Ola de novo familias!
Esta semana, como non podía ser doutra forma, vimos cargados de cousas novas.
O xoves, tivemos a visita do alumnado de FP de carpintería do IES Rolasía Mera; os cales nos están creando o moble para un dos espazos dos ambientes de aprendizaxe,estes trouxéronnos pezas de madeira coas que fixemos un boneco moi chulo; primeiro compuxémolo e logo personalizámolo coa nosa foto, ademais de pintalo cada un ao seu gusto.
Para agradecerlles ese detalle nós convidámolos a un batido que fixemos con fresas, plátano e leite. A verdade é que nos saíu moi rico!
Agardamos que se fosen tan contentos como nós quedamos con eles.
O venres, comezamos a falar da nosa visita á casa dos peixes; para elo representamos seres mariños sobre papel de aluminio, pola cara brillante do papel pintamos con témperas e pola outra con rotuladores.
Velaquí as nosas obras de arte!!
Por último, tamén comezamos a preparar a actividade que imos empregar para conmemorar o Día Internacional da muller.
Pero non vos podemos adiantar nada, é unha sorpresa!!
Agardamos que pasedes unha boa fin de semana.
Ata a próxima!
