2017/2018

O 18 de decembro tivemos a sorte de que o escritor Manuel Esteban, autor da novela A ira dos mansos (libro que o noso alumnado de 1º de bacharelato leu neste primeiro trimestre e sobre o que realizou diferentes traballos creativos) estivese no noso centro. O encontro resultou interesante e emotivo, pois ademais de ler unha historia "policiaca" os nosos rapaces e rapazas achegáronse a outra realidade que moitas veces ignora, non entende ou non repara nela, o das persoas con Sindrome de Down. Este libro fala, daquela, sobre a dignidade e o respecto que todo ser humano merece.

O noso agradecemento ao autor por compartir o seu tempo libre connosco e os nosos parabéns por esta estupenda novela.

Estamos desexando que o seguinte libro no que Manuel Esteban está a traballar saía axiña á venda.

O venres, 1 de decembro, tivemos o enorme pracer de contar coa presenza destes expertos en Lingua Galega e Lingua Portuguesa que, ademáis, foron alumnos do IES Mendiño.

Roberto Samartín é Doutor  en Filoloxía Galega  e profesor da Facultade de Filoloxía Universidade de Coruña. Pola súa parte, Carlos Pazos, é tamén Licenciado en Filoloxía Galega e Doutor pola Universidade do Minho, na cal traballa na actualidade como profesor do Departamento de Estudos  Románicos.

Ambos os dous son membros do grupo Galabra, que se adica ao estudo de asuntos ligados ao funcionamento da literatura e da cultura, con especial atención ao caso das comunidades de lingua portuguesa, dende  unha perspectiva de análise social e de análise da cultura.

Despois de recordar brevemente os seus anos no noso centro, faláronnos dos libros que veñen de publicar e a través dos cales tentan analizar a relación lingüística, cultural  e social entre Galicia e Portugal.

Roberto Samartín comentou o contido da súa obra, que trata da construción do sistema cultural galego contemporáneo e as relacións literarias e culturais de Galicia co mundo lusófono dende o período da transición.

De seguido, Carlos Pazos sintetizou de xeito moi ameno o contido do seu libro A imagem da Galiza em Portugal, facendo un percorrido polas relación entre galegos e portugueses dende fins do XIX, centrándose na imaxe que en Portugal se tiña dos galegos, a partir daqueles  que vivían emigrados no país veciño.

Foi pena que o tempo non dese a máis, porque todos quedamos con ansias de saber máis cousas sobre dun tema tan interesante e para moitos sorprendente, por aquello de que se nos romperon certos estereotipos e prexuízos que moitas veces levamos interiorizados sen case decatármonos. Tentaremos volver contar con eles en canto poidan.  

O pasado 27 de novembro contamos no centro coa presenza do escritor e experto en sociolingüística, Manuel Núñez Singala, que xa nos visitara nalgún curso anterior

O Xefe do Departamento de Normalización Lingüística da Universidade de Santiago de Compostela faloulle ao alumnado de 2º de Bacharelato sobre da situación actual do galego, e, por ende, sobre das vantaxes do plurilingüismo. Entre a proxección de imaxes e videos, e a narración de historias e anécdotas moi curiosas, o autor de obras como En galego, por que non?  fíxonos ver toda unha serie de tópicos, prexuízos e estereotipos que levamos interiorizados a respecto da nosa lingua e que están repercutindo directamente sobre o seu uso ou, mellor dito, o seu desuso.

A charla resultou moi interesante e instrutiva, pero, por cuestión de tempo, soubo a pouco. Esperamos volver contar coa súa presenza en futuras ocasións.