1.- Xustificación do Plan Dixital de Centro ( PDC ) en relación coa normativa vixente:
-
Art. 111 bis, Art. 121 e Art. 132 da LOE 2/2006, de 3 de maio, de Educación.
-
Disposición adicional quinta da Resolución do 17 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento das ensinanzas de EI, EP, ESO e bacharelato no curso académico 2021-2022.
-
Disposición adicional terceira da Resolución do 18 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento dos ciclos formativos de FP do sistema educativo no curso 2021- 2022.
-
Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022.
2.- Contextualización do Plan Dixital de Centro ( PDC ):
O CEIP Almirante Juan de Lángara e Huarte atópase situado preto do centro urbano da cidade de Ferrol aínda que a súa zona de influencia non está demasiado poboada, pois se atopa preto dos equipamentos deportivos municipais da Malata e de varias zonas verdes así como do acceso Norte. Isto é un inconvinte en canto a matrícula, pero a súa situación de entrada a cidade fai que reciba alumnos das zonas rurais do municipio que non posúen centros de educación primaria completa, como Cobas, San Xurxo, Doniños etc.
Aínda que se atopa nunha zona moi castelanizada lingüisticamente falando, existe un gran interese por potenciar a lingua galega e unha actitude de gran respecto cara ás nosas tradicións e costumes.
3.- Contribución ao Proxecto Educativo de Centro (PEC):
A finalidade dun centro educativo é que o alumnado aprenda, se forme e se desenvolva como individuo da sociedade na que vive. En consecuencia, a propia organización vai mellorando a través da súa práctica e da reflexión sobre ela, así como das relacións que establece co seu entorno. O Plan Dixital de Centro debe encaixar no contexto institucional máis amplo que ven recollido en outros documentos institucionais, como o Proxecto Educativo de Centro e ambos documentos deben estar en total consonancia e ser complementarios.
O PEC engloba todos os documentos esenciais para o bo funcionamento dun centro e, polo tanto, o Plan Dixital estará relacionado con todos eles.
4.- Proceso de elaboración:
No noso centro centro contamos cun PFPP do Plan Dixital no que participan os tres membros do equipo directivo, exercendo como coordinadora a xefa de estudos. A través deste PFPP, formamos un grupo de traballo de 20 horas para realizar todas as xestións relacionadas co Plan Dixital, así como a súa elaboración.
Así mesmo, o noso centro forma parte da Rede Galega de Educación Dixital (DixitalGal), tendo un mentor que forma parte do noso claustro.
O proceso seguido para a elaboración deste plan dixital foi o estipulado polo equipo Adix 1 de Ferrol:
1) Realización dun cuestionario a través da aplicación Selfie por parte dos tres grupos esixidos: a totalidade do profesorado, o alumnado de 5º e 6º de educación primaria e o equipo directivo.
2) Análise dos resultados do Selfie.
3) Elaboración dun informe DAFO (Debilidades – Ameazas – Fortalezas – Oportunidades) a partir dos resultados obtidos no Selfie.
4) Realización dunha táboa cos obxectivos principais a cumprir neste plan dixital.
5) Elaboración do documento “Plan dixital” a partir do modelo facilitado polo equipo Adix 1 de Ferrol.
6) Presentación do documento ao claustro e información ás familias sobre o mesmo.
