Dinamización lingüística

A alumna Alicia Asensio Bande, de 2º de ESO, gañou o 1º premio na categoría C (de 12 a 16 anos) do certame de poesía de Nadal convocado pola Biblioteca Municipal "El Viejo Pancho", de Ribadeo. O título do seu poema é Sabela.

Parabéns!

O xoves, 11 de xuño, tivo lugar a entrega de premios correspondente á 1ª edición do xogo "A palabra perdida", coordinado pola profesora Susana Díaz Orol, do equipo da biblioteca. As vencedoras foron o equipo nº 1, formado por Nuria Fernández Fanego, Cristina Pérez Díaz, Uxía Lorenzo Rivas e Ana Rico Díaz, de 3º de ESO.

Aquí vemos unhas imaxes do acto:
Na primeira, aparecen as alumnas gañadoras acompañadas por Susana Díaz, coordinadora da actividade; na outra, a alumna Cristina Vizoso Cruz le un texto sobre a importancia dos libros, das bibliotecas e da lectura, acompañada por Alfonso Piñeiro, Director do centro, e por Teresa Díaz, Coordinadora do equipo da biblioteca.

Grazas á xenerosidade da familia de Dionisio Gamallo, organizamos no instituto unha exposición con material que se conserva no arquivo do polígrafo ribadense relacionado con Filgueira Valverde.

Durante unhas semanas, toda a nosa comunidade escolar pode ver e ler copias da correspondencia que Filgueira e Gamallo mantiveron durante décadas, xa que a primeira carta é de 1937 e a última de 1989.

Nunha delas, de 1943, Filgueira Valverde pídelle a Dionisio Gamallo permiso para propoñelo como acaémico correspondente da Real Academia Galega, cargo que, efectivamente, Gamallo acabou desempeñando.

Ademais, na exposición hai copia dunha primeira edición dos seis poemas en galego que Filgueirapublicou en Albor, en 1943; e tamén artigos, esquemas de conferencias, tarxetas persoais, felicitacións de nadal, etc.

Agradecémoslle á familia Gamallo que, grazas á súa xenerosidade, a nosa comunidade escolar pode acceder a material inédito relacionado coa figura á que se lle dedica o Día das Letras Galegas, igual que xa sucedeu con Novoneyra e con Díaz Castro. 

O luns, día 11 de maio, tivo lugar unha charla de Carlos Callón para falar do seu libro Como falar e escribir en galego con corrección e fluidez. De paso, tratáronse outros aspectos relacionados coa situación sociolingüística da lingua galega.

Organizou a actividade a profesora Dores Fernández Abel.

A palabra perdida é un xogo de pistas mediante o cal o alumnado, organizado en grupos, ten que acabar adiviñando unha palabra.

Previamente, nunha reunión conxunta, entregóuselle a cada grupo un cartafol con toda a información necesaria e un impreso no que debe ir anotando os datos que consiga durante o desenvolvemento do xogo.

Despois, nun taboleiro, empezamos a facer públicas as pistas que deben seguir. Cada pista leva o alumnado a un profesor, que lle dá máis datos a cada un dos grupos. Estes datos conducen a un libro da biblioteca no cal o alumnado atopa unha palabra. Con determinadas letras de todas as palabras que vai atopando, o alumnado acabará compoñendo a palabra que se busca.

O grupo que primeiro atope a solución recibirá un premio.

Coordina a actividade a profesora Susana Díaz Orol.