Pedro Souto Riveira, alumno de 4º ESO, participou hoxe no programa nº 408 (07-02-2024) do Proxecto Neo, unha experiencia radiofónica veterana e recoñecida do IES Perdouro de Burela. A partir do minuto 48, o Pedro falou das súas paixóns e experiencias en proxectos educativos e locais. 

Houbo tempo para dar a coñecer o Praíña Sp. C, do clube e mais del mesmo como xogador; divulgar a tradición dos Xenerais da Ulla, especialmente do Entroido de Couso; e comentar a súa implicación en iniciativas audiovisuais e na campaña Aquí tamén se fala do IES Nº 1. Falou Pedro e falou ben!

Estamos moi agradecid@s a Bernardo Penabade e Vanesa Vila-Verde por convidarnos a participar neste proxecto referente da radio escolar e o diálogo intercultural. Foi un pracer! Convidámosvos a escoitalo!!!

O noso centro festexou o aniversario do nacemento de Castelao este pasado martes 30 de xaneiro. Médico de formación, destacou como escritor, debuxante, activista cultural e político. Fundador e deputado do Partido Galeguista, foi un dos pais do Estatuto de Autonomía de 1936 e é considerado a figura máis importante do século XX en Galicia.

Pola mañá, a Biblioteca acolleu unha actividade de divulgación da súa biografía e da súa obra, con especial protagonismo para a relación que Castelao tivo coa Estrada. Roque, Celia e Paula, de 1º ESO, demostraron coñecer moi ben o rianxeiro e levaron cadanseu regalo simbólico de mans da directora.

Xa pola tarde, os mozos e as mozas de 1º ESO dramatizaron para todo o alumnado dous relatos do libro Retrincos (1934), "O Rifante" e "O retrato", ás que lle souberon dar vida. Noraboa!

O noso centro estivo presente na emisión nº 406 (31-01-2024) do programa radiofónico do Proxecto Neo, unha iniciativa educativa nacida  hai 12 anos no seo do Modelo Burela como proxecto de innovación educativa do IES Perdouro. Este programa de diálogo intercultural está en antena todos os mércores entre as 5 e as 6 da tarde e pódese escoitar en calquera lugar do mundo a través da radio á carta ou das emisoras Radio Foz e Radio Valadouro na Mariña, Cuac FM na Coruña, Radio Filispín en Ferrol, A Xente de Teo en Compostela e Radio Piratona en Vigo 

Este pasado luns 8 de xaneiro o alumnado de 3º e 4º ESO participou na actividade "A enerxía en xogo", impartida por un representante da Plataforma Efigy Planet. unha ferramenta interactiva de innovación pedagóxica que combina a formación dixital e presencial, baseada na gamificación e que permite traballar contidos transversais no ámbito da enerxía, as tecnoloxías e as ciencias ambientais. 

A actividade foi organizada polo Departamento de Física e Química e o alumnado traballou conceptos sobre enerxía, eficiencia enerxética, sostibilidade e medio ambiente. Fran, de Efigy Planet, guiou un xogo de rol no que os estudantes deberon responder ao reto de tomar decisións para conseguir ser máis eficientes e sostibles no uso e a xestón da enerxía e, ao tempo, cumprir con parámetros de sostibilidade e menor contaminación.

O alumnado do IES Nº 1 súmase á campaña “Aquí tamén se fala galego” xunto a outros 150 centros educativos nunha iniciativa cultural cooperativa que se vai converter na maior campaña cultural e de dinamización lingüística realizada activamente pola mocidade galega.

#aquítaménsefala é unha iniciativa estudiantil, con accións directas na contorna do alumnado, que naceu con grande éxito no IES Rafael Dieste da Coruña para promocionar o uso do galego no ámbito comercial e empresarial e rachar os prexuízos que perviven sobre o idioma.

Os mozos e as mozas achegaranse nas próximas semanas aos establecementos, empresas e todo tipo de negocios da vila e as parroquias da Estrada para que se sumen a esta iniciativa co único compromiso de mostrar publicamente que aquí tamén se fala galego. Dende o IES Nº 1 faremos difusión do voso apoio a través das nosas redes e dos medios de comunicación para unírmonos aos milleiros e milleiros de establecementos que se van sumar en toda Galicia.   

