvolvemento.

4. Obxectivo O04PD: seguir incidindo nos beneficios do emprego da ferramenta AbalarMóbil no contexto educativo.

5. Obxectivo O05PD: sistematizar as actividades favorecedoras da competencia dixital no alumnado de 3º ciclo para facilitar o seu desenvolvemento curricular na ESO.

O noso Plan Dixital 2.0 foi aprobado o 3 de novembro de 2023 polo Consello Escolar, que comunicou ás familias os contidos e implicacións do mesmo.

Este Plan pódese consultar de xeito público en EDUCALIDADE, procurando o noso colexio no menú Plans dos centros.