Xustificación do Plan Dixital en relación coa normativa vixente
• Art. 111 bis, Art. 121 e Art. 132 da LO 2/2006, de 3 de maio, de Educación.
• Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021- 2022.
• Artigo 37.1. do DECRETO 156/2022, do 15 de setembro, polo que se establecen a ordenación e o currículo da educación secundaria obrigatoria na Comunidade Autónoma de Galicia.
• Artigo 18 da ORDE do 26 de maio de 2023 pola que se desenvolve o Decreto 156/2022, do 15 de setembro, polo que se establecen a ordenación e o currículo da educación secundaria obrigatoria na Comunidade Autónoma de Galicia e se regula a avaliación nesa etapa educativa.
• Artigo 35.1 do DECRETO 157/2022, do 15 de setembro, polo que se establecen a ordenación e o currículo do bacharelato na Comunidade Autónoma de Galicia.
• Artigo 21 da ORDE do 26 de maio de 2023 pola que se desenvolve o Decreto 157/2022, do 15 de setembro, polo que se establecen a ordenación e o currículo do bacharelato na Comunidade Autónoma de Galicia e se regula a avaliación nesa etapa educativa.
Contextualización do PD no centro e contribución ao Proxecto Educativo
Características socioeconómicas e culturais do contexto do centro
O Concello de Arteixo caracterízase por unha composición rural na maioría das parroquias; por unha moi forte presencia de industrias que se instalan no polígono de Sabón, en que se atopa o instituto; e pola presenza de núcleos de carácter suburbano debido á súa proximidade á cidade da Coruña, da que é limítrofe. Tanto o polígono, como o propio Concello están inmersos nun proceso de crecemento e de expansión, atraendo un importante número de inmigrantes á zona.
A composición do alumnado é maioritariamente pertencente ás clases economicamente baixa e media-baixa, de familias de empregados nas industrias do polígono e do sector de servicios, e de familias dedicadas a labores agrícolas. Tamén hai presencia de alumnos de fóra do concello no Ciclo Superior de Administración e Finanzas e no Ciclo Medio de Actividades Físico- Deportivas no Medio Natural. Outro sector de alumnado é o procedente das zonas suburbanas de Meicende e de urbanizacións de vivendas sociais. Nos últimos cursos ven aumentando progresivamente o número de alumnos estranxeiros, maioritariamente latinoamericanos e marroquís, sendo este o único instituto da zona educativa que ten oferta específica de educación de adultos.
O feito de que o instituto estea situado no propio polígono industrial favorece o contacto con empresas e institucións en moitos ámbitos, como se detallará máis adiante nos respectivos apartados. Porén parece axeitado sinalar que hai unha grande colaboración destes organismos e do propio Concello co instituto, respondendo moi favorablemente ás nosas iniciativas, o que favorece o desenvolvemento da actividade educativa tanto nos aspectos docentes como nos económicos e de innovación educativa e tecnolóxica.
Contribución do Plan Dixital no centro e contribución ao Proxecto Educativo
O noso centro conta cunha longa experiencia en programas vencellados coas novas tecnoloxía, como demostra a participación no Proxecto “Arteixo Innovación” dende os seus inicios. Inicialmente, no 2003, o proxecto comezou a partires da Fundación Amancio Ortega co Proxecto “Ponte dos Brozos”, e posteriormente o Concello de Arteixo asumiu a continuidade da iniciativa, que se plasma no actual “Arteixo Innovación”. Dito proxecto permítenos ser moi competitivos a nivel de equipamentos.
O centro anualmente participa no Plambe, que implica o manexo de certas competencias dixitais tanto de alumnado coma de profesorado participante.Así mesmo, en numerosas ocasións o centro participa en programas específicos dentro do Plan Proxecta, coma “Protexe o teu medio” ou “Aliméntate ben”, que durante a súa realización implican a necesidade de progresar nas competencias dixitais do alumnado, por exemplo co tratamento informático de datos e mesmo a elaboración de gráficas de resultados.
Finalmente, o centro participa anualmente nun PFPP, que adoita ir vencellado ao traballo con novas tecnoloxías.
Proceso de elaboración
O traballo de redacción deste Plan Dixital iniciouse o curso 22/23 coa participación nun PFPP de centro, concretamente cunha liña de traballo específica para a elaboración do Plan dixital.
A temporalización das tarefas concretas a realizar quedou determinada polos equipos ADIX formados para asesoramento aos centros. Os documentos solicitados foron entregados na data proposta para cada un deles.
Para as distintas tarefas a completar, o Equipo de dinamización do Plan Dixital realizou xuntanzas de traballo semanais, para as que foi necesario un traballo previo de reflexión individual.
Tamén foi importante a participación da comunidade educativa, especialmente do Claustro, que realizou os cuestionarios SELFIE e o TCDD, que serviron para obter a contextualización do centro e determinar obxectivos.
Ao inicio deste curso académico a coordinación do Plan Dixital xunto co equipo directivo analizaron os resultados e conclusións do ano pasado e elaboraron unha primeira proposta de adaptación do Plan dixital para o presente curso, que logo de ser revisada pola nosa asesora ADIX finaliza coa proposta deste documento.
