O plan dixital do CEIP San Ramón é unha ferramenta de planificación integrada no Proxecto Educativo que ten por obxecto o tratamento da información e competencia dixital e a integración das TIC como ferramenta didáctica nos procesos de ensino-aprendizaxe.
Hoxe en día, é primordial o dominio das ferramentas básicas destas novas tecnoloxías así como a análise das vantaxes e inconvintes do seu uso dende a perspectiva educativa.
Para conseguir que a incorporación plena das TIC no centro sexa útil na mellora do proceso de ensino aprendizaxe, é necesario adoptar unha serie de medidas que van máis aló da simple dotación de recursos e deben ir acompañadas da formación do profesorado , alumnado e familias así como da elaboración de materiais en distintos soportes para lograr un óptimo resultado. Esta é a razón pola que o noso PD vai dirixido a toda a comunidade educativa.
Tal e como se contempla no PEC do centro, tentamos buscar a integración e igualdade de oportunidades para o noso alumnado. Trazamos accións que favorezan o desenvolvemento das competencias básicas. Os nosos sinais de identidade son: pluralismo e valores democráticos, coeducación, integración, respecto e tolerancia, apertura, educación para a paz e a non violencia, flexibilidade, valoración do esforzo e integración de metodoloxías activas.
Dende hai xa 5 anos traballamos co proxecto E-Dixgal en 5º e 6º de primaria. Mercamos tablets, pantallas grandes táctiles, pantallas dixitais, routers para mellorar a conexión destes dispositivos,.. Todo isto, cremos que facilita a aprendizaxe colaborativa, a autonomía persoal, o aprender a aprender e a atención á diversidade de xeito máis equitativo.
O acceso a estas ferramentas TIC implicou a formación docente e discente: cursos técnicos, charlas sobre privacidade e seguridade, etc..
Nos derradeiros cursos, o centro implicouse en varios programas e proxectos co fin de estimular o uso das TIC na mellora da calidade do centro: Proxecto Digicraft, Misión Alba, Programa D´Tec do CIXTEC, PLAMBE, Biblioteca Creativa, Plan Proxecta etc
O centro dinamiza o seu funcionamento complementando as actividades diarias con outras como concursos a través da páxina web e blogue do centro, publicación de actividades a través da súa canle youtube e facebook.
Por último mencionar que todo isto explicado con anterioridade pon de manifesto que o uso das TIC no noso centro forma parte ineludible da programación xeral anual, ocupando un papel importante na mesma.
O novo currículo de educación primaria introduce un marco legal que concede un carácter preceptivo ao uso das TIC máis aló do propio fenómeno social, económico ou cultural no que nos atopamos. A competencia do tratamento da información e a competencia dixital consiste especialmente en dispoñer de habilidades para busca, obter, procesar e comunicar información e transformala en coñecemento.
O dominio e alfabetización TIC son a día de hoxe unha técnica instrumental imprescindible que repercute nas competencias restantes, con especial impacto na competencia en comunicación lingüística, na competencia social e cidadá e na competencia para aprender a aprender.
O Plan Dixital de centro é un instrumento de planificación que está integrado no Proxecto educativo. Pretende o desenvolvemento da competencia dixital da comunidade educativa, promover a innovación e sacar o máximo partido das tecnoloxías da información e dos recursos dixitais. Neste plan preténdese a participación de toda a comunidade educativa, de modo que se converta nun “Proxecto Compartido”.
Por outra banda, o uso xeneralizado de ditas tecnoloxías da información e comunicación en todos os aspectos da vida cotiá provocaron cambios profundos na sociedade, pero tamén na maneira de aprender ao longo da vida, na cultura, na convivencia democrática, … Todo isto fai preciso que o sistema educativo responda á nova realidade social e introduza un novo enfoque da competencia dixital máis moderno e amplo, acorde co resto de Europa que permita mellorar os proceso de ensino-aprendizaxe.
Por todo isto, é necesaria a elaboración deste plan como documento de referencia que recolla e regule todos os aspectos relativos a dita transformación dixital no centro.
Tentamos elaborar un Plan Dixital adaptado ás necesidades, circunstancias e características do noso centro educativo. No centro elaboramos este Plan Dixital de maneira consensuada entre todo o profesorado, guiados polo coordinador do Plan, a coordinadora Edixgal e o equipo de dinamización das TIC. Da mesma maneira creamos un grupo de traballo onde participábamos 7 mestres sobre esta temática.
