Esta semana toca venres de Entroido e, aínda que queremos ser moi cautos e manter todas as restricións, tamén consideramos importante achegar ao alumnado o maior grao de "normalidade" posible. É por isto que preparamos un venres de Entroido un tanto peculiar e adaptado aos tempos, pensado para todo o alumnado (excepto o de 2º Bacharelato). Así, estes son os puntos clave:

CLASES

• Non haberá celebración, festa ou suspensión de horas lectivas. Haberá clase con normalidade, desde a primeira ata a última hora.

DISFRACES

• O alumnado que o desexe poderá vir disfrazado ao centro, pero deberá:

  • vir co disfraz posto directamente desde a casa (sen cambios de roupa en aseos e/ou aulas)

  • manter en todo o momento as normas covid (máscara, distancia, uso de xeles, evitar intercambiar obxectos...)

  • manter unha actitude de traballo nas clases, como calquera outro día. Ben, sabemos que a primeira sesión pode ser un pouco máis complicada que de costume, pero esperamos poder superalo.

CONCURSOS

• Entre a 4ª e a 6ª hora do venres, un xurado poderá interromper minimamente a clase (uns 3') para valorar os disfraces, de cara a decidir os gañadores do Concurso de disfraces do Entroido (ver cartel), que se farán públicos no seguinte venres. Este ano, ademais, propoñemos algunhas temáticas, se ben podo optarse por tema libre; haberá premios a Mellor Disfraz Grupal e Individual de cada nivel e temática, entre outros.

• Ademais, durante os días de descanso (ata mércores 17, incluído) estará aberto tamén o prazo de entrega para todos os que desexen participar (alumnado e profesorado) no Concurso de Fotografías Antigas de Entroido, que se enviarán (máximo 10 imaxes) ao correo do IES indicando no asunto "Concurso", e para o que tamén haberá premios para a foto máis divertida, a máis orixinal e a máis antiga de todas as recibidas. Honraremos así, con todas as recibidas, ese outro Entroido do que temos saudade.
  

Bo Entroido!