2012/2013

A tarde do luns 15 de abril achegouse ao noso centro a escritora Andrea Maceiras para ter unha charla-coloquio co noso alumnado de 2º de ESO que lera a súa novela Violeta Tamurana. Foi presentada por Claudia Roza e Rocío Toucedo, alumnas de 2º de ESO que superaron  a súa timidez para nos deleitar a todos cunha breve e simpática presentación da autora e da súa obra. Deseguido, outras dúas alumnas Aldara García e Uxía Martínez leron fermosamente a “morte dunha tamura”. Alumnado e profesorado sentímonos orgullosos da  participación no acto destas rapazas. A todo isto queremos dicirvos que a autora quedou encantada.  E nós tamén ficamos moi contentas coa súa charla: clara, sinxela, interesante, pedagóxica… en definitiva, os noso parabéns para Andrea Maceiras, non só como escritora senón tamén como oradora e como persoa: talento, humildade e simpatía semellan ser  algúns dos seus atributos.

O Departamento de Orientación organizou dúas saídas para que o alumnado de 4º de ESO, que agora remata a súa etapa de formación obrigatoria no noso instituto, tome contacto con centros nos que se imparten ciclos formativos.

A primeira visita foi realizada o venres 12 de abril aos centros do Meixoeiro, e a segunda o mércores 17 de abril ao Instituto Politécnico de Vigo e ao Instituto de Chapela.

Foi unha actividade moi interesante e produtiva xa que algún dos nosos rapaces e rapazas van cursar algún dos ciclos formativos que coñeceron.

7 de marzo: mañá poallenta. O alumnado de 2º ESO agarda impaciente subir ao autobús que os levará ata Pontevedra onde visitarán o Museo.

Traballaron previamente na clase a importancia dos museos como centros conservadores de cultura aberta a todo o mundo. Estudaron a figura de Casto Sampedro y Folgar, ilustre redondelán (a quen neste pasado ano 2012 foi homenaxeado polo Concello de Redondela) impulsor e fundador do Museo de Pontevedra.

A poalla de primeiras horas da mañá acabou converténdose nunha bategada que, non obstante, non impediu que o alumnado aproveitase esa saída tanto dende o punto de vista cultural como lúdico

Velaquí unha foto que confirma o que dicimos.

O xoves, 28 de febreiro, o alumnado de 2º, 3º e 4º de ESO de Relixión Católica visitou a Cidade da Cultura no Monte Gaiás e tivo a oportunidade de coñecer unha interesante exposición titulada "Galaeccia Pétrea" na que fixeron un percorrido a través do tempo, desde as épocas preromanas deica a actualidade.

Os nosos rapaces e rapazas quedaron impresionados non só pola exposición senon tamén polo emprazamento e pola grandiosidade dos edificios e espazos exteriores que xunguen ese complexo arquitectónico edificado no Monte Gaiás.

Arquitectura Moderna e Historia nunha mesma viaxe.

O mércores 20 de febreiro estivo no noso Instituto a profesora Inmaculada Mas Álvarez, profesora da Facultade de Filoloxía da Universidade de Santiago de Compostela para falarlles ao noso alumnado de 1º e 2º de bacharelato da necesidade de ter acreditado un idioma para dar acadado unha titulación universitaria.