Naceu no ano 1790 na Coruña. A súa principal ocupación foi a de militar e só accidentalmente chegou á literatura: o seu carácter combativo e liberal levouno a poñer por escrito as súas andanzas bélicas contra o exército galo co claro obxectivo de provocar unha reacción de orgullo e de resistencia do pobo galego.
A chegada do exército francés converteuno en guerrilleiro percorrendo Galicia de lado a lado. A súa primeira fazaña militar produciuse na parroquia de Xesta, en Lalín, á que seguirían outras até que foi ferido, momento en que se incorporou á administración galega. Ocupou o cargo de secretario da Xunta Suprema do Reino de Galicia, institución vixente en 1808 no marco da guerra de Independencia para cubrir a ausencia de poder tralo apresamento do rei Fernando VII.