Actividades extraescolares

GRADUACIÓN 2ºBACH

Un ano máis, o 15 de maio, alumnado e profesorado, reunímonos para o moi merecido acto de graduación de 2º BACH. Parabéns a tod@s e moita sorte!!

http://www.edu.xunta.gal/centros/iesmurallaromana/galeria/thumbnails.php?album=76

INTERCAMBIO CO IES DE CELANOVA (OURENSE)

Un ano máis o alumnado de 3° ESO visitou Celanova. Desta vez foi dunha forma moi especial: nun intercambio con estudantes dese mesmo curso do IES de Celanova.

En primeiro lugar, a través de intercambio de cartas e posteriormente, o día 15 de abril xuntámonos polo centro de Lugo. Visitamos o Vello Cárcere, onde coñecemos todo o que aconteceu nesas paredes durante o Franquismo e o Centro de Artesanía e Deseño, que conta con exposicións sobre música medieval e olería tradicional galega.

O 6 de maio tocounos a nós viaxar ata a provincia de Ourense. Pasamos o día co alumnado do IES de Celanova, visitando lugares tan especiais como a Casa dos Poetas, casa natal de Curros Enriquez e o instituto, que forma parte do Mosterio de San Rosendo, e que conta cunha biblioteca histórica. No Mosteiro coñecemos o funcionamento do órgano grazas a Irma, a profesora de Música.

Como despedida, recitamos en conxunto, con moito ímpeto, os poemas “Deitado frente ao mar” e “Poema nuclear” de Celso Emilio Ferreiro.

AVENTURA EN INGLÉS POLA PONTENOVA

O 13 de maio os ciclos de 1º XEAD, 1º ADMFIN, 1ª ASIDIR e XEAD (A) desfrutaron dunha actividade programada polo Departamento de inglés á Pontenova, con explicacións en inglés, que lles permitiu coñecer vocabulario específico relacionado coa visita. A mañá resultou moi proveitosa, contemplando a exuberante natureza da Pontenova e os tesouros agochados do seu pasado mineiro, explorando a mina Consuelo (única de Galicia aberta para ser visitada), e descubrindo os seus peculiares espécimes e formacións naturais, os fornos para fundir o mineral e, como non, a " tirolina" máis longa de Galicia .

CHARLA PARA FAMILIAS: Prevención de adiccións tecnolóxicas e comportamentais

CHARLA: PREVENCIÓN DE ADICCIÓNS TECNOLÓXICAS E COMPORTAMENTAIS

Dirixida a pais, nais, titores e titoras legais do alumnado da ESO.

Obxectivo: Informar e sensibilizar ás familias sobre o papel educador de cara á prevención de adiccións tecnolóxicas.

Lugar: Salón de Actos (IES Muralla Romana)
Día: Mércores, 22 de maio de 2024
Hora: 19:00 h

Ofrecida a través do programa +XTI (Concello de Lugo)

CORRELINGUA 24: "Dende aquí até acolá, galego xa!"

O mércores 8 de maio os grupos de 2º ESO do noso instituto desprazámonos á Praza de Santa María, punto de saída e meta do Correlingua. Os preparativos comezaron dúas semanas antes. Na clase de ,con Maite, pegamos as letras en vinilo e nos recreos traballamos arreo para decorala.

Percorremos a Muralla reclamando mil primaveras máis para a nosa lingua xunto con outros centros da provincia. Mely e Aitana de 2º ESO C leron parte do manifesto que axudamos a redactar nun obradoiro coa escritora Ana Carreira durante a primeira avaliación e Rosario e Noa foron as encargadas de recoller o noso diploma de participación da man das autoridades.

* Ligazón á galería fotográfica de "El progreso"

DEMOSTRACIÓN DE VACUMTERAPIA

Alumnas de 1º ESIMBE (Imaxe persoal) e do curso AFD, asistiron a unha demostración de vacumterapia, tratamento mecánico indicado para tratamentos de celulite, obesidade e reafirmación, impartido por unha especialista, formadora nacional e internacional da marca Germaine de Capuccini.

XORNADA ORIENTACIÓN PROFESIONAL

Esta xornada de orientación profesional organizada polo Departametno de FOL e as Familias profesionais do IES Muralla Romana, ten como obxectivos:

■ Poñer en valor o traballo realizado durante o curso polo alumnado dos ciclos formativos das tres familias profesionais do IES Muralla Romana, compartindo o seu coñecemento e saber facer co alumnado doutros niveis formativos ( ESO e Bacharelato).

■ Fomentar a interacción dos distintos niveis formativos do centro, favorecendo que o alumnado de secundaria coñeza a formación postobrigatoria do IES Muralla Romana.

- Que instalacións hai, como son esas instalacións e onde se atopan.
- Que se estuda en cada unha das familias profesionais.
- Como se traballa.

■ Fomentar o traballo interdisciplinar.

ENREDANDO CO GALEGO

O martes 7 de maio tivo lugar no noso salón de actos a presentación da iniciativa Enredando co Galego. Nesta edición, contamos coa visita de Samuel Merino e SIlvia Abril, poetas cos que desfrutamos dun recital.

Estudantes de 2º, 3º, 4º ESO e 1º e Bacharelato crearán textos ou contido dixital en galego, durante 21 días, que se enviarán á Escola de Escritoras e Escritores da AELG. Ademais, tamén se poden compartir nas redes sociais co cancelo #enredandocogalego. e aparecerán na páxina web da AELG. En xuño asistiremos, co noso alumnado participante, a unha gala final no Gustavo Freire con entrega de premios para os mellores textos e un concerto moi especial.

FP INNOVA GALICIA 2024

O alumnado de 1º SIMIRE (Informática) e 1º PECOCA(Imaxe persoal) asistiron o 26 de abril á zona expositiva da FP Innova Galicia 2024 (Cidade da cultura en Santiago de Compostela). Un espazo expositivo no que conflúen a innovación e o emprendemento, a formación e a empresa. O alumnado puido experimentar, en primeira persoa, coas novas tecnoloxías, participando nos obradoiros sobre biotecnoloxía, ciberseguridade, creación de contidos mediante IA, drone soccer, creación de videoxogos, realidade virtual e aumentada, impresión 3D, entre outros.

I XOGOS POPULARES MURALLA-FOLE

O 29 de abril as alumnas e alumnos de 2º da ESO do IES Ánxel Fole e do noso IES Muralla Romana desfrutaron dunha xornada de xogos populares que se desenvolveu con gran animación e deportividade. Os dezaseis equipos enfrontáronse en Chave, Bolos, Brilé e Corda, resultando gañadores Muralla1 (Pablo, Sebas, Piero, Abigail, Malak, Eric e Antonio) e Fole 8, que gañaron todos os seus partidos.