Xustificación do Plan Dixital:
O Plan Dixital enmárcase dentro da iniciativa da Consellería para acadar os obxectivos fixados a nivel nacional e ten a seguinte contextualización normativa:
- Art. 111 bis, Art. 121 e Art. 132 da LO 2/2006, de 3 de maio, de Educación.
- Disposición adicional quinta da Resolución do 17 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento das ensinanzas de EI, EP, ESO e bacharelato no curso académico 2021-2022.
- Disposición adicional terceira da Resolución do 18 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento dos ciclos formativos de FP do sistema educativo no curso 2021- 2022.
- Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022.
Caracteísticas socioeconómicas e culturais do contexto do centro:
O CEIP Plurilingüe Calvo Sotelo sitúase no municipio de O Carballiño, na provincia de Ourense, e conta cunha poboación de arredor dos 14.000 habitantes.
O Carballiño é unha vila semiurbana de interior e dispón de amplos servizos: biblioteca municipal, centro de saúde, parques, dous institutos e outros dous colexios de titularidade privada e concertada, polideportivos, auditorio, conservatorio, gardería e escola infantil de 1o ciclo da rede da Galiña Azul, estacións de tren e autobús, praza de abastos, piscinas, ximnasios e diversos establecementos públicos. Conta ademais cun polígono industrial con fábricas e empresas do sector eólico, estruturas metálicas, montaxes eléctricos, embutidos, materiais plásticos e pequenas empresas, destacando as cámaras frigoríficas de conxelados onde almacenan o gran protagonista gastronómico desta vila, que é o polbo, grazas ao cal é coñecido O Carballiño incluso internacionalmente.
As familias teñen un nivel sociocultural medio e centran a súa actividade nos sectores secundario e terciario, sendo unha minoría as que se adican ao sector primario.
Incardinación e contribución do Plan Dixital ao Proxecto Educativo. Relación con outros Plans e proxectos do centro. Programas de innovación nos que participamos.
Dentro das actividades e proxectos nos que participa o centro atopamos o PLAMBE, incluíndo Bibliotecas Creativas, Proxecto ABALAR, Digicraft, o Plan Proxecta (con dúas liñas) e Contratos Programa (con cinco liñas) sendo ademais un centro Plurilingüe con sección Plurinfantil. A nosa intención para o presente curso académico era que a actividade do centro xirase en torno ao proxecto Polos Creativos pero por causas alleas ao centro non se realizou a obra pertinente polo que as actividades realizadas foron illadas nas aulas ordinarias.
A coordinacón é un dos piares fundamentais onde se fundamenta a nosa acción educativa. Por este motivo entendemos que os plans e proxectos que se desenvolven deben ter unha guía común e incluír a toda a comunidade educativa.
Os nosos esforzos van encamiñados a manter uns obxectivos comúns que partan do análise DAFO realizado, encamiñados a lograr a actualización do Proxecto educativo e a posta en marcha de iniciativas e actividades que axuden a desenvolver a tarefa educativa da forma máis eficiente posible.
A coordinación entre os diferentes equipos e persoas responsables dos proxectos está planificada na nosa Programación anual. Realizamos reunións periódicas e temos mecanismos de comunicación adecuados para compartir a información con todo o profesorado.
Traxectoria no ámbito das novas tecnoloxías.
O noso Centro ten incorporadas as tecnoloxías da información e a comunicación aos procesos de ensino-aprendizaxe nas dúas etapas desde que comezamos no programa ABALAR.
Nestes últimos cursos estamos facendo un cambio metodolóxico e unha adaptación para o mellor aproveitamento das posibilidades que ofertan as TIC.
O uso de ferramentas tecnolóxicas realízase desde a etapa de infantil. As aulas dixitais son empregadas por todo o profesorado, que realizou un importante esforzo de formacón e implicación grazas á oferta formativa das administracións e a coordinación TIC do noso centro.
Proceso de elaboración
O proceso de elaboración do Plan Dixital estivo marcado en todo momento polas directrices enviadas. No centro iniciamos unha liña de formación dentro do PFPP do que formamos parte o equipo directivo, as coordinadora TIC, Polos Creativos e Plan dixital, e outros mestres/as do centro interesados en apoiar na debandita elaboración.
Realizamos a formación ofertada e mantivemos as reunións de traballo necesarias para actualizar as diferentes partes do Plan. Este proceso resultou intenso e abarcou todo o curso escolar.
