Antes de que desaparezan, decidimos convocar este I Concurso Fotografico de casas con Potín (como se lles chama en Marín). Somos conscientes de que na vila hai presentes outras tipoloxías de casas mariñeiras como as térreas, de pincho.....mais as mais recoñecibles e as mais doadas de atopar porque están presentes no mesmo centro do pobo, son estas. Non o iamos poñer tan sinxelo que no noso cartaz xa puxeramos unha casa de Marín, para o caso escollimos de Cangas que resume moi ben o que eran e son as casas con potín: pintadas coma os barcos a dúas cores ou caleadas (hoxe en día teñen a pedra ao descuberto), escaleiras que dan aceso ao sobrado e que soen ir paralelas á casa ou nalgúns casos en perpendicular, ao final das escaleiras unha zona cuberta ou PATAMAL..... e nesta fermosa foto aparecen ademais outros instrumentos mariñeiros coma o carro onde os mariñeiros levaban os aparellos dos baixos ou das chabolas aos barcos e a patela para levar o peixe.
PRAZO DE PRESENTACIÓN DAS FOTOS PARA O CONCURSO-TRABALLO DE INVESTIGACIÓN: ATA O 14 DE XUÑO DE 2013.
Recorrede as nosas rúas cos vosos fillos e axudadelles a descubrir os pequenos tesouros que temos na vila. Estade atentos ás pistas que iremos dando sobre a localización dalgunha delas.