Debe partirse da consideración de que a imaxe é un dato de carácter persoal, que ademais ten unha especial relevancia e protección. O uso de imaxes en páxinas web, contornas dixitais ou instrumentos similares dos centros educativos, deberá contar co consentimento expreso do afectado.

Neste senso, no caso do alumnado menor de 14 anos deben prestar o consentimento os seus proxenitores, e no caso de maiores de 14 anos poden prestalo por si mesmos, segundo as regras xerais de consentimento. Cando o centro teña dúbidas respecto á posible validez do consentimento dos menores de idade, maiores de 14 anos, poderán recadar unicamente o consentimento dos seus representantes legais, quedando así sempre cuberta a responsabilidade polo uso das imaxes.

Como recomendación xenérica haberá que evitar imaxes nas que se vexan as caras claramente distinguibles e identificables dos membros da comunidade educativa.

O consentimento, particularmente no caso de imaxes, non pode ser xenérico, é dicir, que haberá de recadarse para cada fin concreto. Porén, facilítase neste protocolo (protocolo_proteccion_datos_v1.0.pdf) un modelo de autorización, que recolle e cubre a meirande parte das actividades, de xeito que os centros a poidan facilitar ao comezo de cada curso escolar quedando cubertas todas as actividades indicadas. Deste xeito, só excepcionalmente, para situacións distintas das previstas no modelo de autorización, será preciso recadar un consentimento individualizado.