Xustificación lexislativa:
• Art. 111 bis, Art. 121 e Art. 132 da LO 2/2006, de 3 de maio, de Educación.
• Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021- 2022.
• Artigo 30.1 do DECRETO 150/2022, do 8 de setembro, polo que se establece a ordenación e o currículo da educación infantil na Comunidade Autónoma de Galicia.
• Artigo 15 da ORDE do 30 de maio de 2023 pola que se desenvolve o Decreto 150/2022, do 8 de setembro, polo que se establece a ordenación e o currículo da educación infantil na Comunidade Autónoma de Galicia e se regula a avaliación nesa etapa educativa.
• Artigo 34.1 do DECRETO 155/2022, do 15 de setembro, polo que se establecen a ordenación e o currículo da educación primaria na Comunidade Autónoma de Galicia.
• Artigo 14 da ORDE do 26 de maio de 2023 pola que se desenvolve o Decreto 155/2022, do 15 de setembro, polo que se establecen a ordenación e o currículo da educación primaria na Comunidade Autónoma de Galicia e se regula a avaliación nesa etapa educativa.
O C.R.A. de Rianxo está formado actualmente por oito escolas repartidas por cinco das seis parroquias que compoñen o Concello de Rianxo cun total de once aulas. No catálogo do centro, catro destas escolas teñen carácter multigrado, agrupando alumnado do segundo ciclo de Educación Infantil e alumnado de 1o e 2o de Educación Primaria na mesma aula. Este curso en catro destas escolas non hai matriculado alumnado da etapa de Educación Primaria, funcionando na práctica como aulas multigrado de Educación Infantil. Dúas escolas están compostas exclusivamente por alumnado do segundo ciclo de Educación Infantil, cun total de tres aulas multigrado. As dúas escolas restantes presentan o alumnado de Educación Infantil e Educación Primaria agrupados por etapa educativa. Polo tanto, nestas escolas hai dúas aulas (unha de Educación Infantil e outra de Educación primaria).
As escolas contan con conexión a Internet e un ou varios encerados dixitais.
A integración destas novas tecnoloxías ten que facerse buscando, investigando, indagando... sobre todas aquelas posibilidades que ditas tecnoloxías nos ofrecen á hora de dar una nova dimensión ao proceso educativo redefiníndoo nun novo marco de coñecemento que sirva como motivación ao noso alumnado á hora de prepararse para explorar, experimentar... en busca do coñecemento no que todos os días traballamos mestres e alumnos/as.
A pesar de ter invertido tempo en formación e prácticas con ferramentas tecnolóxicas, constatamos unha gran diferenza de coñecementos TIC no profesorado do centro. Isto leva aparellado que non nos propoñamos grandes retos, senón acadar unha normalización no eido das tecnoloxías como ferramentas útiles para lograr unha mellor calidade pedagóxica. Por este motivo neste curso académico será preciso ofertar formacións centradas nas necesidades reais máis inmediatas:
• Manexo avanzado da web do centro(Websdinámicas-Drupal).
A utilización das TIC na aula supón un cambio importante no papel do profesorado e do alumnado, na organización dos tempos e na metodoloxía. Os efectos pedagóxicos das TIC dependen da planificación didáctica realizada e das actividades que desenvolvamos coa mesma.
O Plan Dixital virá a intentar mellorar a Competencia Dixital do alumnado e intentar compensar calquera desigualdade polon feito de vivir nunha zona de tipo rural, aínda que non deprimida economicamente.
Este Plan Dixital pasará a formar parte do Proxecto Educativo e da Programación Xeral Anual, introducindo cambios significativos na práctica docente, nos contidos das distintas materias e guiando algúns dos procesos de aprendizaxe.
Proceso de elaboración:
A elaboración do Plan Dixital recaeu sobre o Equipo de Dinamización do Plan Dixital xunto coas persoas que forman o Equipo TICs, tal e como se indica na resolución do 3 de setembro de 2021. Para a creación do antes citado Equipo de Dinamización, nomeouse unha persoa coordinadora a cal foi a encargada de informar a todo o equipo sobre as tarefas a realizar no curso de Aula Virtual no que foi matriculada.
Neste curso (https://www.edu.xunta.gal/centros/plandixital/aulavirtual/), realizouse o seguimento de todas as actividades que se foron levando a cobo ao longo do curso e que culminaron coa elaboración deste documento.
Estas tarefas secuenciaronse en 2 fases:
Nesta primeira fase realizáronse varias tarefas de análise, entre elas a preparación e elaboración do SELFIE (do 3 de outubro ao 8 de novembro do 2021)(ANEXO 1: Informe SELFIE), realización do profesorado en Fprofe do Test de Competencia Dixital Docente (CDD) (do 8 de febreiro ao 7 de marzo do 2022) (ANEXO 2: Informe test CDD)
Para levar a cabo a diagnose, elaboramos o documento DAFO (do 8 marzo ao 4 de abril do 2022) (ANEXO 3: DAFO) para o cal tivemos, xunto co grupo de PFPP do Plan Dixital, unha formación a través do CAFI, impartida pola Mentora ADIX da nosa zona (1 sesión de 2 horas).
-
Fase II: Deseño e elaboración do Plan Dixital.
A primeira tarefa desta segunda fase foi a elaboración dos obxectivos do Plan de Acción (do 21 de abril ao 11 de maio) (ANEXO 4: Plan de acción), para a cal tivemos unha segunda formación (1 sesión de 2 horas) e para finalizar o curso, estamos a levar a cabo a redacción deste docuemtno, o Plan Dixital de Centro (do 11 de maio ao 12 de xuño) (ANEXO 5: PDs do CRA de Rianxo con especificacións por escolas)
