O CEIP Arealonga está ubicado no núcleo urbano do Concello de Vilagarcía de Arousa, no barrio da Lomba. É unha zona densamente poboada. A actividade económica predominante é a do sector servizos, da que o comercio e a hostalería ocupan a maior porcentaxe de poboación activa, seguido de profesionais independentes, a construción e a industria. O nivel sociocultural é medio, a oferta cultural no casco urbano está a un bo nivel, e nos barrios periféricos mellorou considerablemente nos últimos anos, xa que en todos hai casas de cultura dotadas de bibliotecas.
O centro conta con 6 unidades de Educación Infantil e 14 de Educación Primaria. Con liña 2 de Infantil a 4º de Primaria e mantendo a liña 3 en 5º e 6º de forma provisional.
Tendo en conta a normativa vixente elabórase o Plan Dixital como parte do Proxecto Educativo e a Programación Xeral Anual para regular a relación coa tecnoloxía nas distintas etapas educativas.
O obxectivo principal é ir integrando a tecnoloxía na vida diaria das aulas, xa que actualmente o alumnado debe adquirir unha serie de competencias en relación co seu emprego.
Dende o centro educativo debemos non só dar a coñecer a tecnoloxía senón tamen promover un uso axeitado, dando a coñecer os riscos que pode suponer un mal emprego da mesma.
A nosa sociedade está en cambio permanente, cada vez máis dixitalizada e por iso, dende os centros educativos debemos dar resposta ás necesidades do alumnado para que acaden as competencias necesarias en todos os eidos.
O CEIP Arealonga posúe conexión a internet, unha rede de área local (RAL/LAN) e servizo WIFI con acceso a internet.
Teñen acceso a internet vía WIFI o persoal do centro e o alumnado con dispositivos do centro. Pola contra, non pode acceder a internet vía WIFI o alumnado con dispositivos propios.
O acceso WIFI está disponible nos espazos dedicados á docencia, departamentos, secretaría do centro, despachos de dirección e zonas comúns.
