Datos básicos do centro
O IES Breamo é un centro de titularidade pública dependente da Consellería de Cultura, Educación e Universidade que imparte na actualidade as ensinanzas de educación secundaria e bacharelato. O centro, que foi creado en 1978 por unha orde do MEC e que estreou novo edificio no 1995, leva por nome desde o curso 2004/05 o de IES Breamo, facendo referencia ó monte Breamo, que coroa a ladeira na que se asenta a vila de Pontedeume.
- IES BREAMO
- Enderezo postal: Avda. Ricardo Sánchez, 5 – 15.600 Pontedeume (A Coruña).
- Páxina web: https://www.edu.xunta.gal/centros/iesbreamo/
- Enderezo electrónico: ies.breamo@edu.xunta.gal
- Nº de alumnado: despois da recente conversión a CIFP do Fraga do Eume no 2021 na que o IES de Breamo acolleu 150 alumnos, na actualidade o centro ten unha matrícula anual de máis de 500 alumnos e alumnas.
- Nº de profesorado: 53.
- Dimensión estrutural: facendo unha análise rápida podemos dicir que o centro, situado entre a avenida de Ricardo Sánchez e o paseo marítimo de Pontedeume, conta cun edificio de planta rectangular e dispón de planta baixa, 1º e 2º andar. A carón do edificio hai un ximnasio, un pavillón e os patios pavimentados ó aire libre para o recreo do alumnado.
Contextualización do PD no centro. Contribución ó Proxecto Educativo do Centro
- Características socioeconómicas e culturais
O concello de Pontedeume, que se articula en 7 parroquias, reúne as claves para actuar como un gran centro comarcal a cabalo entre Ferrol e A Coruña. É o máis pequeno da comarca do Eume, con tan só 29,5 quilómetros cadrados, aínda que é o segundo máis poboado tras As Pontes, con 7.702 habitantes (a 23 de marzo 2022), o que lle confire a densidade de poboación máis elevada do conxunto, con algo máis de 250 habitantes por quilómetro cadrado.
A principal actividade do concello céntrase no sector servizos, que representa, tanto en número de traballadores como de empresas, máis do 70% do total. Os outros sectores son minoritarios, non representando ningún deles máis do 15% do total de traballadores ou empresas.
Desde un punto de vista lingüístico, a comarca ofrece uns rexistros mellorables no estado de conservación do idioma galego, sendo o idioma castelán, debido ás connotacións históricas da zona e á influencia da comarca de Ferrol sobre esta vila en tempos pasados, o idioma de referencia que adoita utilizar a maior parte da poboación.
A maioría do alumnado que recibe o IES Breamo, provén do núcleo urbano de Pontedeume (38% do alumnado). E un número menor de alumnos, do resto das parroquias, onde o ambiente é rural (20%). O IES Breamo pola súa situación xeográfica é referencia para o alumnado de concellos próximos como o de Cabanas (23%), Miño (10%), A Capela (3%), Vilarmaior (3%), Monfero (1%). O 2% restante cóbrese con alumnado que vén doutros concellos, como Ares e Mugardos.
Na actualidade, e despois da recente conversión a CIFP do Fraga do Eume, o alumnado pode tamén elixir cursar estudos de ESO en dous centros concertados da localidade.
- O plan dixital, o PEC e outros documentos de centro
O plan dixital de centro é un instrumento de planificación que debe estar integrado no Proxecto Educativo, segundo se recolle na LOMLOE no seu Artigo único. Modificación da Lei Orgánica 2/2006, de 3 de maio, de Educación. PUNTO 62. APARTADO 1 (O proxecto educativo do centro recollerá, así mesmo, a estratexia dixital do centro, de acordo co establecido no artigo 111 bis.5.»), co fin de desenvolver a competencia dixital da comunidade educativa, promover a innovación e sacar o máximo partido das tecnoloxías da información e comunicación e dos recursos educativos dixitais.
Este plan contén as medidas que garantirán a competencia dixital do alumnado e profesorado, reducindo no posible as fendas dixitais de acceso e uso. Tomouse como referencia fundamental o Marco Europeo para Organizacións Educativas Dixitalmente Competentes (DigCompOrg), e os resultados obtidos a través do cuestionario SELFIE e no Test CDD.
Tal e como se recolle na Lei Orgánica 3/2020, de 29 de decembro, pola que se modifica a Lei Orgánica 2/2006, de 3 de maio, de Educación, o uso xeneralizado das tecnoloxías de información e comunicación en múltiples aspectos da vida cotiá, acelerou cambios profundos na comprensión da realidade e na maneira de comprometerse e participar nela, nas capacidades para construír a propia personalidade e aprender ó longo da vida, na cultura e na convivencia democráticas, entre outros. Este cambio de enfoque require unha comprensión integral do impacto persoal e social da tecnoloxía, de como este impacto é diferente nas mulleres e os homes e unha reflexión ética acerca da relación entre tecnoloxías, persoas, economía e medio ambiente, que se desenvolva tanto na competencia dixital do alumnado como na competencia dixital docente.
En consecuencia, faise necesario un documento que dea resposta a esta realidade social e ás circunstancias que envolven os membros da comunidade educativa deste centro, e inclúa un enfoque da competencia dixital máis moderno e amplo, acorde coas recomendacións europeas relativas ás competencias clave para a aprendizaxe permanente. As necesidades xurdidas a partir da situación que estamos a vivir, fan necesario o desenvolvemento da Competencia Dixital e isto é clave para que, tanto o profesorado como o alumnado, poidan desenvolverse nos novos escenarios, de maneira que o alumnado poida desenvolver as habilidades e competencias do século XXI, e o profesorado poida mellorar e modernizar os procesos de ensino- aprendizaxe.
A inclusión dixital foi un dos obxectivos prioritarios para a elaboración deste documento, para garantir unha educación de calidade inclusiva e equitativa, reducir a fenda dixital (carencia de dispositivos e conectividad) e promover oportunidades de aprendizaxe permanente para todas as persoas.
Este plan dixital será un instrumento que forme parte do Proxecto Educativo, o Proxecto de Dirección, a Programación Xeral Anual e farase alusión ó mesmo no resto dos documentos de centro.
