1.1. Contextualización do Plan Dixital no centro. Contribución ao Proxecto Educativo do Centro
O EPAPU de Teixeiro está situado no interior do Centro Penitenciario de Teixeiro no lugar de Paradela preto da estrada que une a Autovía do Noroeste ca cidade de Santiago de Compostela, no Concello de Curtis.
O edificio que alberga o EPAPU denomínase Módulo Sociocultural-Polideportivo do Centro Penitenciario. Dentro deste edificio lévanse a cabo outras actividades como cursos de formación para funcionarios de II.PP, as actividades propias do coordinador de formación do Centro Penitenciario, etc. contén tamén a capela, o salón de actos e os departamentos deportivos do cárcere.
Tamén, se atende a todos aqueles alumnos clasificados no 1º Grado Penitenciario que pola súa normativa penitenciaria non poden acudir ás clases regradas e o soliciten mediante instancia. A atención é voluntaria por parte dos docentes.
Trátase dun centro que, dadas as especiais circunstancias do alumnado, ten como principal dificultade, a diversidade de procedencia do alumnado, así como a propia mobilidade e incorporación continua de novos alumnos/as ás aulas. O noso alumnado procede de case todas as Comunidades Autónomas do Estado e tamén dunhas 25 nacionalidades diferentes do mundo.
A realidade social do EPAPU de Teixeiro dista moito de ser parella á de calquera centro de educación primaria, secundaria ou mesmo á doutros centros de adultos. A nosa realidade é a de “intramuros”, o cárcere, a priori, nós non contamos con realidades familiares directas, os nosos alumnos non teñen contacto cunha realidade social exterior, agás os funcionarios de prisións e persoal que traballa no centro e o profesorado da escola.
Espérase que o Plan Dixital do Centro contribua pouco a pouco a promover un cambio na práctica educativa e formativa do centro, consistente nunha utilización efectiva e eficiente dos recursos dispoñibles mediante a súa integración na metodoloxía empregada, promovendo e facilitando a adquisición das necesarias competencias dixitais polos seus usuarios naturais, alumnado e profesorado.
Ó longo do curso 2024-2025, conforme a implantación do LOMLOE vaise convertindo nunha realidade, compre afondar no desenvolvemento da competencia dixital do profesorado e do alumnado, ó tempo que se vai creando una eficiente estructura tecnolóxica que permita aproveitar os novos recursos postos a disposición polos investimentos tecnolóxicos efectuados.
Tamén organizarase a oferta formativa do profesorado e alumnado en canto á dixitalización en función das súas necesidades e dos obxectivos establecidos, un dos cales debe ser facer efectivo a posta en marcha da Aula Virtual.
1.2. Marco lexislativo
Neste curso académico 2024-2025 atenderemos este marco lexislativo:
ORDE do 12 de Abril do 2024 pola que se aproba o calendario escolar para o curso 2024/25 nos centros docentes sostidos con fondos públicos na Comunidade Autónoma de Galicia.
Decreto 123/2021, do 2 de setembro, polo que se regula o Marco galego de competencias dixitais e a certificación galega en competencias dixitais.
Decreto Educ. Primaria Galicia: DECRETO 155/2022, do 15 de setembro, polo que se establecen a ordenación e o currículo da educación primaria na Comunidade Autónoma de Galicia.
Decreto/Orde Educ. Infantil Galicia: ORDE do 30 de maio de 2023 pola que se desenvolve o Decreto 150/2022, do 8 de setembro, polo que se establece a ordenación e o currículo da educación infantil na Comunidade Autónoma de Galicia e se regula a avaliación nesa etapa educativa.
En desenvolvemento da Lei orgánica 2/2006, do 3 de maio, modificada pola Lei Orgánica 3/2020, do 29 de decembro, publicouse o Real Decreto 217/2022, do 29 de marzo, polo que se establece a ordenación e as ensinanzas mínimas da Educación Secundaria Obrigatoria. Na súa disposición adicional terceira estipula que as persoas adultas que queiran adquirir as competencias e os coñecementos correspondentes á Educación Secundaria Obrigatoria contarán cunha oferta adaptada ás súas condicións e necesidades e establece a estrutura desta etapa. Recolle, así mesmo, que o currículo destas ensinanzas será establecido polas administracións educativas.
En consecuencia, publicouse o Decreto 156/2022, do 15 de setembro, polo que se establecen a ordenación e o currículo da educación secundaria obrigatoria na Comunidade Autónoma de Galicia. Na súa disposición adicional cuarta, dedicada á educación para persoas adultas, organiza a estrutura desta etapa e recolle que a consellería con competencias en materia de educación establecerá o seu currículo conforme aos aspectos básicos recollidos no anexo II do citado decreto. Dito currículo queda establecido no borrador do 10 de Xullo do 2024.
