No CEIP Plurilingüe Labaca entendemos a tarefa educativa como proceso de desenvolvemento da personalidade do alumnado, desde perspectivas democráticas de liberdade, tolerancia, integración, espírito crítico en todos os ámbitos da vida persoal, familiar, social e profesional. Apostamos por unha escola ideoloxicamente pluralista, respectuosa coas ideoloxías e crenzas de todos, na procura de dar os alumnos informacións o máis obxectivas posibles para que, progresivamente, formen os seus propios criterios e podan analizar a realidade e tomar decisións responsables. Apostamos por formar cidadáns competentes por e para a vida,e formar ao alumnado de maneira que entenda, comprenda, interiorice e aplique as competencias clave no seu día a día para poder desenvolverse nunha sociedade cambiante. O imparable desenvolvemento tecnolóxico da sociedade está a supoñer retos, impensables hai uns anos, para a educación e a aprendizaxe. A tarefa principal, por tanto, é lograr que o alumnado mellore as súas aprendizaxes coa utilización das tecnoloxías da información. Iso supón configurar un novo escenario nas relacións entre o profesorado, o alumnado e os contidos do ensino, e facelo tamén na avaliación de todo o proceso.

Este Plan Dixital de Centro enténdese coma un instrumento que debe favorecer e impulsar o uso dos medios dixitais tanto nos procesos de ensino-aprendizaxe como no resto de procesos de xestión do centro, sempre co obxectivo final de colaborar no desenvolvemento integral do alumnado. Este plan recolle as accións a desenvolver para a mellora da competencia dixital de toda a comunidade educativa, en especial a do profesorado e do alumnado. Tendo en conta o mundo no que vivimos, é necesario abordar a tecnoloxía dende unha perspectiva global deseñando planes baseados nas características dos propios centros educativos e tendo en conta a lexislación vixente tal coma:

• Art. 111 bis, Art. 121 e Art. 132 da LO 2/2006, de 3 de maio, de Educación

• Disposición adicional quinta da Resolución do 17 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento das ensinanzas de EI, EP, ESO e bacharelato no curso académico 2021-2022

• Disposición adicional terceira da Resolución do 18 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento dos ciclos formativos de FP do sistema educativo no curso 2021- 2022

• Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022.

A actualización do presente plan está dirixida pola coordinadora do Plan Dixital e guiada por un titor asignado ao noso colexio, o cal forma parte do ADIX 2 Coruña. Para a elaboración do mesmo, partiuse da análise do Plan Dixital vixente o curso pasado, tendo en conta especialmente os obxectivos non acadados ou parcialmente.

O procedemento de avaliación constará de varios momentos. Un primeiro momento referido a avaliación continua, a cal farase cunha frecuencia trimestral coma mínimo valorando aspectos como o estado de execución e a posta en marcha das accións presentadas nas táboas dos obxectivos, a análise e valoracións dos resultados obtidos, e de ser o caso, a posible modificación desas accións mencionadas así coma as propostas de mellora. O segundo momento desta avaliación fai referencia a unha avaliación final na que a frecuencia neste caso será dunha vez ao ano, marcada esta ao final do curso escolar. Nesta valoración teranse en conta aspectos coma os obxectivos marcados no Plan de Acción e a súa consecución, así como os aspectos a mellorar e as súas propostas. Con este proceso de avaliación conseguirase chegar ao desenvolvemento dunha nova versión deste plan, co fin de mellorar a competencia dixital da comunidade educativa.

O desenvolvemento do Plan Dixital levouse a cabo dentro das posibilidades do noso centro educativo e tendo en conta que é importante ter un enfoque dun proceso que é continuo e evolutivo no tempo. Sendo este o segundo ano que se aplicou dito plan, seguiu sendo un reto para toda a comunidade educativa e seguiron sendo varios os factores que condicionaron o desenvolvemento do mesmo, como por exemplo, e de novo, a dotación tecnolóxica do centro, a formación e capacitación dos docentes ou a dispoñibilidade de recursos dixitais axeitados para as diferentes metodoloxías do proceso de ensino-aprendizaxe. Os obxectivos marcados para este curso académico foron acadados a excepción do número 3 e 5 que quedaron parcialmente acadados. Este último relacionado co departamento de orientación e que debido aos cambios no persoal durante todo o curso, igual que pasou na aplicación do primeiro Plan Dixital, decidiuse deixalo e reformulalo para o vindeiro curso.

Seguir marcando obxectivos cunha perspectiva máis ampla no tempo xa que algúns dos prospostos para este curso, aínda que se levaron a cabo, sería mellor marcalos para máis adiante. Realizar una nova avaliación das necesidades tecnolóxicas e recursos dispoñibles no centro para poder determinar que recursos adicionais son necesarios. Poñer de novo o obxectivo de facer o inventario xa que segundo informacións da Consellería, queda pendente a chegada de novo material ademais dunha nova app onde poder introducir todos os datos recollidos. Revisar e actualizar, dentro das posibilidades do noso centro, os ítems do DAFO para poder modificar e establecer obxectivos más axeitados ás necesidades do centro educativo. Seguir fomentando a formación dos docentes para a mellora da competencia dixital e por suposto mellora do proceso de ensino-aprendizaxe. Fomentar, de novo, a participación activa de toda a comunidade educativa no Plan Dixital tanto para a toma de decisións coma na implementación de estratexias dixitais.

Para a difusión farase uso dos recursos dixitais corporativos cos que conta o centro educativo. Neste caso refírense á propia páxina web do colexio (https://www.edu.xunta.gal/centros/ceiplabaca/) na que o Plan Dixital estará dispoñible. Ademais, tamén se utilizará a aplicación móbil Abalar para comunicar á toda comunidade educativa, neste caso as familias, de que o plan estará dispoñible no recurso antes mencionado.

A estas ferramentas corporativas únese a nova plataforma corporativa posta en marcha o curso pasado coma es “Educalidade” na cal estarán dispoñibles todos os plans dixitais de todos os centros educativos da comunidade autónoma.