1. INTRODUCIÓN
A Lei Orgánica 2/2006 do 3 de maio de Educación regula diferentes aspectos relacionados coa competencia dixital e a innovación educativa. No seu artigo 121 establece que o proxecto educativo do centro recollerá a estratexia dixital do centro de acordo co establecido no artigo 111 bis, no que se cita que as Administracións educativas e os equipos directivos dos centros promoverán o uso das tecnoloxías da información e a comunicación (TIC) na aula como medio didáctico apropiado para levar a cabo as tarefas de ensino e aprendizaxe, utilizando os marcos de referencia da competencia dixital que orienten a formación inicial e permanente do profesorado e faciliten o desenvolvemento dunha cultura dixital no centro e nas aulas.
O Plan Dixital (PD) persegue a transformación dos centros educativos como organizacións dixitalmente competentes nos procesos de ensino-aprendizaxe, de xestión e de relación, o cal require dun proceso de mellora das competencias dos membros da comunidade educativa. A transformación dixital permite o fomento da excelencia, a universalidade e a equidade na educación, eliminando as brechas sociais e territoriais, incentivando a formación continua, apostando polo talento, promovendo a innovación e reforzando a investigación.
A integración das TIC busca ser un instrumento de autonomía do conservatorio que vai a provocar a adaptación das propostas educativas ás características do contexto e que afectará a todos os ámbitos do centro e a toda a comunidade educativa. A través do noso PD transformaremos o noso centro mediante o establecemento de obxectivos a curto, medio e longo prazo para que ese cambio se faga de xeito progresivo. Este plan pretende ser un documento aberto e flexible que conseguirá a adaptación do conservatorio a unha realidade tecnolóxica cambiante da que non podemos estar desconectados.
O noso PD contribuirá ao desenvolvemento do proxecto educativo do centro tendo en conta que a nosa situación de partida no ámbito das TIC é mellorable. Para garantir a actualización permanente do noso PD, a súa revisión e modificación será continua a través da observación sistemática do nivel de alcance dos obxectivos formulados.
1.1. Datos básicos do centro
O Cmus Profesional Melide é un centro público de titularidade municipal localizado na Praza das Universidades da vila de Melide (A Coruña). No conservatorio impártense as ensinanzas de música de grao elemental e de grao profesional reguladas na Lei Orgánica 2/2006, do 3 de maio, de Educación. Atendemos a un número variable de alumnas e alumnos que non superan as 100 matrículas de ensinanzas regradas de música e contamos cun claustro composto por 13 profesoras/es. Non dispoñemos de páxina web. Os nosos datos de contacto son:
• Correo electrónico: cmus.profesional.melide@edu.xunta.gal
• Teléfono: 981 507 929
1.2. Contextualización do PD no centro
O Cmus Profesional Melide atópase emprazado nun contexto urbano pero cun núcleo de poboación reducido de menos de 10.000 habitantes, xa que a vila de Melide está situada xeograficamente no interior de Galicia. Este centro da cabida a alumnado provinte dos concellos da comarca e incluso a algúns que se desprazan da comarca da Ulloa.
O contexto cultural que o rodea ofrece diferentes actividades musicais ofertadas pola propia entidade local e os concellos próximos nas que se programan tanto música tradicional e popular como música clásica. Existe en Melide e na súa comarca unha gran tradición musical (corais, bandas de música e grupos de música tradicional) que favorece o estudo destas ensinanzas musicais. Dispoñemos de infraestruturas culturais para a realización de concertos e actividades musicais. Ademais, no propio conservatorio hai un auditorio no que se programan distintas actividades tales coma audicións, conferencias e concertos de música de maneira máis frecuente durante o curso escolar.
A maioría das/os nosas/os clientes pertencen a familias de clase socio-económica media, aínda que tamén contamos con algunha familia con rendas de exclusión social.
1.3. Contribución do PD ao proxecto educativo de centro
Centrándonos no contexto escolar, este PD pretende constituír un documento que reforce a formación dixital recollida nas distintas programacións didácticas de aula e no noso proxecto educativo. Isto pode verse reflectido nas programacións das materias que máis se relacionan co desenvolvemento e uso das TIC, como Novas Tecnoloxías aplicadas á música, Informática musical, Técnicas de composición aplicadas á didáctica ou Musicoloxía, as cales contribúen á formación dixital e tecnolóxica máis actual. Tamén empregamos as TIC para desenvolver os procesos de ensino e aprendizaxe das materias de Linguaxe musical, Educación auditiva e vocal, Historia da música e Análise, ademais de ter un uso habitual nas clases das especialidades instrumentais.
Este PD pretende ser un punto de partida para que o centro favoreza e impulse o uso de medios dixitais tanto nos procesos de ensino-aprendizaxe coma no resto de procesos de xestión do centro, organización, comunicación e avaliación.
1.4. Breve xustificación do PD
A xustificación deste PD do noso conservatorio basease na seguinte normativa lexislativa:
• Art. 111 bis, Art. 121 e Art.132 da Lei Orgánica 2/2006 de 3 de maio de Educación.
• Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022.
1.5. Proceso de elaboración
No mes de abril de 2024 comézase coa elaboración do presente PD. Nun primeiro momento, e despois dunha reunión do director do conservatorio co coordinador do equipo Adix Santiago 2, levouse a cabo o SELFIE por parte do equipo directivo, do profesorado e do alumnado maior de 8 anos de idade do centro. Non se levou a cabo o test CDD seguindo as instrucións recibidas. Despois de estudar os resultados do SELFIE, elaboramos o DAFO e establecemos os obxectivos a conseguir para o vindeiro curso lectivo co noso PD.
