.jpg)
A palabra folletín é un diminutivo do italiano foglietto. Orixinalmente designaba unha sección dentro dun xornal ou revista onde un escritor publicaba unha columna cunha crónica, un artigo autónomo ou unha novela por capítulos. Neste último sentido, nos novos medios do século XX, deu paso á "novela" da radio e da televisión.
As revistas especializadas neste tipo de literatura fixéronse moi populares a mediados do século XIX en Francia (imaxe).
Trátase dun xénero de ficción caracterizado pola gran velocidade na súa creación, o argumento pouco verosímil e a simplicidade psicolóxica das súas tramas e personaxes. Estes redúcense a estereotipos cuxa traxectoria dramática responde ás expectativas dun público amplo, diverso e pouco esixente. O seu medio de expresión tradicional foron as entregas nos xornais, como aconteceu con Maxina.
O máis frecuente é que a súa trama sexa amorosa, mais é habitual que apareza tamén o misterio e o escabroso. Seguramente sexa o xénero máis popular de todos os que existen grazas, en gran parte, á súa extraordinaria capacidade para se adaptar aos novos medios de difusión, principalmente a televisión.