Produción: tertulia ou faladoiro
1. Realizarase unha tertulia en pequenos grupos sobre un dos temas propostos. Trátase de abordar un contido curricular de xeito persoal, con achegas máis do que confrontación de ideas. O faladoiro é un intercambio de opinións nun ambiente máis ou menos informal.
2. Os grupos terán de 3 a 6 integrantes e comezarán a planificar a produción na aula: escolla do tema, determinación dos aspectos que pode abordar cada alumno/a, etc.
3. Cada integrante debe facer como mínimo dúas intervencións. A primeira terá unha estrutura clara (introdución e corpo argumentativo, cando menos). A segunda deberá facerse ao fío do que dixeron outras persoas.
4. Cumprirá optar por un destes temas:
- A situación da lingua galega no ensino: marco lexislativo e actitudes percibidas. Conectarase co que sabemos dos modelos de ensino para as linguas cooficiais en España para facer contrastes e valoracións.
- As enerxías alternativas no marco do teito do petróleo. Conectarase coa charla de Casal Lodeiro e os materiais vistos na aula.
5. As intervencións efectuaranse na aula o martes 14 de maio ou entregaranse gravadas ata ese mesmo día.
6. Un modelo de tertulia pode ser este, protagonizado por alumnado deste centro.
7. A preparación e realización é grupal, mais a avaliación será individual. Considerarase fundamentalmente:
- O axuste aos contidos.
- A pertinencia e valor argumentativo das achegas.
- A estrutura da primeira intervención e a conexión da segunda.
- A fluidez da alocución (non lida, en calquera caso).
- A corrección lingüística.