1.1. Datos básicos do centro
O CEIP Plurilingüe A Magdalena está situado no Concello das Pontes de García Rodríguez, provincia da Coruña. Escolariza alumnado de parroquias do rural, do núcleo urbano e doutros concellos limítrofes, contando así cunha matrícula de 407 nenos/as, distribuídos da seguinte maneira: 128 alumnos/as de Educación Infantil e 279 alumnos/as de Educación Primaria. Así mesmo, o claustro está formado por 35 docentes de todas as especialidades para ambas etapas.
Ficha técnica de interese:
Nome do centro: CEIP Plurilingüe A Magdalena
Enderezo do centro: Rúa Monte Caxado, S/N, As Pontes de García Rodríguez, 15320
Teléfono: 881 93 00 36
Código do centro: 15013643
Correo electrónico: ceip.magdalena@edu.xunta.gal
Páxina web: http://www.edu.xunta.gal/centros/ceipmagdalena
1.2. Contextualización do Plan Dixital no centro. Contribución ao PEC
Nas súas proximidades do centro encontramos un gran patrimonio cultural, natural e social, debido en gran parte pola influencia do Eume e a gran biodiversidade que o acompaña. A localidade é coñecida tamén pola central térmica, a industria enerxética centrada na biomasa e eólica ademais do sector lácteo. Na actualidade moito do movemento turístico débese á riqueza paisaxística e ao gran lago creado na antiga mina de lignito.
A realidade socioeconómica é variada, dedicándose unha gran parte da poboación á industria, agricultura e gandería, mais tamén nos atopamos con traballadores de empresas do pequeno e mediano comercio. En canto ao coñecemento tecnolóxico, a competencia dixital das familias é variado, demostrándose unha melloría significativa dende o confinamento. Pola súa parte, a dotación de recursos é notable xa que na maioría das casas existe conexión á Rede e aparellos intelixentes.
A nivel lingüístico a poboación maioritaria usa o castelán como idioma habitual aínda que tamén posúe competencia, cando menos verbal, para expresarse en lingua galega. Con isto, a lingua vehicular do centro é o galego.
Neste contexto o presente Plan Dixital atenderá ás circunstancias que rodean a situación ambiental do centro, respectando as directrices enmarcadas no Proxecto Educativo e no Plan Xeral Anual para o curso 2022/2023. É por iso que a mellora da competencia tecnolóxica será un pilar neste ano académico desenvolvendo iniciativas que, integradas nos demais plans e proxectos do colexio, serán fundamentais no cumprimento de obxectivos establecidos en materia dixital. De cara ao vindeiro curso o presente Plan Dixital conformará un apartado específico para a descrición do proceso de implementación, dentro da PXA.
Algunhas destas iniciativas van dirixidas a combater certas problemáticas observadas ao longo destes anos de pandemia, como poden ser a fenda e a competencia dixital. A COVID-19 deixou ver o baixo nivel educativo que existe na adquisición desta competencia, acentuando así mesmo a chamada fenda dixital, que ante a necesidade imperante do momento fixo que se acrecentase máis se cabe as desigualdades e o contraste no manexo de novas tecnoloxías.
Esta situación reforza o noso afán de involucrar a toda a comunidade educativa no desenvolvemento deste Plan Dixital. Dende o CEIP Plurilingüe A Magdalena sempre nos implicamos na integración das TIC na aula, por iso participamos en diferentes formacións e programas que axudan ao alumnado e profesorado a formarse e coñecer este novo paradigma educativo. Demostración disto é a nosa participación no programa EDixgal ou a creación de gran número de grupos de traballo para o desenvolvemento de dita temática.
A modo de resumo, no actual curso o centro participa nos seguintes programas educativos en relación coas TIC:
- Abalar / EspazoAbalar / AbalarMóbiles: uso principal para a comunicación familia-escola e obtención de recursos educativos.
- Edixgal: para o desenvolvemento diario e a mellora competencial co alumnado de 5º e 6º.
De cara ao curso que vén buscarase participar noutros proxectos tales como: DigiCraft ou Polos Creativos.
1.3. Breve xustificación do mesmo
A Lei Orgánica 3/2020, do 29 de decembro, pola que se modifica a Lei Orgánica 2/2006, de 3 de maio, de Educación (LOMLOE), establece que nos centros educativos se promoverán o uso das tecnoloxías da información e a comunicación (TIC) na aula como medio didáctico apropiado e valioso para levar a cabo tarefas de ensino – aprendizaxe utilizando os marcos de referencia da competencia dixital que orienten a formación inicial e permanente do profesorado e faciliten o desenvolvemento dunha cultura dixital nos centros e nas aulas (Art. 111 bis). Este proceso respectará o proxecto educativo do centro onde se recolle a estratexia dixital do centro (Art. 121).
Do mesmo modo, a Disposición adicional quinta da Resolución do 17 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento das ensinanzas de EI, EP, ESO e bacharelato no curso académico 2021-2022, implanta a elaboración de Plans Dixitais nos centros seguindo as directrices recollidas na Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital.
1.4. Proceso de elaboración
Para a redacción do Plan Dixital seguiuse un proceso minucioso baseado nun diagnóstico previo da capacidade tecnolóxica do profesorado e alumnado. As fases foron:
- 1º Trimestre: enquisa SELFIE ao alumnado e profesorado.
- 2º Trimestre: realización do test CDD (de Competencia Dixital Docente). Obtidos os resultados do informe SELFIE e do test CDD, elaborouse a análise DAFO do centro en relación ao ensino dixital.
- Finais do 2º e 3º Trimestre: selección e filtrado de prioridades resultantes da análise DAFO. Recollida do Plan de Acción para atenuar as debilidades e ameazas.
- Finais do 3º Trimestre: Fase de avaliación e confección do Plan.
O deseño trata de recoller as ideas principais, determinar as prioridades e establecer os niveis de planificación (programas, proxectos, obxectivos e/ou accións) que marcarán o plan de traballo do equipo docente no seu proceso de cambio e mellora. Con isto, o Equipo de Dinamización do Plan estará formado por: equipo TIC e equipo directivo. Con esta organización o Plan Dixital deberá permitir á comunidade educativa:
- Entender a importancia das novas tecnoloxías neste novo paradigma educativo.
- Coñecer os obxectivos formulados para a consecución da competencia dixital.
- Implicarse no desenvolvemento tecnolóxico do centro.
