O CIFP Montecelo é un centro educativo de titularidade pública, situado no lugar de Montecelo, dentro da parroquia pontevedresa de Mourente, que leva impartindo formación profesional dende hai máis de 40 anos a alumnado de Pontevedra e de toda a súa comarca. No centro están autorizados Ciclos de Formación Profesional de Grao Básico, Medio e Superior, polo cal atopamos gran heteroxeneidade de intereses e casuísticas. Así, nos ensinos non obrigatorios, non adoita haber  problemas de convivencia mais existe bastante diversidade en canto á idade (cada vez evidénciase máis a presenza de alumnado adulto), motivación e poboación de procedencia, aínda que o alumnado predominante ten entre 18 e 22 anos e reside na comarca de Pontevedra. En canto á FP de grao Básico o alumnado pode englobarse nalgunha da seguintes características: alumnado que non acadou os obxectivos da Educación Secundaria Obrigatoria (cerca da metade con 15 anos), alumnado con necesidades educativas especiais, internos na Cidade Infantil ou de procedencia estranxeira e proceden de diversos centros educativos, normalmente da provincia de Pontevedra.
Entre os principios do centro destacados no Proxecto Educativo, o Plan Dixital vai contribuir a acadar infraestruturas ben dotadas e tecnoloxías modernas acordes ó sector produtivo, que permitirán formar persoas para un mundo globalizado e cambiante, así como favorecer a integración dos colectivos máis desfavorecidos.

Na procura de asociacións multilaterais con centros da UE que permitan intercambiar experiencias, aprender linguas estranxeiras e coñecer outros sistemas educativos, o centro dispón desde 2014 da acreditación de Carta Erasmus, polo que o alumnado e persoal poden realizar mobilidades e prácticas en empresas da UE. Así mesmo, o centro solicitou no 2021 a súa incorporación a FPempresa (Rede de centros de empresas relacionadas coa FP a nivel estatal), e anualmente busca alianzas con centros con intereses comúns para ser partícipe de todas aquelas iniciativas que redundan nun beneficio para os intereses do alumnado. Destacar os continuos proxectos de colaboración con entidades sen ánimo de lucro como Amencer-ASPACE ou Xuntos Pontevedra. Estase a desenvolver o programa de innovación educativa Polos Creativos, zonas dotadas dixital e tecnoloxicamente para desenvolver proxectos colaborativos, e neste curso concedeuse o programa Espazos de tecnoloxía aplicada, para a conversión de aulas tradicionais.

O Plan Dixital vai contribuir á consecución dos correspondentes obxectivos do Plan Xeral Anual.A Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022, establece as medidas de actuación relativas ao deseño, elaboración e implementación do Plan Dixital para o curso 2021-2022, en base aos seguintes principios e obxectivos:

1. Principios.
a) Resposta á realidade social resultante do uso xeneralizado das tecnoloxías de información e comunicación en múltiples aspectos da vida cotiá.
b) Enfoque cara unha comprensión integral do impacto persoal e social da tecnoloxía e unha reflexión ética acerca da relación entre tecnoloxías, persoas, economía e medio ambiente.
c) Transformación dixital que inclúa unha visión da competencia dixital máis moderna e ampla, acorde coas recomendacións europeas relativas ás competencias clave para a aprendizaxe permanente.
2. Obxectivos:
a) Facilitar a integración e o desenvolvemento das tecnoloxías dixitais nos procesos formativos e optimizar a xestión dos recursos humanos e materiais do centro.
b) Promover o uso das ferramentas de avaliación e diagnose dos centros educativos respecto á competencia dixital.
c) Mellorar a competencia dixital dos membros da comunidade educativa para transformar os centros en organizacións educativas dixitalmente competentes nos procesos de ensinoaprendizaxe, de xestión e de relación.
d) Definir o equipo responsable de dinamización do Plan Dixital e a súas funcións.
O referente de cara a elaboración do Plan Dixital foi o Marco Europeo de Organizacións Dixitalmente Competentes (DigCompOrg), que dispón que a transformación dixital dos centros educativos atenderá ás tres dimensións (pedagóxica, tecnolóxica e organizativa) e propón unha análise do centro baseado en sete elementos: Infraestrutura, Liderado e Gobernanza, Ensino e Aprendizaxe, Desenvolvemento Profesional, Avaliación, Contidos e Currículo, así como Redes de Apoio e Colaboración.

