Formación

O 28 de novembro asistimos ao Congreso Internacional de Educación Inclusiva, unha xornada de reflexión e debate na que se puxeron de manifesto propostas orientadas á mellora da resposta educativa que, dende a visión da inclusión, permita adecuar e optimizar a práctica docente para satisfacer as necesidades educativas de todo o alumnado.

Para isto, resulta necesario identificar as barreiras que dificultan o proceso de ensino-aprendizaxe e aplicar as medidas precisas para afrontar cada situación.

Tal e como sinalou o conselleiro de Cultura, Educación, FP e Universidades, Román Rodríguez, dende o centro compartimos a idea de que a innovación e a inclusión son requisitos para asegurar que a educación avanza paralela ao ritmo social.

Coa firme crenza de que a educación sofre cambios e transformacións para adaptarse á nova sociedade do coñecemento consideramos imprescindible a formación permanente por parte do profesorado. Por iso, algunhas docentes do centro asistiron os pasados 10 e 11 de maio ao I Congreso de Innovación educativa e dixital. DixInnova 2022. Persoeiros coma Andreas Schleicher, director de Educación da OCDE, José Luís Mira (Secretario Xeral), Linda Liukas e outros profesionais nas distintas mesas redondas subliñaron a importancia de formar ás novas xeracións nas competencias e destrezas que esixe a sociedade máis dixitalizada, globalizada e competitiva na que vivimos. Ademais, tiveron a oportunidade de coñecer outros proxectos e participar en distintos obradoiros.