2. Situación de partida
2.1. Infraestrutura, equipamento e servizos dixitais
Infraestrutura dixital: O centro dispón da seguinte infraestrutura dixital:
- Infraestrutura de datos (conectividade a Internet e telefonía).
- Conexión cableada de rede.
- Conexión sen fíos.
Equipamento dispoñible por categorías:
Un dos obxectivos propostos neste Plan Dixital é realizar un inventario completo, actualizado e detallado do equipamento dixital do centro, que se realizará no curso 2022-2023. Así e todo, neste apartado faise un resumo xeral da situación actual do centro:
- Aulas dixitalizadas:
Case todas as aulas do centro teñen ordenador, proxector e equipo de son, e case a metade teñen encerado dixital. Todo este equipamento leva instalado moitos anos, así que están a producirse moitas incidencias. O cableado está moi mal organizado: cables á vista enredados uns cos outros, metros de cable sobrante, etc.
- Proxecto Abalar:
Hai catro aulas Abalar, con cadanseus 30 portátiles. Dispoñen de carriño cargador, proxector e ordenador para o profesorado, pero o seu estado é moi precario: a metade dos portátiles están avariados, e os que funcionan non se poden cargar facilmente porque as baterías están viciadas. Un dos carriños está avariado e non se pode arranxar porque non hai repostos. Os ordenadores operativos son de gama baixa de hai máis de 10 anos, polo que se pode dicir que son inservibles. Os proxectores teñen moi pouco brillo e nitidez.
- Equipos de xestión e administración:
Entre administración e despachos de Dirección, hai 7 equipos funcionais, aínda que 2 deles comezan a estar anticuados, e dado que son equipos dun uso intensivo, conviría actualizalos.
- Uso na biblioteca:
A biblioteca conta con 2 ordenadores de sobremesa para o traballo de xestión, e con 8 ordenadores para uso do alumnado. Moitos destes equipos están moi deteriorados, e tardan moito tempo en arrancar. A conexión a Internet é provisional, e estamos á espera da instalación do cableado (xa foi solicitada).
- Equipos para uso nas salas de profesorado e departamentos:
No centro hai dúas salas de profesores. Unha delas conta con 4 equipos e outra con 3 equipos, dous deles novos e un obsoleto.
Todos os departamentos dispoñen de polo menos un ordenador compartido, e algúns dispoñen tamén de impresora. Aproximadamente a metade destes equipos son moi vellos.
- Aulas de informática e dotacións para proxectos específicos:
No centro dispoñemos de catro aulas de informática, pero na actualidade só unha delas pode acoller grupos completos:
INFO I: 20 ordenadores de sobremesa, 1 portátil para o profesorado e canón. O canón vese moi mal. Os ordenadores funcionan ben, pero non pode acoller grupos completos, polo que se propón ampliación.
INFO II: 32 equipos de sobremesa, 1 portátil para o profesor, 1 canón que non ten luminosidade. En xeral, están en bo estado.
INFO III: 10 equipos de sobremesa (con avarías frecuentes), 1 portátil do profesor. Ten moito espazo libre e cableado instalado para 16 equipos.
INFO IV: Hai un portátil para o profesor e 20 equipos para o alumnado. Destes, a metade son equipos vellos que se aproveitaron a se renovaren as aulas de Administrativo. Hai tamén un proxector cunha luminosidade case nula.
- Aulas do Ciclo Medio de Xestión Administrativa:
Hai dúas aulas específicas para docencia no Ciclo Medio de Xestión Administrativa:
1º Administrativo: 24 equipos de sobremesa para o alumnado. 1 equipo de sobremesa para o profesorado, canón.
2º Administrativo: 17 equipos de sobremesa para o alumnado. 1 equipo de sobremesa para o profesorado, canón.
- Educa Dixital:
Ao comezo do curso 2021-2022, o centro recibiu unha remesa de 40 kits dixitais (compostos por un ordenador portátil modelo Acer TravelMate Spin B3 e un router sen fíos), para llos emprestar ao alumnado que pola súa situación socioeconómica non tivese dispoñibilidade de ordenador e/ou conexión a Internet. No momento da redacción deste documento hai 37 kits prestados.
A mediados do segundo trimestre, a conexión a Internet dos routers sen fíos foi desactivada e comunicouse ao centro que non se ía dar de alta de novo.
Servizos dixitais educativos:
O centro dispón dunha páxina web (https://www.edu.xunta.gal/centros/iesordes/), e dunha aula virtual empregada pola práctica totalidade do profesorado e o alumnado.
Tamén se emprega a aplicación Abalar, sobre todo para a comunicación coas familias, tanto por parte dos titores como para as comunicacións do centro.
Ademais, o centro solicitou a súa participación no programa Polos Creativos, convocado pola Consellería de Cultura, Educación e Universidade na ORDE do 21 de abril de 2022 pola que se crea o programa de innovación educativa Polos creativos e se establece o procedemento para a participación dos centros docentes públicos dependentes desta consellería, pero no momento da redacción deste documento aínda non foi publicada a lista de centros admitidos.
Xestión do mantemento do equipamento do centro:
O mantemento e a xestión do equipamento dixital depende na actualidade do responsable TIC do centro. As avarías dos equipos e os fallos na conexión á rede comunícanselle a esa persoa, pero sen unha canle de comunicación moi clara. Unha vez recibida a incidencia, o responsable pode, ou ben arranxala directamente, ou ben solicitar soporte externo.
- Para incidencias na conexión, solicítase soporte á UAC.
- As incidencias no equipamento subministrado pola consellería póñense en coñecemento da UAC.
- Para avarías nos equipos adquiridos polo centro contrátase un servizo técnico externo.
Enlaces a protocolos do centro relacionados coas TIC:
Na actualidade non existen protocolos relacionados coas TIC, pero a súa redacción e posta en funcionamento é un dos obxectivos propostos para o vindeiro curso.
