Curso formativo para o proxecto LivingRivers

O mércores 30 de outubro veu visitar o noso centro o arquitecto Ceferino Castro Martínez. Reuniuse co alumnado de 1^eiro da ESO que está a traballar dentro do programa LivingRiver.

Dentro deste proxecto, o noso departamento de Lingua e Literatura Galega ocúpase da sección de traballo cultural e etnográfico. Á súa vez, subdivimos o noso programa de actuación en tres niveis: recollida de microtoponimia de zonas ribeiráns do río Miño e afluentes, rexistro de patrimonio material relacionado co aproveitamento destas vías de auga e, finalmente, achega ó patrimonio inmaterial vencellado con esta mesma temática.

Para desenvolver a pescuda toponímica, era necesario que o estudantado tivese competencias de traballo con mapas. Esa foi a finalidade da visita de Ceferino Castro. Nunha sesión explicoulle ó noso alumnado que plataformas da rede deberían usar, como localizarse nos mapas e como descargar as zonas de interese. Foi unha xornada moi clarificadora para as/os nosas estudantes e por iso lle estamos moi agradecidas pola súa axuda imprescindible.