A Asociación Cultural “Vagalumes”, con motivo da conmemoración do aniversario de Olimpio Arca Caldas, e dentro do seu compromiso coa continuidade do seu labor de renovación pedagóxica e dinamización cultural, presenta a VI Mostra de Teatro Escolar que leva o nome do homenaxeado. Promotor deste tipo de actividade no ensino.

Estas xornadas levaranse a cabo o 27 e 28 de novembro ás 18:30 h. no Teatro Principal da Estrada. Co seguinte repertorio de obras:

Luns, 27 de novembro, ás 18:30 h.

• "Sobrevoando a Estrada". CEIP do Foxo
  • O tupé non era tal. Baseada no libro/conto A voda do galo Pinto. CEIP Villar Paramá
  • Dez vagalumes de Xoán Babarro. CEIP Pérez Viondi
  • Eu tamén fixen ouigha co espírito de Castelao. Adaptación de relato de Séchu Sende. IES Antón Losada Diéguez

Martes 28 de novembro, ás 18:30 h.

• A propósito dos bicos.. CEIP Figueiroa
  • "Xuntos podemos" CEIP Cabada Vázquez
  • "A viaxe de farrapos" de Carlos Labraña. CEIP Oca
  • Mundo refugallo. É unha adaptación de dúas obras de Paula Carballeira: "Somos os monstros" e " O refugallo" IES Nº 1.

A entrada é libre e gratuíta ata completar a capacidade da s

Un ano máis, e xa van dezasete, o Teatro Principal da Estrada acolleu o pasado xoves 14 de decembro unha nova "Festa da Poesía", que á súa vez serviu de marco para a entrega do XXVIII Certame de Poesía Avelina Valladares, que recaeu en Manuel López Rodríguez pola obra Fiotaxidermista.

Ademais da lectura de dous dos textos deste poemario a cargo do seu autor, polo escenario pasaron rapaces e rapazas de diferentes centros educativos da Estrada. En representación do IES Nº 1, Fátima Oubelkhir, Danna Rivas, Roque Castaño, Rosalía Mazás e Nora Diéguez recitaron "A miña relación máis longa", poema extraído de Materia, de Yolanda Castaño, que podedes escoitar na voz da poeta. 

Con motivo da conmemoración do Día Internacional para a eliminación da violencia contra as mulleres, o alumnado de 1º, 2º e 3º da ESO participou nun escape-room coordinado pola escola de tempo libre Anacos Educativos e promovido polo Centro de Información á Muller do Concello da Estrada.  

O pasado 4 de decembro o alumnado de 1º ESO participou nun obradoiro de creación literaria impartido por Raquel Queizás, contadora de historias, actriz, titiriteira e filóloga que se achegou ao noso centro grazas a un proxecto impulsado pola Asociación de Escritoras e Escritores en Lingua Galega (AELG) en colaboración coa Deputación e co noso Departamento de Lingua Galega.

O alumnado de 1º ESO participará mañá nun Obradoiro de creación literaria impartido por Raquel Queizás, contadora de historias, actriz, titiriteira e filóloga, que estimulará a creatividade artística do alumnado a través de diferentes dinámicas que terán como fío condutor a novela Be Water, de Antía Yáñez.

A actividade forma parte dunha campaña de obradoiros impulsada nos centros educativos pola Asociación de Escritoras e Escritores en Lingua Galega (AELG) en colaboración coa Deputación de Pontevedra e organizada no noso centro polo Departamento de Lingua Galega.

O alumnado dos colexios Pérez Viondi, Cabada Vázquez e do Foxo, xunto con Alba, Ana e Germán do noso centro, protagonizaron onte, sábado 25 de novembro, un novo “Recunchos da Lingua” do programa Mañás do sábado de Radio Estrada, dedicado desta volta a Manuel García Barros, baixo a coordinación da mestra Pilar Bernárdez. O obxectivo? Homenaxear e seguir a divulgar a obra e a traxectoria de compromiso coa lingua, a cultura e o país do escritor de Berres, que se fai merecedor dun Día das Letras Galegas.  

Ana e Alba reconstruíron as vivencias e os traballos do autor a partir de diferentes episodios aos que Germán puxo voz lendo as propias palabras que escribiu García Barros na obra Os meus recordos (Galaxia, 2001). 

Coma sempre, recomendámosvos profundizar nesta figura da man do propio alumnado. O noso participa no primeiro tramo do programa, pero paga ben a pena escoitar este monográfico completo. 

