VALGA, UN FOCO DE INESGOTABLE CREATIVIDADE
Durante boa parte da mañá do pasado venres 21 de febreiro celebramos no IES de Valga o tradicional festival de entroido, o cal neste ano estaba centrado nunha temática común a todo alumnado que o desexase, así como ao equipo docente do centro, que finalmente tamén se incorporou a esta sucesión de divertidas iniciativas, de tal modo que se realizaron numerosas e diversas comparsas, intimamente relacionadas co mundo artístico e baseadas na representación de diferentes obras emblemáticas (principalmente pictóricas) de certa relevancia na Historia da Arte, tales como “O berro” (obra do autor noruegués Edvard Munch) , “Os amantes” (René Magritte,1928) ou mesmo “As Meninas” (Velázquez, 1656).
Se ben é certo que a do pasado venres estaba chamada a ser unha xornada un tanto peculiar, rompendo coa constante monotonía da rutina académica, os eventos que tiveron lugar superaron con creces as expectativas previamente establecidas, especialmente grazas á intensa e ampla participación do alumnado do noso IES. Así mesmo, puidemos gozar das numerosas recreacións de cadros representativos da nosa historia, as cales, conformadas por alumnos de diversas clases e grupos do instituto, se realizaron no interior do noso ximnasio:
Entre as diferentes comparsas ou espectáculos que se sucederon destacan (entre outras) pola súa orixinalidade, así como pola creatividade dos disfraces dos seu integrantes, escenografía, posta en escena ou decorado:
1. “A Armada Española, 1588”, obra do artista británico William Lionel Wyllie, cuxa representación estivo protagonizada por un grupo constituído por alumnos de 1ºBAC e 4ºESO.
2. “As Meninas”, cadro realizado polo pintor barroco español Diego Velázquez no ano 1656, cuxa recreación foi desempeñada por alumnos de 1ºESO.
3. “Lección de anatomía”, obra do pintor neerlandés Rembrandt (1632). A súa representación estivo realizada por integrantes de 2º da ESO.
4. “Grafitis de Bansky”, conxunto de obras artísticas de carácter urbano realizadas por un autor descoñecido autodenominado Bansky. Este episodio do festival estivo protagonizado por alumnos de 4ºda ESO.
5. Conxunto de obras relacionadas entre si, tales como “O berro” (Munch), “Nena con globos” (Bansky), “American Gothic” (Grant Wood) ou “A galiña cega” (Francisco de Goya) recreadas polo alumnado de 3º A ESO.
6. “As bailarinas” de Edgar Degas, escena realizada por integrantes de 4ºESO.
Non obstante, pese á creatividade e orixinalidade de todos os grupos que participaron neste marabilloso e orixinal evento, un xurado constituído por un representante do grupo docente (Paula Fernández, de Historia), así como por dúas alumnas de 2º de BAC da materia de Historia da Arte en representación do alumnado (Valeria Gómez Vázquez e Tamara Fabeiro Iglesias) ou por un membro da ANPA, seleccionou de entre os múltiples grupos os que posteriormente serían considerados como gañadores:
• O PRIMEIRO PREMIO (sesión de condución de karting e vales para canxear na cafetería do IES, cortesía da ANPA “Bella Otero”) recaeu no grupo constituído por integrantes de 4º de ESO e 1ºde BAC, “A Armada Española”, especialmente pola súa excelente escenografía e decorado.
• O SEGUNDO PREMIO (sesión de condución de karting, xentileza da ANPA) recaeu no grupo representante das Meninas de Velázquez, formado por alumnos de 1º da ESO.
• O TERCEIRO PREMIO (vales de 10 € para canxear na cafetería do instituto) foi para os constituíntes do grupo que recreou o famoso cadro de Rembrandt: “A lección de anatomía” (2ºESO).
Porén, o mellor agasallo ou condecoración da xornada non foron os premios anteriormente mencionados, senón a diversión, contento e alegría dos innumerables e entretidos episodios que se sucederon durante a mañá, así como a gran diversidade cromática configurada polos numerosos e pintorescos, algúns case extravagantes, disfraces, os cales permanecerán dende entón na memoria colectiva do noso IES.
Samuel Rial Maneiro. 3º ESO A