O CEIP San Miguel de Reinante atópase na localidade que leva o mesmo nome, no barrio coñecido por “O Souto”. É un dos dous colexios públicos que pertencen ao Concello de Barreiros e, polo tanto, está baixo a titularidade da Consellería de Cultura, Educación, Formación Profesional e Universidades da Xunta de Galicia. É un centro de Educación Infantil e Primaria de oito unidades.
A zona caracterízase por ter una poboación maior cunha cantidade de xente nova moi reducida, xa que prefiren trasladarse a vivir e traballar a núcleos próximos (Foz, Ribadeo, Burela,...). Aínda así, nestes últimos anos nótase un certo repunte de natalidade que se manifestou cun aumento de matrícula e estabilidade do centro.
Neste centro escolarízanse nenos/as de San Miguel de Reinante, Benquerencia, Reinante, Vilamar, Cabarcos, San Xusto, Vilamartín.
Hai servizo de transporte escolar. Os nenos/as transportados utilizan o comedor escolar. Polo tanto, realizan o desprazamento en autobús dúas veces ao día: veñen pola mañá e regresan pola tarde. A poboación escolar é eminentemente rural.
O alumnado procede maioritariamente dun medio familiar galegofalante. O caso de nenos/as castelán falantes é de pouca incidencia. Nos últimos anos estase a producir a chegada de numerosos alumnos/as procedentes do estranxeiro (Brasil, Portugal, Marrocos, Paraguai, …).
O nivel cultural das familias é medio ou medio-baixo.
Os oficios dominantes son: agricultores/as, gandeiros/as, traballadores/as da construción, do transporte, empregados/as…En menor medida hai profesionais con estudos medios ou superiores.
Contribución ao Proxecto Educativo
O presente Plan Dixital ten como obxectivo obter o máximo proveito dos recursos dixitais que temos á nosa disposición, partindo dunha proposta realista e sendo conscientes da dificultade que en moitas ocasións supoñen cambios tan ambiciosos coma este.
Ademais, o Plan Dixital establece as liñas básicas de traballo no eido dixital, algo fundamental na sociedade do século XXI, nun mundo globalizado e dominado pola rapidez da información e pola repercusión de todo o que se move a través da rede. Neste sentido, considérase realmente importante valorar as posibilidades que as TIC poden achegarnos, sobre todo, tendo en conta que nos atopamos nun centro do rural que non dispón ao alcance da man de tantos recursos e opcións como pode ter o alumnado que vive próximo a grandes urbes, aínda que sexamos conscientes da riqueza que a nosa contorna supón para a comunidade educativa do noso centro.
Por último, sinalar tamén que as TIC poden ser o complemento perfecto para a aprendizaxe, pero que non poden nin deben ser en ningún caso substitutivo do contacto coa realidade, coa natureza e co día a día, senón máis ben, unha fiestra que se abre a aquilo que non temos ao noso alcance, que mostre unha realidade que nos abre moitos camiños e posibilidades e un recurso inesgotable.
