1.1. Datos básicos do centro
O IES As Telleiras é un centro de ensinanza de carácter público. Foi creado no ano 1985 coa construción dun primeiro edificio, e ampliouse con outros dous novos no ano 1988, un para aulas e outro para utilizar como salón de actos. Foi no ano 1998 cando adquiriu a designación de IES AS TELLEIRAS, sendo ata entón o Instituto de Bacharelato Mixto de Narón.
O centro conta con 3 edificios nos que se reparten as seguintes estancias:
- Edificio principal onde se localizan as aulas de 1o, 2o e 3o ESO, unha aula de Informática, unha aula de desdobre, 4 laboratorios (Bioloxía, Física, Química e Xeoloxía), un taller/aula de Tecnoloxía, aula de Música, aula de Plástica, ximnasio, biblioteca, así como os diferentes despachos dos organismos de dirección, secretaría, orientación,.. e zonas comúns (cafetería, sala de profesorado,..), así como tamén departamentos docentes.
- Edificio secundario onde se localizan as aulas de 4o ESO, e 1o e 2o de BAC, dúas aulasde Informática, tres desdobres e o clube de ciencias.
- Edificio anexo onde se localiza o Salón de Actos, sá de impresión de plástica e aula de audiovisuais.
- Ademais cóntase coa colaboración do Concello para a cesión dun pavillón cuberto.
En canto ao persoal que presta os seus servizos no centro, neste curso 2023-24 contamos con 55 docentes; en canto ao persoal non docente, temos 2 auxiliares administrativos, 3 conserxes e 5 persoas de limpeza.
Órganos constituídos
• Xunta de delegados e delegadas.
• Equipo de Normalización e Dinamización Lingüística.
• Comisión de Coordinación Pedagóxica.
• Xunta de titores e titoras.
• Comisión de autoprotección.
• Comisión de convivencia.
• Comisión económica.
• Coordinadora da biblioteca e responsable do PLAMBE.
• Responsable de Tics e coordinador proxectos Abalar e E-Dixgal.
• Responsable de formación.
A matrícula no presente curso é de 480 alumnos e contamos con tres liñas na ESO, agás en 1ºESO con catro liñas, e catro en bacharelato.
1.2. Contextualización do Plan Dixital no centro. Contribución ao Proxecto Educativo do Centro
O IES As Telleiras é un centro público de ensino dependente da Xunta de Galicia situado no concello de Narón, ao noroeste da provincia da Coruña e pertencente á comarca de Ferrol.
Narón é un dos municipios máis poboados de Galicia. É un municipio mixto, con sete parroquias eminentemente rurais nas que viven menos da cuarta parte da poboación e cun núcleo urbano de máis de 39.000 habitantes formado polos barrios de A Gándara, A Solaina, O Alto do Castiñeiro, Piñeiros, O Couto, Freixeiro e Xuvia, destacando pola súa poboación as catro primeiras. O alumnado ten unha procedencia heteroxénea reflexo do concello onde se atopa. Trátase dun municipio semiurbano de dimensión media, cunha elevada densidade, dinámico, cun importante nivel de actividade no sector industrial aínda que fortemente terciarizado e que presenta unha gran capacidade de atracción migratoria.
Aínda así a maior parte do alumnado que temos no centro é de procedencia galega, e hai escasa incidencia de alumnado doutras etnias e doutras nacionalidades.
O Centro atópase na estrada de Cedeira, afastado do núcleo de poboación e sen transporte público o que dificulta o acceso da comunidade educativa ás súas instalacións fóra do horario lectivo. Este feito inflúe negativamente na participación na vida do centro por parte do alumnado, pois sempre será preciso que sexan transportados polas súas familias se queren participar nalgunha actividade que se faga pola tarde. De aí que a maior parte das actividades realízanse en horario de maña.
No IES AS TELLEIRAS estanse a desenvolver no presente curso varios plans e proxectos de centro:
- Sección europea de lingua inglesa: Conscientes da importancia do aprendizaxe de linguas estranxeiras, o IES As Telleiras participa no plan de potenciación de linguas estranxeiras por medio desta liña. Está organizada por profesorado do departamento de Tecnoloxía en colaboración co de Inglés e dirixida ao alumnado, de Educación Dixital de 3º ESO, e TIC I de 1º de Bacharelato. A aula virtual de 1º BAC, así como o curso E-DIXGAL de 3º ESO conteñen recursos e actividades variadas que empregan, preferentemente, a lingua inglesa.
- Participación no proxecto E-Dixgal: desde o curso 2013-14 no primeiro ciclo da ESO e desde o curso 2021-22 estendido a toda a ESO.
- Plan de mellora das bibliotecas escolares: Este centro forma parte dos seleccionados para desenvolver un plan de mellora de Bibliotecas Escolares. Asemade constituíronse varios Clubes de Lectura, un equipo de apoio á biblioteca escolar e nomeouse unha profesora coordinadora do equipo. Tamén contamos coa aplicación do PLAMBE. Segue en marcha un blog da biblioteca chamado “O blog da Bibliotelleiras” con acceso desde a páxina web.
- Erasmus+ KA2 : Blended Learning, con Hungría, Turquía e Portugal.
- Plan de dixitalización: mediante a creación dun PFPP e tendo presentes as necesidades de formación do profesorado, preténdese mellorar a competencia TIC.
- CP-Inclúe: dous grupos que traballan a igualdade e a integración. Creouse o grupo LGBTelleiras, que está a levar a cabo moitas iniciativas.
- Clube de Ciencias.
A traxectoria do centro no ámbito das novas tecnoloxías podería resumirse así:
• Formación continua do profesorado: desde o curso 2000-2001, neste centro impártense cursos de formación do profesorado relacionados coas TICS, en concreto, coas seguintes temáticas:
- Manexo de ordenadores.
- Traballo colaborativo en Internet.
- Creación e desenvolvemento de espazos didácticos.
- Formación ABALAR.
- Creación e implementación dos libros dixitais na aula.
- Moodle, elaboración de recursos e actividades para a aula virtual.
- Webs dinámicas.
- Formación en E-Dixgal.
- Dixitalización do libro do profesor e do titor.
• Proxecto piloto ABALAR de innovación educativa: desde o curso 2010-2011 ata o presente.
• Proxecto piloto sobre Libros Dixitais: curso 2011-2012.
• Creación da páxina Web do centro: curso 2012-2013.
• Creación do espazo Moodle: curso 2012-2013.
• Cobertura WiFi en todo o centro: curso 2012-2013.
Proxecto E-Dixgal de innovación educativa: curso 2013-2014 ata o presente.
