1.1. Contextualización do Plan Dixital no centro. Contribución ao Proxecto Educativo do Centro
- A nivel xeográfico o CEIP Luís Pimentel, está situado no Concello de Lugo, na zona norte da cidade e abarcando o barrio da Piringalla e zonas adxacentes.
O colexio non conta con servizo de transporte escolar, pero si de comedor, de xestión indirecta.
Os sectores de traballo dos pais/nais dos alumnos son principalmente os sectores secundario e terciario (servizos), sendo case inexistentes os pertencentes ao sector primario. Outro sector que tivo un incremento importante nos últimos anos é o de nenos pertencentes a familias inmigrantes, cuxos pais desempeñan traballos pouco cualificados no sector terciario na maioría dos casos.
O tipo de poboamento é urbano formado por núcleos nos que as vivendas están moi concentradas onde se erguen bloques de edificios con varios andares. Trátase do tipo ao que pertence a maioría do alumnado do centro, cuxos país residen en edificios de vivendas aínda que mantendo nos fins de semana a nas vacacións, vinculacións coas familias de orixe nas aldeas de onde proceden e onde residen aínda avós e outros familiares.
En xeral, os nenos e nenas atópanse limitados en canto á súa calidade de vida polas limitacións propias da vida urbana, con pouco contacto co medio rural e limitados polas xornadas laborais dos seus proxenitores. Con todo, a zona educativa é a zona de residencia da maioría dos alumnos, e goza da presenza nas súas inmediacións ou en zonas próximas de dotacións que melloran as súas posibilidades no tempo libre como: pavillón polideportivo, biblioteca pública, parques, xardíns, paseos, piscina municipal.
- Como queda reflectido no PEC, a actividade educativa vai dirixida entre outras a:
- Promover unha escola participativa, dinámica, flexible, traballadora, canalizadora das ideas e das propostas de todos e de todas.
- A atención individualizada ao alumnado, tendo en conta as capacidades específicas de cada un.
- Promover proxectos de mellora e innovación.
Actividades nas que o PD pode contribuír a acadalas.
- PD é importante para desenvolver algún dos obxectivos do PEC como “Educar ao alumnado para un bo uso das Tics( perigos e riscos das redes sociais e responsabilidade no tratamento dos contidos en rede)”, “lograr un sistema de comunicación áxil e eficaz entre toda a comunidade educativa ( Xade, Espazo Abalar, Web do centro...)”. Asemade, a súa contribución na PXA e nos distintos Plans do Centro é imprescindible.
1.2. Breve xustificación do mesmo
A Lei Orgánica 2/2006, do 3 de maio, de Educación, regula diferentes aspectos relacionados coa competencia dixital e a innovación educativa, así no artigo 121 establece que o proxecto educativo do centro recollerá, entre outros aspectos, a estratexia dixital do centro.
No artigo 111 bis, no que se establece que as Administracións educativas e os equipos directivos dos centros promoverán o uso das tecnoloxías da información e a comunicación (TIC) na aula como medio didáctico apropiado e valioso para levar a cabo as tarefas de ensino e aprendizaxe, utilizando os marcos de referencia da competencia dixital que orienten a formación inicial e permanente do profesorado e faciliten o desenvolvemento dunha cultura dixital nos centros e nas aulas.
O artigo 132 da devandita Lei establece como competencias dos directores e directoras, entre outras, exercer a dirección pedagóxica, promover a innovación educativa e impulsar plans para a consecución dos fins do proxecto educativo do centro; e fomentar a cualificación e formación do equipo docente, así como a investigación, a experimentación e a innovación educativa no centro.
Este centro, como xa se mencionou anteriormente, é un CEIP de tres liñas, cun PEC actualizado o 26 de abril do 2022 e un equipo directivo que finaliza o seu mandato o 30 de xuño do presente ano.
Durante o presente curso escolar iníciase o Proxecto Dixital do noso centro, tendo en conta a seguinte normativa:
- RESOLUCIÓN do 17 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento das ensinanzas de educación infantil, educación primaria, educación secundaria obrigatoria e bacharelato no curso académico 2021/22.
- Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022.
1.3. Proceso de elaboración
O Claustro do centro aceptou a candidatura da mestra M.L.C.D como mentora para formar parte dun equipo ADIX.
Os pasos a seguir para a implantación do Plan dixital neste curso 2021-2022, foron os seguintes:
1º paso, novembro, a creación dos equipos ADIX.
2º paso , decembro, envío do cuestionario SELFIE.
3º paso, febreiro, Tests CDD, que tivo que cubrir todo o profesorado que se atopaba no centro neses momentos.
4º paso, DAFO, análise das dúas ferramentas anteriores.
5º paso, abril- marzo, para deseñar obxectivos e acción a seguir.
6º paso, xuño, aprobar o plan dixital no Consello Escolar.
