O noso alumnado procede das parroquias rianxeiras do Araño (1228 habitantes, 592 homes e 636 mulleres) e Taragoña (2084 habitantes, 994 homes, 1090 mulleres). Nos últimos vinte anos a poboación de ambas parroquias descendeu en máis de 400 habitantes cada unha. A nosa escola de infantil de referencia é o CRA de Rianxo e o instituto o Felix Muriel, tamén de Rianxo. O noso centro participa de diferentes proxectos que favorecen o desenvolvemento das competencias dixitais do alumnado. Desde o curso 2019-2020 integrámonos no proxecto E-dixgal, sendo o primeiro centro de Rianxo en facelo. O curso pasado 2020-2021 saíu a primeira promoción formada con libros dixitais e os resultados foron altamente satisfactorios. Tamén participamos do proxecto DigiCraft da fundación Vodafone España, con formación online para o profesorado e dotación de materiais dixitais.
A biblioteca do centro leva varios anos participando dos proxectos de Biblioteca Creativa (pantalla croma, montaxes audiovisuais, impresora 3D, scornabots...), Radio na Biblio e da Plataforma de lectura dixital ELBE 2. Existe unha estreita colaboración entre os equipos de biblioteca e as tic, así como coa dirección do centro para que todos os esforzos na mellora das competencias dixitais estean perfectamente coordinados. Contamos así mesmo cunha Aula Virtual dinámica, que durante todo o curso achegou recursos audiovisuais, pdf’s, tarefas, enquisas, etc. e acolleu algún dos documentos mais importantes do curso como o Proxecto Documental Integrado a proposta da biblioteca do centro ou o Cancioneiro Escolar Urxente. As páxinas da Aula Virtual de interese para toda a comunidade son de aceso libre universal. O noso Proxecto Dixital pretende por en valor toda a infraestrutura acumulada nos últimos anos e acabar coas barreiras de tipo tecnolóxico que poidan limitar o seu uso. Estas limitacións foron detectadas polas probas diagnósticas efectuadas este ano e afectan a toda a comunidade, polo que a nosa intención é intervir no profesorado, no alumnado e tamén nas familias.
Durante o século XX acadouse en Galicia a alfabetización e a escolarización universal, un logro que precisou de grandes esforzos, non só das institucións e dos diferentes gobernos, senón, e por encima de todo, da cidadanía. En 1900 a taxa de alfabetización no noso país era do 52 % en homes e de apenas o 16 % en mulleres. Às escolas construídas polo Estado sumáronse as financiadas polo diñeiro da emigración, como a escola infantil Rosalia de Castro de Taragoña. Un século mais tarde, cando xa se lograra o acceso ao sistema educativo de toda a sociedade, precisábamos dunha segunda alfabetización, desta volta na linguaxe informática e no uso e manipulación dos recursos tecnolóxicos. A pandemia e o confinamento durante o curso 2019-2020 situounos de fronte co problema: a falsa realidade na que vivíamos pensando que os nenos e as nenas nacen sabendo usar un ordenador e que todo se pode xestionar desde o noso móbil. As carencias foron tan evidentes que tivemos que facer un esforzo titánico para pór a funcionar ferramentas coas que xa contábamos pero que en moitos casos infra-utilizáramos ou simplemente ignoráramos. A resolución do 3 de setembro de 2021, da Secretaría xeral de Educación e Formación Profesional pola que se ditan instrucións para o deseño, elaboración e implementación do Plan Dixital lembra o recollido nos Art. 111Bis, 121 e 132 da LO 2/2006:
«O artigo 121 establece que o proxecto educativo do centro recollerá, entre outros aspectos, a estratexia dixital do centro, de acordo co establecido no artigo 111 bis, no que se establece que as Administracións educativas e os equipos directivos dos centros promoverán o uso das tecnoloxías da información e a comunicación (TIC) na aula como medio didáctico apropiado e valioso para levar a cabo as tarefas de ensino e aprendizaxe, utilizando os marcos de referencia da competencia dixital que orienten a formación inicial e permanente do profesorado e faciliten o desenvolvemento dunha cultura dixital nos centros e nas aulas. O artigo 132 da devandita Lei establece como competencias dos directores e directoras, entre outras, exercer a dirección pedagóxica, promover a innovación educativa e impulsar plans para a consecución dos fins do proxecto educativo do centro; e fomentar a cualificación e formación do equipo docente, así como a investigación, a experimentación e a innovación educativa no centro». A Resolución do 3 de setembro do 2021 marca como obxectivos a lograr coa posta en marcha do plan dixital os seguintes:
a) Facilitar a integración e o desenvolvemento das tecnoloxías dixitais nos procesos formativos e a xestión dos recursos humanos e materiais do centro. b) Promover o uso das ferramentas de avaliación e diagnose dos centros educativos respecto á competencia dixital. c) Mellorar a competencia dixital dos membros da comunidade educativa . para transformar os centros en organizacións educativas dixitalmente competentes nos procesos de ensino-aprendizaxe, de xestión e de relación. d) Definir o equipo responsable de dinamización do Plan Dixital e a súas funcións. Unha vez realizadas todas as probas diagnósticas (Selfie, Dafo, CDD), no último trimestre do curso 2021-2022, o Plan Dixital entrégase aos interesados para «ser aprobado polo consello escolar, unha vez oído o claustro. No seu caso, o Plan Dixital será aprobado pola dirección do centro unha vez oído o claustro e será elevado como informe ao Consello Social». O parágrafo entre aspas está copiado literalmente da resolución. No vindeiro curso o plan deberá ser posto en marcha cunha constante actualización.
A principio de curso ofertamos entre o profesorado un PFPP para realizar o Plan Dixital que contou co asesoramento do Adix Ribeira e como mentora a María Varela Abuín. Finalmente, o equipo encargado para a elaboración do Proxecto Dixital ficou constituído por Alma María Caamaño Romero (directora do centro), María Covadonga Rodríguez Argüelles (coordinadora da biblioteca escolar) e José Luís Dopico Orjales (coordinador de Tic). Seguindo as indicacións do Adix Ribeira e a nosa mentora, realizamos as probas diagnósticas que consistiron na autoavaliación SELFIE, no test CDD, na análise DAFO e finalmente a elaboración do Plan de Acción. O proceso inicial vese culminado coa redacción do presente Proxecto Dixital. O coordinador do proxecto e a directora do centro asistiron ás docencias formativas impartidas online e no mes de maio entregamos en data e forma a memoria do PFPP S2131009 Análise da competencia dixital do centro e elaboración do plan dixital, á asesora CAFI Marta Valderrama.
