1.1. Datos básicos do centro
O colexio de Becerreá está situado na capitalidade do Concello, que se atopa no sector oriental da provincia de Lugo, na comarca dos Ancares, a unha distancia de 42 km de Lugo.
O CEIP Plurilingüe San Xoán está situado na rúa Castelo s/n, municipio de Becerreá, provincia de Lugo.
Ao ser un CEIP as etapas educativas abarcan dende 4º de Ed. Infantil ata 6º de Ed. Primaria. Contamos cunha plantilla de 17 mestres, dous deles itinerantes para un total de 150 alumnos/as.
O código do centro é o 27000629. A dirección de correo electrónico é ceip.sanxoan@edu.xunta.gal. Teléfono de contacto: 982 82 81 62/63/64
Para consultar calquera outra información, pode consultar a nosa páxina web que está en continua actualización http://www.edu.xunta.gal/centros/ceipsanxoan/.
1.2. Contextualización do Plan Dixital no centro. Contribución do PD ao Proxecto Educativo do Centro
O Concello de Becerreá conta cunha poboación de 2.800 habitantes, distribúese en 26 parroquias con 112 aldeas ou núcleos de poboación, o que nos dá unha idea da grande diseminación da poboación, polo tanto é unha das densidades de poboación máis baixas de Galicia (17 hab/Km2). A causa desta dinámica demográfica radica no forte éxodo rural e a emigración e evidenciase nun crecemento vexetativo negativo e nun elevado índice de envellecemento.
As características do medio físico unidas a outras de carácter demográfico e socioeconómico (despoboamento e envellecemento) producen un paulatino abandono das terras de labor que inflúen de forma negativa na base da súa economía: a agricultura e a gandería. En consecuencia, ditas características favorecen a presenza de zonas con fenda dixital no noso Concello.
A industria é escasa (derivados de madeira e gando). Predomina o comercio polo miúdo, de estrutura familiar e pouca especialización, que se limita a satisfacer as necesidades máis elementais dos veciños.
A situación económico-social xeral das familias do alumnado é de base agraria e de traballo temporal, principalmente na construción. A maioría das familias conviven con tíos ou avós, contribuíndo a economía familiar.
A situación que vivimos durante o ano 2020, obrigou a desenvolver a labor docente de forma telemática, favorecendo o desenvolvemento da competencia dixital de toda a comunidade educativa.
Para dar resposta ás necesidades detectadas, púxose en marcha unha formación para a elaboración do Plan Dixital, específico para cada centro, concretando as medidas para poder levar unha resposta dixital axustada á realidade de cada centro.
Este Plan actúa como nexo cos diversos Plans e Proxectos nos que participamos, xa que vai ter un papel fundamental no desenvolvemento de todas as actividades programadas: EDLG, plurilingüísimo, PLAMBE, Proxecta, PFPP... e todos aqueles que se aproben de cara o vindeiro curso escolar que se inclúen na PXA.
1.3. Breve xustificación do mesmo
Este plan xustifícase seguindo a normativa vixente:
§ Art. 111 bis, Art. 121 e Art.132 da LO 2/2006, de 3 de maio, de Educación
§ Disposición adicional quinta da Resolución do 17 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento das ensinanzas de EI, EP, ESO e bacharelato no curso académico 2021-2022
§ Disposición adicional terceira da Resolución do 18 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento dos ciclos formativos de FP do sistema educativo no curso 2021- 2022
§ Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022
2. Proceso de elaboración
A elaboración de dito Plan estivo asesorado polo PFPP L2131121 – “Análise da competencia dixital do centro e elaboración do Plan Dixital”, xunto co Equipo ADIX da zona.
Unha vez creado o Equipo para a formación, elaboramos unha enquisa inicial para comprobar o nivel de competencia dixital no profesorado e no alumnado de 5º e 6º de Ed. Primaria, participantes de EDIXGAL.
Da análise dos resultados obtidos da enquisa (SELFIE e Test CDD), identificáronse as liñas de acción e plans estratéxicos que son necesarios para acadar os obxectivos da nosa organización, é dicir, debilidades, ameazas, fortalezas e oportunidades ou o que é o mesmo, o Informe DAFO.
En base ao informe DAFO, propuxéronse os obxectivos que forman parte do Plan de Acción.