Proxecto VEDRA MEDRA

Coincidindo co día do San Martiño fixemos o magosto no centro e convocamos a toda a rapazada a xogar. 

Aquí van as imaxes da primeira actuación conxunta d’ O Camiño tamén dá xogo! na que os xogos e os xogadores foron os protagonistas. Deunos moito gusto poder contar no ‘terreo de xogo’ cos avós e avoas que viñeron compartir unha mañá de lecer con nós.

A permanencia e a continuidade dos xogos populares dependen de que se dea unha transmisión interxeracional efectiva. É por iso que desde Vedra medra propiciamos desde o comezo do proxecto a  interrelación entre maiores e rapaces tendo presente o gran valor educativo que nela se agocha.

Moitas grazas aos vedreses/as que nos acompañaron nesta cita ‘xogantina’: Ana Dacosta, Elvira Gestoso, Gerardo Albela, José Torres, Manuel Vilas, Luis Neira e Pilar González.

O agradecemento tamén para SororAs, empresa encargada do labor de dinamización para o que achegou  unha manchea de xogos populares e malabares (turra corda, xogo do aro, comba, tabas, goma, bólas, pratos chineses, buxainas, aros...), xogos tradicionais (a casiña, tira latas, tira aros, pesca a botella...) e de xogos de mesa (letra a letra, dominó, memory, cortex, jungle speed, xogos de inxenio de madeira, story cube...).

Xulia Marqués

Coordinadora do EDLG e de Vedra medra

A rapazada do noso centro puido completar coa instalación interactiva de forma virtual a peregrinación polo treito galego da Vía da Prata desde A Mezquita ata Santiago.

Esta instalación permaneceu no CPI do 6 ao 12 de outubro cun obxectivo, dar a coñecer o catálogo patrimonial da Vía da Prata dunha forma lúdica. 

O elemento central é un xogo de habilidade en que o/a rapaz/a debe, coa axuda de dúas cordas, manipular a un peregrino de madeira e lograr que traslade unha pelota desde A Canda ata Compostela, completando o trazado da Vía da Prata. 

Compleméntase cunha sorte de paneis en que se revisan algún puntos de interese más destacados do Camiño,  desde o triángulo máxico do Entroido ourensán, o mosteiro de Oseira ou O Pico Sacro.

Esta iniciativa forma parte do programa da Xunta “O Teu   Xacobeo”.

Xulia Marqués

Coordinadora do EDLG e de Vedra medra

Comezamos a andaina este 2022-23 repetindo camiñadas pola Vía da Prata aínda que esta vez traballaremos asociada a temática do xogo popular e tradicional galego.

A iso responde a escolla dun lema coma O Camiño tamén dá xogo! que nos identificará ao longo de todo o curso.

De todos é sabido que Galicia ten un patrimonio lúdico significativo en número e cun elevado nivel de conservación. E dende Vedra medra queremos aprender sobre o xogo, xogando, coas avoas e os avós da nosa rapazada e saber daqueles xoguetes que formaron parte da súa nenez.

O Camiño tamén dá xogo! está inscrito no programa de innovación educativa PROXECTA + “Vexo, veo Xacobeo” promovido desde a Vicepresidencia Primeira e a Consellería de Presidencia, Xustiza e Turismo Axencia de Turismo-S.A.de Xestión do Plan Xacobeo.

Entre as primeiras actuacións, que estamos xa a desenvolver, figuran un obradoiro de radio e a recepción da instalación interactiva Vía da Prata co seu xogo de habilidade sobre o roteiro. Agardamos tamén con ansia a mañá do 11 de novembro (celebración do Magosto) que virá con castañada pero chea de xogos para todas as idades e de tipoloxía diversa (populares e malabares, de mesa, tradicionais).

 E, claro está, seguimos programando saídas didácticas para achegar o noso alumnado á Vedra patrimonial.

Xulia Marqués

Coordinadora do EDLG e de Vedra medra