Datos básicos do centro
IES LUÍS SEOANE
Rúa Luxemburgo
ies.luís.seoane@edu.xunta.gal
http://iesluisseoane.org
Este curso 2021-22, o IES Luís Seoane conta con 84 profesores/as e 1.062 alumnos e alumnas nas seguintes etapas educativas (ESO, Bacharelato e FP de réxime ordinario e adultos presencial, distancia e Dual (Familias Profesionais de Administración e Xestión, Comercio e Márketing).
Contextualización do Plan Dixital no centro. Contribución ao Proxecto Educativo do Centro
En Resolución do 3 de setembro de 2021, a Secretaría xeral de Educación e Formación Profesional, estableceu a necesidade da elaboración e implementación do plan dixital de centro para o curso 2021-22 co fin de lograr a transformación dixital dos centros educativos converténdoos en organizacións “dixitalmente competentes nos procesos de ensino aprendizaxe, de xestión e de relación” para o que se precisaría “un proceso de mellora das competencias dos membros da comunidade educativa.
O Plan dixital do centro debe ser o instrumento e a plasmación desta transformación dixital recollendo os obxectivos e as accións encamiñadas a súa obtención xunto cos instrumentos de avaliación e diagnose que permitirían a valoración dos resultados e, no seu caso, as modificacións das actuacións e propostas de mellora.
Breve xustificación do mesmo
A transformación dixital da nosa sociedade é un feito incuestionable que está afectando a todas as esferas da nosa vida, desde as relacións sociais ás económicas. Sen embargo, a pandemia da COVID-19 puxo de manifesto que a escola non estaba perfectamente adaptada a esta nova realidade, os confinamentos, as corentenas, a necesidade de levar á práctica sistemas de ensinanza híbridos supuxeron un desafío dramático para docentes, alumnos e familias. Afloraron diversas eivas derivadas tanto das limitadas capacidades dixitais do profesorado, como das de acceso ás tecnoloxías de parte do alumnado. O reto vivido serviu como catalizador para a concienciación da necesidade de implementar novas formas innovadoras de actividades de ensino-aprendizaxe que incorporen unha adaptación da escola ao cambio dixital.
A misión dun centro educativo debe ser a de contribuír á igualdade social, e a educación dixital é un importante vector de igualdade de oportunidades. A transformación dos sistemas de educación e formación deben garantir a adquisición de competencias dixitais é facer que o alumno sexa o actor do seu proxecto formativo e profesional. Ao tempo, o dixital permite a utilización de novas prácticas docentes máis lúdicas, diversificadas e colaborativas.
O Plan dixital do centro é a base sobre a que se sosterá esta transformación dixital.
