Xustificación.
A Lei Orgánica 2/2006, do 3 de maio, de Educación, regula diferentes aspectos relacionados coa competencia dixital e a innovación educativa, así no artigo 121 establece que o proxecto educativo do centro recollerá, entre outros aspectos, a estratexia dixital do centro, de acordo co establecido no artigo 111 bis, no que se establece que as Administracións educativas e os equipos directivos dos centros promoverán o uso das tecnoloxías da información e a comunicación (TIC) na aula como medio didáctico apropiado e valioso para levar a cabo as tarefas de ensino e aprendizaxe, utilizando os marcos de referencia da competencia dixital que orienten a formación inicial e permanente do profesorado e faciliten o desenvolvemento dunha cultura dixital nos centros e nas aulas.
O artigo 132 da devandita Lei establece como competencias dos directores e directoras, entre outras, exercer a dirección pedagóxica, promover a innovación educativa e impulsar plans para a consecución dos fins do proxecto educativo do centro; e fomentar a cualificación e formación do equipo docente, así como a investigación, a experimentación e a innovación educativa no centro.
No Plan de Nova Arquitectura Pedagóxica que impulsa a Consellería de Educación, faise unha clara aposta por espazos ao servizo dos proxectos educativos, sobre todo vinculados á transformación dixital e que sexan xeradores de igualdade e de inclusión. Así como, na Estratexia Galicia Dixital 2030 e na Estratexia Educación Dixital 2030 de Galicia, cara a consecución dunha cidadanía dixital plena.
Tratase de promover e garantir o desenvolvemento dun marco de acción que permita acordar e coordinar diversos aspectos que afectan ao uso das tecnoloxías na educación, desde aqueles relacionados con cuestións organizativas, ata outros máis pedagóxicos e propios dos procesos de ensino e aprendizaxe.
Na Resolución do 3 de setembro de 2021, da Secretaría xeral de Educación e Formación Profesional, se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022.
Contextualización.
O Conservatorio Superior de Música de Vigo é un centro público de ensinanzas artísticas superiores, que depende da Consellería de Cultura, Educación, Formación Profesional e Universidades. Ser un centro superior implica que o alumnado é maior de idade, o que afecta aos procesos de organización e funcionamento dos servizos e actividades. Pola súa banda as ensinanzas artísticas tamén presentan unha serie de especificidades que obrigan a deseñar un modelo de organización e funcionamento que vai afectar ás infraestruturas, equipamentos e recursos didácticos e ao seu uso e dispoñibilidade, así como aos procesos de ensinanza e aprendizaxe.
O centro imparte as ensinanzas do grao superior das especialidades de Composición, Interpretación -na que están englobados todos os itinerarios da orquestra sinfónica ademais do Canto, Clave, Guitarra, Instrumentos da Música Tradicional e Popular, Instrumentos da Corda Pulsada do Renacemento e do Barroco, Piano, Viola da Gamba e Violín Barroco-, Musicoloxía, Pedagoxía da Linguaxe Musical e Produción & Xestión.
Ademais da actividade docente, no Conservatorio realízanse diferentes actividades de difusión cultural e de promoción das ensinanzas co obxectivo de completar a formación do alumnado e ampliar a oferta musical a cidadanía: concertos, conferencias, talleres e cursos de especialización.
Cómpre salientar o elevado número de bandas populares e coros na contorna viguesa onde moitos/as alumnos/as reciben unha formación musical inicial. Hai tamén na zona un número importante de escolas de música públicas e privadas. Esta é a base que sustenta un centro coma este.
Ata o de agora non tiñamos un Plan Dixital como tal, pero si se tomaron medidas concretas neste eido segundo as necesidades máis urxentes que se detectaron. Cun problema engadido, a Consellería de Educación non contempla a participación dos Centros Docentes de Réxime Especial (Conservatorios) en ningún dos programas dixitais de innovación: Abalar, Edixgal, Polos Creativos, etc. O que implica non poder acceder a equipos informáticos (asociados a estes programas) máis potentes e actuáis, cunhas características máis axeitadas ás nosas ensinanzas.
Coa Resolución do 3 de setembro de 2021, da Secretaría xeral de Educación e Formación Profesional, temos a oportunidade de redactar un Plan Dixital apropiado a nosa realidade, e incorporalo ao Proxecto Educativo do CSMVIGO. Pensamos que a incardinación deste Plan Dixital á Programación Xeral Anual do curso 2022/23 será algo moi beneficioso para mellorar a competencia dixital da nosa institución.
Proceso de Elaboración
Para o proceso de elaboración do Plan Dixital seguironse tódalas recomendacións e secuencias da Consellería de Educación e do equipo ADIX Vigo 3, ao que estamos adscritos. Dentro do PFPP do centro formouse un grupo de profesores que traballa nisto dende outubro de 2021.
