Campaña de corresponsabilidade 19 de marzo
A semana do 19 de marzo celebrouse no centro o “Día do Home Igualitario”, no que se propuxo o “1º reto quincenal” ao alumnado. Para superar o mesmo, todo o alumnado de 3º ESO tiña que realizar unha comida ou cea familiar como xeito de “devolver” os coidados que a diario reciben nas súas casas por parte das persoas adultas.
Tamén se realizou unha exposición de fotografías de homes realizando tarefas domésticas.
PRIMEIRO RETO QUINCENAL
O obxectivo da actividade é reflexionar sobre como os coidados que recibimos diariamente dentro das nosas familias poden e deben ser correspondidos a medida que nos facemos persoas adultas.
Propoñémoste que te encargues ti de facer unha comida ou unha cea para toda a túa familia. Non se trata de facer algo moi laborioso ou complicado,polo que engadimos unha receita doada. Pero si que tes que encargarte de todo o proceso: facer a merca se hai algún produto que non teñas na casa, poñer a mesa, cortar o pan, cociñar, servir á túa familia, recoller a mesa e fregar a louza ( ou poñer a lavalouza). De cada unha das partes do proceso debes facer fotos,para poder acreditar que te encargaches de todas e cada unha das tarefas.
Unha vez realizada a comida ou cea, debes respostar ao cuestionario adxunto para que che sirva de guión para a presentación oral que farás na clase sobre que che pareceu a experiencia.
Espaguetis con champiñóns e allo
Ingredientes (para 4 persoas, aproximadamente)
-
Aproximadamente, 350 gramos de champiñóns
-
3 dentes de allopicados
-
2 culleriñas de aceite de oliva
-
1 guindilla picada (se gustas do picante)
-
1/4 vaso de viño branco (opcional)
-
Aproximadamente, 250 gramos de espaguetis
-
2 culleriñas de perexil picado
-
Sal
-
Pementa negra
Preparación:
Cocer a pasta nunha pota con auga fervendo con sal, de acordo coas instruccións do paquete.
Lavar ben os champiñóns, quitarlles o pé e trocealos.
Quentar o aceite nunha tixola, engadir o allo, a guindilla picada e cociñar a lume suave durante un minuto. Engadir os champiñóns, sal e pementa e cociñar durante 2 minutos. Subir o lume, engadir o viño branco e cociñar durante 3 minutos.
Escurrir a pasta e mesturar cos champiñóns.
Se non tes soltura na cociña, recomendámoche que primeiro prepares os champiñóns, e cando estén na tixola, te poñas cos espaguetis.
Servir quente
Sobremesa:
A escoller: un iogurt, unha peza de froita...
CUESTIÓNS A RESPONDER
-
Como recibiron na túa familia a proposta de actividade? Comenta a reacción de cada unha das persoas coas que vives.
-
Como te sentiches ante a súa reacción?
-
Canto tempo te levou todo o proceso?
-
Tiveches que pedir axuda verbal ( onde está tal cousa, como funciona tal outra..) a alguén da familia? A quen?
-
Que foi o que máis che sorprendeu do que tiveches que facer?
-
Que foi o que máis che gustou e o que menos?
-
Quen che sacou as fotos? Por que foi esa persoa e non outra?
-
Canto tempo diario calculas que terás que dedicar da túa vida adulta para poder comer de maneira parecida a como comes agora na túa casa?
-
Credes que cociñara para a xente da túa familia é un xeito de coidala?
Ver no arquivo adxunto (PDF) imaxes do alumnado.