Constituiuse o Equipo de Dinamización do Plan Dixital en setembro de 2021 e no primeiro trimestre realizáronse as primeiras tarefas de análise da situación do centro en relación coa competencia dixital mediante as seguintes ferramentas: Informe SELFIE e Test de Competencia Dixital Docente (TCDD). Tendo en conta o informe SELFIE, o informe global do centro xerado a partir dos resultados individuais no TCDD e o coñecemento da situación do instituto nos últimos cursos, o equipo elaborou unha análise diagnóstica da competencia dixital mediante un informe DAFO (Debilidades, Ameazas, Fortalezas e Oportunidades), detallando as seguintes categorías:
-Internas: infraestrutura-equipamento, persoal docente, persoal non docente, alumnado, familias, oferta e organización de centro.
-Externas: administración educativa, lexislación, ANPA, contorna e outras entidades.

O DAFO elaborado compartiuse a través  da aula virtual, abríndose un período para a aportación de ideas por parte de todo o profesorado mediante a actividade Board de Moodle, desta maneira o equipo de dinamización do Plan Dixital puido elaborar as táboas de obxectivos e accións a partir das necesidades detectadas polo conxunto da comunidade educativa, e configurouse o plan de acción para os próximos cursos mediante ferramentas de traballo colaborativo en rede. Englobando todo o material nun único documento elaborouse este Plan Dixital de centro.

De cara a realizar o seguemento e avaliar o desenvolvemento do Plan Dixital compre diferenciar:
-Avaliación procesual, realizarase mensualmente polos responsables de cada unha das accións dos obxectivos indicados no plan, nunha reunión convocada pola persoa coordinadora do PD na que se comprobara o estado de execución de cada unha das tarefas proxectadas e emitirase un informe coa valoración dos resultados, xunto coas posibles modificacións, propostas de mellora e a planificación do mes seguinte.
-Avaliación final, realizarase ao finalizar cada curso escolar analizando o logro dos obxectivos do plan de acción de ese período e recollendo as suxerencias de mellora por parte de toda a comunidade escolar, a partires dos datos recollidos procederase a elaborar o plan de acción do seguinte curso.

A valoración xeral do desenvolvemento deste plan no curso 2023/24 é positiva pois conseguiuse avanzar tanto na incorporación de novo equipamento tecnolóxico, como na adecuación dos espacios e no interese do profesorado pola formación no ámbito dixital e no emprego e desenvolvemento de recursos dixitais para aula.

Todo este esforzo está a dar os seus froitos, pois xa se aprecia unha maior autonomía no emprego das tecnoloxías educativas e unha evolución nas competencias dixitais do alumnado, así a aula virtual está consolidada como ferramenta de uso diario nas aulas, non só como banco de recursos senón tamén como elemento dinamizador de metodoloxías activas e facilitador do desenvolvemento dunha avaliación formativa continua que axuda aos estudiantes a identificar as súas  fortalezas e áreas de mellora.

De todas formas, aínda queda moito traballo por realizar para involucrar a toda a comunidade educativa na resolución de pequenos problemas técnicos e para optimizar o emprego de todos os recursos dispoñibles. Progresar nestes aspectos só será posible si se dispón dun grupo de persoas coordinadas entre sí e da implicación do equipo directivo, e deste xeito continuar coas liñas de mellora propostas para próximos cursos.

Entre as propostas de mellora a abordar dentro do Plan dixital cabe destacar:

-Manter máis contacto directo co profesorado, titores e alumnado para ser máis consciente das necesidades prioritarias.

-Elaborar unha planificación mensual máis exhaustiva que permita ter presente en cada momentos as accións de cada obxectivo a abordar.

-Ser máis realista nos tempos necesarios para a posta a punto dos equipos e dos problemas coa rede, e mellorar a coordinación coa empresa de mantemento para axilizar os procesos.

Este Plan Dixital de centro presentarase no Claustro e aprobarase Consello social, pode ser consultado na páxina web do centro e facilitarase a ligazón ao mesmo a través do correo electrónico para o profesorado e mediante abalarMóbil ás familias.