Un ano máis, regresa o teatro escolar á Estrada da man da Asociación Cultural Vagalumes, que organiza a VI Edición da Mostra de Teatro Escolar Olimpio Arca con motivo do aniversario do escritor e mestre. 

As representacións desenvolveranse durante os días 27 e 28 de novembro a partir das 18:30 no Teatro Principal, a entrada é libre e gratuíta e convidamos a asistir a todas as familias e á veciñanza.

Na Mostra participarán alumnos e alumnas de 8 centros escolares. Na primeira xornada será a quenda do CEIP do Foxo coa peza “Sobrevoando a Estrada”; do CEIP Villar Paramá con “O tupé non era tal”, baseada en el libro/cuento “A voda do galo Pinto”; do CEIP Pérez Viondi con “Dez vagalumes”, de Xoán Babarro; e do IES Antón Losada Diéguez coa obra “Eu tamén fixen ouigha co espírito de Castelao”, unha adaptación do relato homónimo de Séchu Sende.

Na xornada do martes poderemos asistir a "A propósito dos bicos", "Xuntos podemos" e "A viaxe de farrapos" dos colexios Figueroa, Cabada Vázquez e Oca, respectivamente. Tamén será o día no que subirán ao escenario os alumnos e alumnas do grupo de teatro do noso centro, que un curso máis son dirixidos pola nosa profesora de teatro, Cristina Andrade.

O "Recuncho da Lingua", a sección que dirixe Pilar Bernárdez no programa Mañás dos sábados de Radio Estrada, inaugurou onte, sábado 21 de outubro, unha nova tempada cun monográfico dedicado á escritora, música e xornalista Avelina Valladares, a quen lle dedica o mes de outubro no 198º aniversario do seu nacemento.

Isabel Rei Sanmartín, á guitarra, e Alejo Amoedo, ao piano, acompañaron con música da autora ás rapazas e aos rapaces dos colexios Cabada Vázquez, Pérez Viondi e O Foxo e do IES Pintor Colmeiro de Silleda, que se estrearon nos Recunchos co recitado do poema "Miña xoia".

O noso centro estivo representado por Adriana Orosa Fernández, Pablo Villamor García e Iria Cancela Fontao, que se achegaron á figura de Avelina Valladares poñendo en diálogo a súa traxectoria e a súa obra con Rosalía de Castro, a matriarca da literatura galega. Foron mulleres que compartiron unha época e unha xeografía común, a Ulla, mais sobre todo unha actitude empática e unha sensibilidade moi marcadas cara ás clases populares, especialmente as mulleres e os homes do rural: as súas duras condicións de vida, a súa cultura e o seu idioma, lingua do pobo, que elas empregaron e dignificaron nos seus versos. Foron, ademais, dúas autores que protagonizaron o Rexurdimento e plasman na súa obra o renacer da consciencia nacional e denuncian problemas estruturais do noso país, como o drama colectivo que supuxo a emigración. Tamén, na secuencia do Romantismo, compartiron a vivencia da paisaxe das comarcas do Sar e do Ulla. 

Aí vén o Samaín, e xa logo o Magosto, e para festexármolo o Equipo de Dinamización da Lingua Galega e a Biblioteca, en colaboración co Departamento de Lingua Galega, convocan un Concurso de Microrrelatos e Haikus... de medo!

Podedes consultar as bases da convocatoria e os materiais de apoio na Aula Virtual, pero non vos despistedes xa que o prazo de entrega remata o mércores 25 de outubro. Haberá agasallos.

Este martes 20 de xuño vivimos o regreso da 'Revista Viva. Nós de Nós', unha gala na que o teatro, a música, o idioma e a literatura serviron de fíos condutores para repasar as actividades e os proxectos do curso que remata. 

Beatriz, a nosa directora, puxo en valor o traballo da comunidade educativa e animounos a traballar man a man para fortalecela e proxectala no futuro. 

Rubén Servide e o seu Combo e o grupo formado polos alumnos Marcos, Carla, Germán, Ainoa e Elier, coordinados polo profesor Lolo, puxeron a música. Un luxo.

Sara Espiño, Uxía, Irene, Jéssica, Noa Cabaleiro, Lía, Andrés, Alexandre, Yuriana, Alejandro, Noa Mendoza, Antonio, Mónica e Janet mergulláronos na maxia do teatro baixo a batuta da profesora, a actriz Cristina Andrade. Que gran traballo!

Marcos Borrageros, ex-alumno que volveu ao noso centro para dar aulas este ano,, compartiu con nós historias que nos cativaron. Deixaches unha fonda pegada en nós!

