Todo o alumnado de novo acceso, o alumnado que non estivese matriculado no curso anterior ou o alumnado que tivese renunciado á matrícula no curso anterior necesitará realizar primeiramente a preinscrición e agardar á adxudicación de prazas antes de realizar a matrícula.
DATAS DE PREINSCRICIÓN E MATRÍCULA para o curso 2024-2025:
Alumnado que continúa:
- Apto na ordinaria - do 18 ao 28 de xuño (ambos inclusive)
- Apto, non apto e non presentado na extraordinaria - do 28 de xuño ao 5 de xullo (ambos inclusive)
Alumnado de novo acceso (tamén alumnado que renunciou ou que cambia de lingua):
- Preinscrición - do 24 de xuño ao 5 de xullo (ambos inclusive)
- Consulta dos admitidos e MATRÍCULA: do 9 ao 19 de xullo (ambos inclusive)
- Adxudicación das prazas vacantes ata o 20 de setembro
Máis preguntas? Proba a nosa GUÍA de Matrícula aquí.
1. Preinscrición
Deberá acceder á aplicación de preinscrición en liña.
Pode modificar a súa preinscrición cantas veces queira ata o remate do seu período de preinscrición.
Pode solicitar ata dous idiomas diferentes e tres preferencias priorizadas de grupos por cada idioma.
Importante: anote o seu contrasinal de acceso á aplicación. O acceso por segunda e posteriores veces realizarase coa data de nacemento, o DNI/NIE e o contrasinal indicado no momento da alta.
Importante: escriba correctamente todos os seus datos, pois serán os que figurarán no seu expediente.
2. Adxudicación de prazas
Poderá coñecer se foi admitido/a a partir do día 8 de xullo de 2024 accedendo á mesma aplicación en liña.
Unha vez comprobadas as peticións de todas as persoas solicitantes, xerarase unha lista de reservas, que terá en conta unicamente a primeira opción solicitada e comezará pola primeira persoa solicitante que non obtivese praza.
3. Reserva de praza
Se foi admitido/a, poderá realizar a reserva de praza dentro do prazo establecido.
Deberá acceder á matrícula en liña a través da mesma aplicación na que realizou a preinscrición.
Ao entrar na aplicación, o alumnado verá unha pantalla con información acerca do curso no que lle corresponde matricularse.
A aplicación xerará un resgardo coas informacións do grupo elixido.
O alumnado tamén recibirá información das taxas que deberá pagar.
A praza quedará reservada e pendente de formalizar.
4. Pagamento de taxas
O alumnado deberá realizar o pagamento nunha entidade bancaria ou de forma telemática, dentro do prazo establecido.
Consulte información sobre as taxas, como se pagan e os códigos de tramitación.
5. Formalización e confirmación da matrícula
Toda a documentación necesaria para matricularse deberá presentarse por medio da aplicación en liña dentro dos prazos establecidos.
Por medio da aplicación en liña, o alumnado deberá presentar o resgardo de pagamento de taxas, ademais da restante documentación requirida, dentro do seu prazo. Esta pecha ás 12.00 do último día indicado para matricularse.
As persoas que se matriculen responsabilizaranse da veracidade dos documentos que presenten. As escolas poderan solicitar ao alumnado a presentación dos documentos orixinais para o cotexo da copia electrónica presentada.
Poderá comprobar se a súa matrícula é definitiva accedendo unha semana despois á mesma aplicación e verificando se o seu resgardo figura como "Resgardo definitivo" na parte inferior esquerda.
- Se o/a solicitante se atopa nalgunha situación que requira a presentación de documentación adicional, deberá facelo a través da aplicación, dentro dos prazos establecidos.
- O alumnado con dereito a redución de taxas poderá efectuar a súa reserva de matrícula en liña, pero para proceder á formalización da matrícula deberá achegar a documentación xustificativa.
