Contextualización do Plan Dixital no centro. Contribución ao Proxecto Educativo do Centro
Característica socioeconómicas e culturais do contexto do centro
O CIFP Valentín Paz Andrade atópase na periferia da cidade de Vigo, nunha área preto de importantes vías de comunicación (autovía das Rías Baixas, autoestrada A Coruña-Tui, autoestrada a Baiona, 2º cinto de Vigo,…); próximo tamén ao aeroporto de Vigo. A zona conta cunha grande presenza industrial: polígonos do Concello de Vigo, Mos e Porriño.
O centro, que se creou hai 57 anos para que as empresas de Vigo e da súa contorna puideran seguir crecendo, actualmente dentro das súas liñas estratéxicas centra o seu proxecto de servizo público en satisfacer tanto á variedade de alumnado que busca facilidade para aumentar a súa competencia e acceso ao emprego, como en colaborar directamente coas empresas para concretar e atender as súas necesidades de persoal altamente cualificado e adaptado a requirimentos cambiantes nas profesións. Así mesmo participa activamente nos procedementos de acreditación de competencias profesionais, formación profesional para o emprego, actividades de innovación e outras accións asociadas á formación profesional con relación moi directa coas empresas e outras institucións.
Tamén intentamos dar resposta específica ás necesidades das empresas da contorna, facilitando formación específica e conxuntural naquelas áreas onde se detecten necesidades formativas.
Independentemente das circunstancias económicas e sociais, o noso centro trata de ofrecer oportunidades formativas flexibles e adaptadas que poidan favorecer un mellor acceso ao mercado laboral, adaptándose a unhas demandas cambiantes e con necesidades máis versátiles.
Neste sentido para o CIFP Valentín Paz Andrade resulta de especial importancia o servizo de información e orientación profesional para as persoas demandantes de formación, en estreita colaboración con todos os axentes sociais e económicos do nosa contorna, así como outras institucións de carácter local e autonómico, que permitirán que se poidan tomar decisións coñecendo a realidade máis inmediata, as posibilidades de acceso ao mercado laboral e as demandas do sector produtivo.
Todo elo require, unha vez máis, da estreita colaboración do CIFP con todos os axentes e actores dos sectores relacionados coas familias profesionais ofertadas, e un novo modelo de relación que ata fai pouco tempo non formaba parte da cultura organizativa e de funcionamento do noso centro. Somos conscientes da importancia dos cambios que se están a producir, e esta é unha das nosas liñas de actuación prioritarias.
Estamos nun entorno industrial onde as familias profesionais presentes no CIFP teñen un protagonismo necesario, por iso o centro dentro dos recursos humanos, económicos e de espazo dispoñible, tende a actualizar o equipamento, metodoloxías e competencias dixitais de cara a un servizo coherente co contexto actual, tendo tamén moi en conta a prospección dos ámbitos produtivos asociados a nosa actividade.
Todo isto pon nun lugar relevante a necesidade de mellora da competencia dixital do profesorado e do alumnado. Motivo da elaboración e aplicación do presente Plan Dixital
Contribución do Plan Dixital ao Proxecto Funcional
Na seguinte táboa relacionase a contribución prevista do Plan Dixital coas liñas xerais de actuación da rede de CIFPs e cos obxectivos estratéxicos específicos do propio CIFP Valentín Paz Andrade:
VER ANEXO "PLAN DIXITAL. CIFP VALENTÍN PAZ ANDRADE", páx 6.
Contribución do PD á Programación Xeral Anual do curso 22/23
O Plan anual do centro para o curso 2022-2023 non está planificado, pero as propostas de mellora recollidas na memoria deste curso 2021-2022, proxectan de cara ao próximo ano, obxectivos nos que a aplicación deste Plan dixital colaborará na mellora do rexistro de documentación, métodos de seguimento de avaliacións, comunicación entre a comunidade educativa, fomento do uso de ferramentas dispoñibles na aula virtual, mellora de infraestruturas, seguridade dixital e respecto a autoría de produtos dixitais
Breve xustificación do mesmo
O presente plan dixital trata de facer realidade o recollido na seguinte normativa en relación á mellora da competencia dixital do alumnado cara á súa vida laboral.
- Art. 111 bis, Art. 121 e Art. 132 da LOE 2/2006, de 3 de maio, de Educación (coas modificacións da LOMLOE 3/2020, de 29 de decembro)
- Disposición adicional terceira da Resolución do 18 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento dos ciclos formativos de FP do sistema educativo no curso 2021- 2022
- Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022.
Proceso de elaboración
Para o proceso de elaboración do Plan dixital creouse unha comisión que no futuro poderá encargarse de dinamizar dito plan. Esta comisión estivo formada polo director do CIFP, o Vicedirector, a Xefa de estudos e o Coordinador das TIC. O compromiso do CIFP como compoñente da Rede Galega de Educación Dixital e a colaboración do asesor dixital do propio centro, completaron a asistencia na consecución deste Plan dixital inicial.
A organización do traballo viuse favorecida pola participación nun grupo de traballo para a elaboración do Plan dixital (V2105107), dentro du PFFP (V2131046) do CIFP. Os obxectivos de grupo de traballo foron:
- Avaliar as tres dimensións da competencia dixital do centro segundo o Marco Europeo DigCompOrg: pedagóxica, tecnolóxica e organizativa para emprender un proceso de transformación.
- Definir obxectivos referidos ao emprego dos medios dixitais no proceso de ensino e aprendizaxe.
- Deseñar accións encamiñadas á mellora da competencia dixital do centro e da comunidade educativa.
