Actividades extraescolares

No día de hoxe, 25 N, levouse a cabo durante o recreo unha performance por parte do alumnado, dirixida por Iván, profesor de Educación Física, en contra da violencia de xénero. Como música de fondo, aportada por Ana Fernández (Coordinadora do  Equipo de Dinamización da Lingua), destacou a ambientación con  “La puerta violeta” de Rozalén.
Ademais do alumnado, tamén colaborou o profesorado, coordinación da biblioteca e o persoal non docente na decoración do centro, con globos, murais e lazos de cor morada en contra da violencia de xénero.
Todo isto no contexto dunha semana especialmente centrada nesta temática, con diversas actividades de titoría nos diferentes cursos. Sen esquecer en ningún momento que a loita pola non discriminación e a tolerancia cero fronte á violencia deben estar presentes non só un día senón todo o ano.

Por 365 días de respecto e igualdade!
*Vídeo

O día 15 de novembro o alumnado de bioloxía de 4º ESO,1º e 2º BACH tiveron a oportunidade de escoitar, dentro do programa “A Ponte“ da USC  a charla “Realidade ou CSI: que nos conta o ADN de ti?”, impartida por investigadores da Unidade de Xenética forense do Instituto de Ciencias Forenses Luis Concheiro da USC (Mª del Carmen  de la Puente, Javier González e Lucía Casanova). Esta charla estivo centrada en contar ó alumnado o funcionamento do laboratorio de xenética forense e a aplicación das novas tecnoloxías de análise de ADN, como factores determinantes para a resolución de casos complexos (parentescos afastados ou casos que requiran do fenotipado forense e inferencia da ancestralidade bioxeográfica).

0 7 de novembro tivo lugar, na Cidade da Cultura en Santiago de Compostela, o evento Galicia TIC 2024. Neste evento estiveron presentes empresas do sector TIC con stands para coñecer o alumnado interesado en realizar as prácticas ou mesmo traballar unha vez finalizado o ciclo. O alumnado tamén coñeceu  as oportunidades laborais do sector TIC e escoitaron as experiencias dos profesionais do sector cos que se puideron sentir identificados como futuros profesionais TIC.

*Máis información en:https://www.galiciatic.com/

O día 5 de novembro o alumnado de 1º BACH visitou os centros de investigación CIMUS e Instituto de Medicina xenómica, guiados polo Dr. Anxo Carracedo. Na visita percorremos os diferentes laboratorios onde se levan a cabo todos os procesos que van dende a extracción do ADN, a súa amplificación, a detección de mutacións e a súa análise, ata a creación de organoides (órganos en miniatura). Todo dende a óptica do estudo de enfemidades e a procura de estratexias e fármacos para o seu tratamento. Enfermidades coma o cancro pero tamén outras coma a esquizofrenia, o TDAH ou o TEA son algunhas nas que conseguiron relevantes avances nos últimos anos.

O día 17 de outubro, alumnos dos Ciclos Superiores de Administración e Finanzas, de Asistencia á Dirección e do Ciclo Medio de Xestión administrativa, realizaron unha visita á zona franca de Vigo e ao Museo de Arte contemporánea.

Na zona franca, Isaac Manuel González Diz, Coordinador de Aduanas, explicou a historia da zona franca, a súa orixe e as actividades que actualmente se desenvolven nos distintos polígonos. Logo realizouse un percorrido da zona, vendo Ro-Ro da empresa Stellantis, tamén unha visita á empresa Elicentrepot S.A, ocupada do aprovisionamento de buques e, seguidamente, visitamos o Consorcio da zona franca de Vigo, onde se nos comentou o apoio ao emprendemento desenvolvido polo Consorcio a través de Viagalicia e a función de investimento da sociedade de capital risco do Consorcio.

Na xornada de tarde visitamos o Museo de Arte Contemporánea (antigo cárcere de Vigo) podendo desfrutar das exposicións dos pintores Bosco Caride, Benjamín Palencia e Manuel Calmeiro.