Un grupo de 45 alumnos e alumnas, de tódalas modalidades de 1º de Bacharelato do noso centro, participaron no Proxecto OlimpiADN promovido pola Fundación Barrié. O principal obxectivo desta iniciativa era coñecer a molécula de ADN a través dunha competición na que se propoñían distintos retos que os participantes debían superar. Durante o tempo que durou o proxecto, un trimestre, estes rapaces e rapazas traballaron moito, superaron tódolos retos e pasárono ben, aínda que ter que cumprir coas datas límite de entrega resultase ás veces estresante. Construíron maquetas do ADN, extraérono de froitas e legumes no laboratorio, escribiron artigos centifícos, realizaron un estudo poboacional de tres caracteres xenéticos e deixaron constancia dos seus traballos nuns vídeos fantásticos. En cifras, construiron oito maquetas de ADN, catro delas personalizadas, extraeron ADN de catro tipos de vexetais distintos, analizaron tres caracteres mendelianos en practicamente tódolos alumnos e alumnas do instituto e montaron oito vídeos que se poden ver no blogue de CMC.
O pasado mércores 22 de abril, 4 alumnas, unha por cada grupo de primeiro, acompañadas pola profesora de Ciencias para o Mundo Contemporáneo, asistiron en representación do IES Praia Barraña, á cerimonia de clausura e entrega de premios que se celebrou na Coruña. Aínda que non se conseguiu ningunha presea, regresaron a casa coa sensación de que o esforzo realizado pagou a pena.