Helena, Martín, Sara Espiño, Uxía e Noa Cabaleiro forxaron con palabras versos e microrrelatos premiados dentro e fóra do centro. Parabéns!

Onte, derradeiro día do curso 22-23, celebramos a festa de despedida dos Clubs de Lectura e o Grupo de Teatro no Recreo Cultural. Tiñamos que festexar un ano de moitos libros, de ensaios, de representacións...

Foi un ano de lecturas compartidas dende a perspectiva da diversidade, da integración, da igualdade e da memoria e que, unha vez máis de forma excepcional, Javier e Laura de Catro Elefantes souberon transformar en intensos xogos dinámicos e creativos que requiriron toda a nosa atención e volver transitar polas páxinas dos libros de todo o curso (ver materiais nos ficheiros adxuntos), aos que lles sumamos para esta ocasión a lectura de Os seres invisibles, de Emma Pedreira, e O diario violeta de Carlota, de Gemma Lienas. 

Despois, houbo tempo para o xantar colectivo, o primeiro mergullo do verán nas piscinas e os merecidos libros de agasallo que as profesoras Mónica, Patricia, Lurdes e Bea repartiron entre os rapaces e rapazas que forman parte de dúas das actividades máis gratificantes e enriquecedoras que se desenvolven no centro da man do Equipo da Biblioteca. 

Gozade das vacacións e dun verán lector. Vémonos á volta!

Chega unha nova entrega de Dinamiza TV, a serie de noticieiros nacidos da colaboración do Concello da Estrada e Dinamizaestrada, o colectivo de Equipos de Normalización Lingüística dos centros de ensino do concello, co obxectivo de fomentar o uso do idioma no audiovisual e na mocidade.

Hoxe é a nosa quenda así que, sen máis dilación, quedades con Adriana e Anxo, que irán dando paso aos seus compañeiros e compañeiras. Recomendacións lectoras, actividades complementarias, celebracións, espazos de divulgación, o día a día no centro, entrevistas... Dentro vídeo!

O xurado, composto polo alumnado de 4º ESO, valorou o uso normalizado da língua que fai este negocio familiar aberto dende 1984.

O recoñecemento entregarase na gala Revista Viva. Nós de Nós, que terá lugar no Teatro Principal o martes 20 a partir das 16:30.

O Premio IES-G que entrega o IES Nº 1 da Estrada chega á súa 8ª edición, tras o parón provocado pola pandemia, para sumar a Pastelería Mimela á nómina de comercios recoñecidos por empregar a lingua galega no seu día a día demostrando que o idioma engade un valor positivo nas relacións comerciais, que facilita a comunicación e achega confianza á clientela.

En concreto, o xurado formado polo alumnado de 4º ESO valorou o seu uso na atención oral á clientela, na cartelería interna e externa do establecemento, así como, especialmente, nas campañas de publicidade que realiza periodicamente e nos contidos publicados nas redes sociais, onde se percibe un uso coidado, rigoroso e de calidade do idioma.

Regresa a Revista Viva na súa 7ª edición. A anterior celebrouse en 2019 e, tras a paréntese da pandemia, chegou o momento de recuperala.

Revista Viva "Nós de Nós", un instituto vivo. Unha comunidade educativa aberta, dinámica, activa, comprometida co ensino público.

Revista Viva. Teatro, música, lingua, literatura, recoñecementos varios para dentro e para fóra. De Nós para Vós.

Revista Viva. Teatro Principal da Estrada. Martes 20 ás 16:30. Estades convidad@s!

Revista Viva. Deseño de Rosa de Cabanas.

Conta a propia autora que, de adolescente, encontrou nunha pintada na parede do seu instituto a definición que, segundo ela, mellor encerra o significado mesmo de literatura: "a arte comeza no punto en que vivir non abonda para expresar a propia vida". E, a partir deste fío, Andrea Maceiras foi desenredando as historias que transitan polas páxinas de Europa Express, O que sei do silencio e Que me pare o corazón se te esquezo, novelas que leron os mozos e mozas de 3º e 4º ESO e que centraron a conversa que mantivemos coa escritora o pasado martes 6 de xuño no marco do programa Letras Galegas 2023. 

