ELABORACIÓN E PRESENTACIÓN DE TRABALLOS ESCRITOS
Normas, criterios e consellos para elaborar e presentar traballos escritos.
ESTRUTURA DO TRABALLO
En xeral, os traballos terán (nesta orde):
-
PORTADA.
-
ÍNDICE. É un listado dos apartados e subapartados dos que consta o traballo.
-
INTRODUCIÓN. É unha breve descrición ou presentación do traballo. Nela explícase en que consiste, os motivos da elección do tema, os obxectivos, os temas ou ideas que se van traballar e as partes de que consta. A extensión variará en función da extensión total do traballo, pero pode ser de 1 a 3 parágrafos.
- CONTIDO - CORPO DO TRABALLO. Distribúese en apartados ou capítulos.
- CONCLUSIÓN. Na conclusión ou valoración xeral, redactarase un resumo onde se recollen as ideas principais, a opinión persoal respecto ao aprendido, as dificultades e as facilidades atopadas, en que é necesario afondar máis, futuras recomendacións, etc. Pódese comezar cunha expresión deste tipo: Neste traballo intentamos describir...
- BIBLIOGRAFÍA. Todo traballo de investigación debe indicar as fontes de información consultadas.
- ANEXOS (Optativo). Se no traballo aparecen varios anexos, inclúense nun índice de anexos despois da bibliografía.
Ao final, engadirase unha páxina en branco, chamada de cortesía, para as anotacións do profesorado. Pódese engadir outra páxina en branco entre a portada e o índice para que non transparente.
Cóntanse todas as páxinas, pero non se numeran nin a portada nin o índice. A paxinación os procesadores de texto é automática.
Se se trata dun traballo curto, dunha soa folla, non será necesaria esta estrutura. Arriba porase o título en maiúsculas e centrado. Despois, o texto do que consta o traballo e, finalmente, o nome e o curso á dereita. Nome e curso tamén poden aparecer arriba á dereita.