- Xustificación do Plan Dixital en relación coa normativa vixente
A relevancia do desenvolvemento deste plan vese reflectida na lexislación vixente, onde atopamos numerosos exemplos, como poden ser:
- Art. 111 bis, Art. 121 e Art. 132 da LO 2/2006, de 3 de maio, de Educación
- Disposición adicional quinta da Resolución do 17 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento das ensinanzas de EI, EP, ESO e bacharelato no curso académico 2021-2022
- Disposición adicional terceira da Resolución do 18 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento dos ciclos formativos de FP do sistema educativo no curso 2021- 2022
- Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022
- Contextualización do PD no centro e contribución ao Proxecto Educativo
O IES da Terra Chá, José Trapero Pardo, atópase situado na vila de Castro Ribeiras de Lea (Castro de Rei, Lugo). En xeral a Terra Chá, e en particular esta vila, son zonas esencialmente rurais, cunha renda per cápita media-baixa e cun nivel de formación académica tamén baixo.
En parte debido a estas características, o nivel de dixitalización e de manexo das TIC é baixo. Por unha banda, os habitantes dos pobos aos que lles corresponde este centro non contan coa infraestutura necesaria para favorecer o uso das TIC (deficiencias na velocidade de internet, fundamentalmente); isto sumado ás baixas rendas, fai que a adquisición de equipos TIC sexa complicada. Por outra banda, e como consecuencia do anterior, o nivel de formación TIC vese afectado, xa que non se aprende o que non se pode acadar.
O Plan Dixital tamén está moi relacionado coa Programación Xeral Anual (PXA) do IES da Terra Chá, xa que como se indica no documento, algúns dos obxectivos do centro é a integración das TIC no día a día, facer de internet unha ferramenta básica na Competencia de Aprender a Aprender, e entender que as novas tecnoloxías son unha parte fundamental na nosa vida, polo que hai que cooñecelas e empregalas, sendo conscientes dos riscos que poden traer consigo.
Cabe destacar, polo tanto, que o Plan Dixital é unha ferramenta que serve para achegar as novas tecnoloxías ao noso centro, tendo en conta as circunstancias nas que o mesmo se atopa (principalmente debido a razóns socioeconómicas), e os obxectivos que se definen no plan de acción (punto 3.1) están enfocados a solventar certas carencias básicas co fin de poder ampliar e mellorar o uso das TIC por parte de toda a comunidade educativa que forma parte do centro. Unha vez solventadas as carencias de base, poderase ampliar o espectro de mellora nos vindeiros cursos.
- Proceso de elaboración
Para a realización do Plan Dixital, o primeiro que se fixo foi formar un equipo de dinamización do mesmo. Tras unha primeira reunión inicial (na que se tomaron decisións en canto ao funcionamento e se concretou o test SELFIE), tivemos dúas formacións, unha sobre o DAFO e outra sobre o Plan de Acción. Estas tarefas realizáronse nas dúas xuntanzas seguintes -unha para cada actividade- ata acadar o resultado final.