O encontro foi moderado polas alumnas Sara Espiño, Xiana Folgare  Carolina Conde, Uxía Seoane e Pilar González nunha tarde de calmizo e treboada que tamén foi intensa e deu para conversar sobre a pegada das experiencias persoais na súa obra e arredor de diferentes motivos temáticos que tecen as vidas dos personaxes das súas novelas: o paso da adolescencia á madurez, a procura da liberdade e a loita polos soños, as relacións tóxicas, o acoso, a conformación da identidade e a imaxe que proxectamos ao exterior, a influencia das redes sociais nesa construción... A preguntas do alumnado, aínda deu tempo para falarmos sobre o oficio da escrita, os nosos gustos e intereses lectores ou o proceso de creación e edición dun libro, mesmo sobre as nosas expectativas e arelas nun futuro que xa non anda moi lonxe.

Seguimos a facer camiño, e xa van 10 anos, coa Festa das Palabras que organiza DinamizaEstrada, o colectivo que agrupa os Equipos de Normalización Lingüística dos centros escolares do noso concello. 

Seguimos a tecer unha rede de complicidades e afectos arredor da lingua galega a través da pulsión literaria que atravesa os microrrelatos e micropoemas dos 62 rapaces e rapazas galardoados e mais as 14 ilustracións dos meniños e meniñas de infantil. 

Seguimos a vernos no espello de Charo Golmar, madriña do evento, e de Rosa de Cabanas, que ilustrou a festa cun fermoso deseño que tomou corpo no cartaz, os marcapáxinas e mais no libro que recolle os textos e debuxos premiados. 

Porque "camiño" e "espello" foron as palabras prestadas por don Francisco Fernández del Riego, autor homenaxeado no Día das Letras Galegas, o home que nunca se rendeu, que serviron de inspiración para estes mozos e mozas, especialmente, no caso do noso centro, para Martín Seoane Duro, Helena Castaño Pazos, Noa Cabaleiro Ribadulla e Sara Espiño Vaamonde, escollidos entre os máis de 200 textos presentados a concurso. Moitos parabéns!

Velaquí tes as recomendacións de lecturas para o Nadal.

Hoxe coñecemos un pouquechiño máis a nosa profesora de teatro. Baixo a coordinación da profesora Rosario, as alumnas Noa Mendoza, Noa Cabaleiro, Uxía Seoane e Sara Espiño entrevistaron a Cristina Andrade para un novo episodio das "Historias non contadas" dentro do proxecto A Ollada da Sospeita (@aolladadasospeita). 

Cristina, actriz en teatro e televisión, contounos cales foron as súas motivacións para formarse nesta profesión, como foi e como é a súa experiencia no teatro e na televisión, o seu labor de docente, proxectos, emocións, sensacións... e, estade atent@s, o grupo de teatro do IES está a preparar unhas novas pezas para estrear en breve.  

Fotografía de R.G. para La Voz de Galicia                                                                                                                   Deseño de Rosa de Cabanas

A cita coas coas palabras terá lugar este martes 6 de xuño no Teatro Principal da Estrada a partir das 20.00 horas. A X Festa das Palabras pon o ramo aos concursos de micropoemas e microrrelatos organizados polos Equipos de Normalización Lingüística dos centros escolares e serán 62 alumnos e alumnas os que recibirán o seu premio: un exemplar do libro que recolle todos os textos gañadores de Primaria e Secundaria, acompañados por 14 ilustracións feitas por estudantes de Infantil, con portada da deseñadora gráfica Rosa de Cabanas. A escritora Charo Golmar exercerá de madriña.

E botamos a lingua fóra! Na casa, na escola e onde esteamos. Onte, acotío, mañá e sempre.

E hoxe, mércores 31 de maio, botámola tamén nas rúas da Estrada co Correlingua 2023. Os rapaces e rapazas de 1º e 2º da ESO sumáronse aos compañeiros e compañeiras do IES Losada Diéguez para se xuntaren co alumnado dos colexios do noso concello, o CPI de Cuntis, o CRA de Caldas e mais do IES Chano Piñeiro de Forcarei. Ao son das pandeiretas e con pancartas e bandeiras, percorreron as rúas para regresar á Praza do Concello. As rúas estaban ateigadas de xente por cadrar en día de feira.

Alí, a actriz Isabel Risco leu o manifesto e a rapazada coreou o lema... "Na casa, na escola, bota a lingua fóra". Despois actuou a Mekanika Rolling Band, tomouse o bocata e houbo tempo para conversar cos antigos mestres e mestras dos seus colexios.