1.Contextualización do Plan Dixital no centro.Contribución ao Proxecto Educativo do Centro.

O alumnado do centro procede de barrios de gran tradición na cidade: Sta. María, S. Roque, A Moureira... As familias viven nos edificios da zona, convivindo algúns cós avós e ás avoas. As profesións e oficios das nais e pais son variadas, a meirande parte traballadores e traballadoras do sector terciario.

Cabe salientar que existe unha porcentaxe significativa de familias con estudos superiores. Aproximadamente un 55% de nais e pais participan na ANPA.

Este Plan Dixital axudará a vertebrar gran parte do traballo que xa se viña realizando no centro, incrementado aínda máis nestes últimos anos pola ensinanza a distancia derivada da situación COVID-19.

Antes da realización do Plan Dixital o centro xa contaba con PDI en todas as aulas, aula virtual, participación no proxecto E-Dixgal, participación no proxecto E-Twinning, PLAMBE, robótica en infantil, Plan Acción Titorial, Plan Atención á diversidade.

Coa realización do PD pretendemos atallar as dificultades coas que nos viñamos atopando nos anteriores cursos académicos en relación co traballo dixital. A través deste, organizaremos e planificaremos o traballo para resolver as diferentes dificultades que identificamos, comezando polas escollidas para afrontar no curso 2022-2023, que estarán tamén reflexadas na Programación Xeral Anual.

2. Breve xustificación do mesmo

A lexislación principal na que se basea a elaboración do presente documento é:

• Art. 111 bis, Art. 121 e Art. 132 da LO 2/2006, de 3 de maio, de Educación.
• Disposición adicional quinta da Resolución do 17 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento das ensinanzas de EI, EP, ESO e bacharelato no curso académico 2021- 2022
• Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022

 3. Proceso de elaboración

O equipo está formado por Cristian Castro Maquieira, coordinador do equipo; Pedro M. Mariño Rivadulla, director do centro; e Ana María Fragueiro Blanco, titora.

Cabe destacar que contamos coa prezada axuda de César Vales, asesor Adix do noso centro.

Pasos na elaboración do PD:

1º Análise da situación do centro a través do cuestionario SELFIE.

2º Análise da competencia dixital docente.

3º Análise DAFO para detectar necesidades.

4º Creación do Plan de Acción para o curso 2022-23.

5º Redacción do Plan Dixital.

O Plan Dixital que presentamos ten vocación de ser un elemento dinámico que acompañe a vida do centro e que sirva como referencia dos diferentes proxectos e procesos que se van desenvolver no proximo curso. Para dotalo dese dinamismo é preciso planificar un sistema de revisión, avaliación e feedback que nos vai permitir facer os axustes e correccións necesarios en cada momento do proceso. O equipo de dinamización do plan dixital será o encargado de levar a cabo os procesos de avaliación, tendo sempre en conta as aportacións dos diferentes ciclos e do profesorado tomado de xeito individual. O equipo de dinamización do Plan Dixital reunirase con carácter xeral unha vez ao trimestre para facer un seguemento do proceso de implementación do plan, fará finalmente unha avaliación final do Plan Dixital no seu conxunto.

Para avaliar o PD realizarase:
• Unha avaliación procesual unha vez ao trimestre no que se valorará: estado da execución das accións, a análise e valoración dos resultados e, de ser o caso, as posibles modificacións das accións e as propostas de mellora.
• Unha avaliación final ao remate do curso académico no que se valorará a valoración do logro dos obxectivos e as propostas de mellora oportunas.

Os obxectivos e accións previstas no Plan Dixital cumpríronse nun 92% das e consideramos que a avaliación do mesmo foi satisfactoria. Completáronse un total de 12 accións das 13 totais de que consta o Plan dixital aprobado polo claustro (AO01.3: Enquisa para comprobar o uso da ferramenta Abalar que non se puido realizar). Unha delas A.O.04 referida ao obxectivo 2 (creación de contidos dixitais na AV de en 3º e 4º de EP unha vez ao mes) foi acadada parcialmente (unha vez ao trimestre).

Tanto os obxectivos e accións contempladas no plan como as accións dos mesmos foron acadadas na maioría dos casos e cun grado de implicación por parte da comunidade educativa satisfactorio.

De cara ao vindeiro plan dixital, cremos oportuno manter o obxectivo número 3 relacionado coa "mellora da proteción de datos do centro" e consideramos que sería necesario facer extensiva a formación na mesma a toda a comunidade educativa.

Tamén cremos que debemos seguir facendo fincapé en aumentar o uso das aulas virtuais en 1º e 2º ciclo.

Do mesmo xeito, consideramos que debido a gran cantidade de material tecnolóxico novo chegado ao centro, deberemos manter unha liña formativa para aumentar a competencia dixital docente neste eido.

En canto á comunicación e difusión no Plan Dixital, poderemos atopar o mesmo publicado na páxina web do centro na seguinte ligazón:

• http://www.edu.xunta.gal/centros/ceipfroebel/?q=system/files/CEIPPluriling%C3%BCeFroebel_PlanDixital-V1.0_07062022.pdf