O CEIP Plurilingüe Bragade é un centro situado no concello de Oza-Cesuras. O noso alumnado e as súas familias son, polo tanto, na súa totalidade do ámbito rural. Na actualidade, case a totalidade do alumnado conta cun ordenador na casa, e tamén ten acceso a Internet o que non é indicativo de que o alumnado faga un uso responsable das novas tecnoloxías.
Dende a Dirección do centro apóstase desde xa fai moitos anos polas novas tecnoloxías, cando se comezou coa introdución das TIC. Progresivamente fóronse introducindo e/ou optimizando na xestión administrativa, e no ámbito pedagóxico na maioría das aulas, ademais da existencia da Aula de Informática do centro. En anos posteriores, e tanto por achegas da Xunta de Galicia e dos orzamentos/inversións do propio colexio, adquiríronse novos ordenadores con acceso a internet.
Ademais dos elementos materiais, os ordenadores, o profesorado do centro ten traballado arreo para actualizarse no traballo coas novas tecnoloxías, e boa mostra son as múltiples actividades de formación que se teñen feito a título individual, así coma a asesoría e axuda directa aos mestres/as do centro por parte do coordinador TIC e o itinerario TIC a través da PFPP neste centro, iniciada dende o curso 2019/20 e ininterrompida dende entón.
Tamén resulta interesante resaltar os cambios que nos últimos tempos se teñen realizado no tocante á integración das TIC na vida cotiá do centro. Cómpre sinalar nese eido a xestión do centro, avaliacións, comunicacións de claustro, as comunicacións coa administración tanto educativa como local, informes de orientación, orzamentos, contas, xestión da biblioteca, horarios... se realizan dun xeito natural no marco das TIC e ao abeiro do Plan de Comunicación de centro, implantando no curso 2019/20, e que xa é preciso actualizar como consecuencia dos cambios derivados da COVID.
O plan dixital inicial (elaborado durante o curso 2021/22), estableceu un punto de partida para observar debilidades e propostas de mellora, para afondar nun salto maior a nivel de dixitalización de toda a Comunidade Educativa. Cabe salientar que nestes últimos anos, estableceuse un traballo promovido pola coordinación TIC no centro educativo, ca creación e reformulación dunha web dinámica oficial do centro, instalación, estandarización documental a nivel dixital, repositorio virtual, etc.
Todo isto supuxo un achegamento do uso das TIC a toda a Comunidade Educativa, logrando unha actividade dixital moi importante por parte das familias, mestres/as e alumnos/as. O Plan Dixital foi contribuíndo de maneira directa á consecución dos obxectivos establecidos no Proxecto Educativo e con outros plans nos que participou/a o centro, mellorando durante o curso 2022/23 (curso académico do comezo da súa implantación) a comunicación e compentencia dixital de toda a comunidade educativa en xeral.
Asemade este plan terase en conta na PXA do curso 2023/24 como parte do traballo a desenvolver do Equipo TIC/Abalar, do que forma parte o mesmo coordinador do Plan Dixital.
Contextualización normativo vencellado ao Plan Dixital do centro
- Art. 111 bis, Art. 121 e Art. 132 da LO 2/2006, de 3 de maio, de Educación
- Disposición adicional quinta da Resolución do 17 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento das ensinanzas de EI, EP, ESO e bacharelato no curso académico 2021-2022
- Disposición adicional terceira da Resolución do 18 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento dos ciclos formativos de FP do sistema educativo no curso 2021- 2022
- Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022
No tocante ao proceso de elaboración, salientar que o Plan Dixital inicial se realizou en base a información recollida do informe de análise da situación do centro e durante o primeiro trimestre do curso 2021/22, o centro realizou unha análise de situación mediante a ferramenta de autoavaliación SELFIE e o test CDD, para poder iniciar a fase de diagnose e o deseño e elaboración do Plan Dixital.
No último trimestre do curso 2021/22, o Plan Dixital foi aprobado polo consello escolar con data 07/06/2022 , previamente oído o claustro e aprobado pola Dirección do centro.
O Plan Dixital do noso centro artellouse a través da figura do coordinador TIC (mesma persoa que ostenta a Dirección), co fin de promover e garantir o desenvolvemento dun marco de acción que permita acordar e coordinar diversos aspectos que afectan ao uso das tecnoloxías no ensino, dende aquelas relacionadas con cuestións organizativas, ata outros máis pedagóxicos e propios dos procesos de ensino e aprendizaxe.
A tal fin, o equipo de dinamización do Plan dixital formouse por tres mestras/e, que organizados nun grupo de traballo creado a través do PFPP do centro, estivemos en continua coordinación para a realización do plan, facendo reunións regulares de traballo grupal, de traballo individual e acudindo ás docencias por videoconferencia ás fomos convocadas/o.
En todas as reunións se facían achegas, e se acadaban acordos e compromisos para seguir coa realización das tarefas propostas (SELFIE, CDD, Plan de acción…) co fin de axustarse á realidade do centro e realizar o plan axeitado.
O Plan Dixital actual é froito de todo o traballo anterior á súa implantación máis a experiencia acadada da súa aplicación durante o curso 2022/23.
