O pasado venres 22 de abril, o alumnado de 3º e 4º da ESO acudiu ao CIS Tecnoloxía e Deseño dentro do marco do programa EduTecEmprende. Alí foron recibidos pola directora da Axencia Galega de Innovación (Gain), Patricia Argerey, que os acompañou na súa visita.
O obxectivo desta iniciativa é motivar e sensibilizar a alumnado de diferentes niveis educativos no espírito emprendedor a través do coñecemento da realidade empresarial e tecnolóxica da súa contorna, así como promover o seu achegamamento ás áreas STEM (Ciencia, Tecnoloxía, Enxeñaría e Matemáticas). Nesta actividade de fomento das vocacións científicas e tecnolóxicas búscase conseguir un maior interese por estas áreas de coñecemento e axudar a que os estudantes visualicen as profesións STEM como opcións de futuro satisfactorias.
Ao longo da visita, o grupo de estudantes visitou a Materioteca de Galicia, un espazo dedicado á exposición de materiais innovadores e cuxa principal misión é dinamizar o seu uso en proxectos de diferentes ámbitos; un showroom, onde puideron experimentar en primeira persoa distintos dispositivos de realidade virtual e aumentada e introducirse na CAVE, un entorno inmersivo formado por catro pantallas de grandes dimensións, así como visitar demostradores, onde puideron probar gafas de realidade aumentada para visualizar o mantemento de distintas instalacións e gafas de realidade virtual para experimentar cun proceso de pintura/vernizado con pistola.
Facendo clic na seguinte imaxe accederase á galería de fotos da xornada
