O Concello de Folgoso do Courel, no que se sitúa o centro, comprende diversas localidades de baixa poboación, en xeral afastadas entre sí e con comunicacións por estrada deficientes, tanto no interior do propio concello como en relación ós concellos limítrofes. O alumnado que acude ó centro faino no transporte escolar e utiliza o comedor escolar cada día. Neste contexto rural e de poboación tan dispersa, as relacións dentro da comunidade educativa son comparativamente difíciles con respecto ó que ocorre en medios urbanos ou núcleos máis densos, facendo moi importante contar dende o centro con infraestruturas que apoien dende o eido educativo a cohesión desta comunidade e o seu acceso á realidade tecnolóxica actual. O Plan Dixital que se presenta aquí apoia as liñas de acción do Proxecto Educativo de Centro, buscando favorecer, mediante a dixitalización dos entornos e unha maior presenza dos medios tecnolóxicos nas interrelacións entre a comunidade, toda a actividade desenvolvida e difundida dende o eixo central que constitúe o centro educativo. A adopción das novas tecnoloxías non é nova no Centro, que participa xa de numerosos programas tecnolóxicos e traballa en proxectos nos que estas son ferramenta esencial e, á vez, produto; Fálase de EDIXGAL, DigiCraft, ou o Clube de Ciencias, como tamén da participación en competicións e proxectos de alta compoñente tecnolóxica como CANSAT ou SERVET. Cómpre destacar novamente que a importancia das tecnoloxías dixitais se revela se cabe aínda máis importante neste medio rural e relativamente illado, non só polos aspectos antes comentados das propias comunicación e interrelación locais, senón por te-la capacidade, a través do traballo realizado no centro, de difundir e poñer en contacto á poboación do concello con ferramentas e procesos que forman parte do mundo tecnolóxico actual e que teñen un grande potencial para mellora-la vida e as condicións desta, contribuíndo de maneira efectiva ó progreso de toda a sociedade.

Procederase a o facer seguimento do desenvolvemento do plan e da consecución dos obxectivos propostos, realizando:

• Unha avaliación do proceso, unha vez ao trimestre, valorando a realización das accións e o logro dos resultados sinalados segundo os indicadores asociados aos obxectivos, recollendo as propostas de modificación das accións e de mellora que se consideren oportunas.
• Ao remate do curso, realizarase unha avaliación final sobre o conxunto dos obxectivos recollidos no plan de acción e recompilando as propostas finais de mellora que se consideren oportunas.

A valoración xeral é positiva porque se acadaron a maioría dos obxectivos, e os que faltan debéronse a circunstancias alleas ao centro

Para o curso seguinte agardamos continuar co desenvolvemento da competencia dixital tanto do alumnado como do profesorado

O Plan Dixital porase a disposición de toda a comunidade educativa, mediante un enlace de descarga na páxina web do Centro. Ademáis estará dispoñible tamén na aula virtual.