Traballo para o mércores 13 de maio
Ola!
Xa estamos a mércores de novo, e hoxe temos a visita de Cocorico, que ven presentarse. Aquí tedes a Xulia, seguro que vos encanta a súa recreación de portada.
Ensínovos tamén os vosos traballos dos corpos xeométricos para que os repasedes antes de facer as actividades de hoxe. Corpos xeométricos
Mates e lengua: hoxe imos construír o noso dado para xogar aos verbos, que non deixa de ser un cubo como o que construístes o outro día con pauiños. Primeiro tedes que imprimilo ou debuxalo vós (se o queredes debuxar neste vídeo tedes os pasos, ides necesitar un pouco de axuda).
Unha vez o teñades feito indicaredes o número de caras e de vértices que ten (podédelo repasar neste vídeo Caras, aristas y vértices). En cada unha das caras dese cubo tedes que debuxar unha persoa ou un animal facendo algo (por exemplo, un can ladrando, unha persoa correndo, un periquito cantando…). Finalmente recortádeo e pegádeo.
Xa soamente queda xogar. E como o imos facer? Pois con eles imos practicar os tempo verbais. Os verbos eran as palabras que expresaban acción e poden estar en:
- presente (agora mesmo ou hoxe): hoxe eu como, leo, paseo…
- pasado (algo que xa pasou antes, onte ou outro día): onte eu comín, lin, paseei...
- futuro (algo que aínda non pasou, que vai pasar): mañá eu comerei, lerei, pasearei...
Primeiro practicaremos o presente, despois o pasado e finalmente o futuro. Só temos que lanzar o dado cantas veces queiramos e ir facendo oracións:
-
Presente: HOY mi perro LADRA
-
Pasado. AYER mi amigo CORRIÓ.
-
Futuro: MAÑANA mi periquito CANTARÁ.
Antes de empezar vede este vídeo para comprender mellor os tempos verbais.
En lingua propóñovos aprender o que son as frases feitas. Sóanvos? As frases feitas son ditos ou expresións que non podemos interpretar ao pé da letra.
Por exemplo: Díxenlle que non fixeras os deberes, metín a pata!
“Metín a pata” sería unha frase feita porque ti non colles a túa perna para metela en ningún lado, verdade? Neste caso, queremos dicir que nos equivocamos. Por iso nas frases feitas non debemos entender o significado literal, se non que debemos interpretar o que quere dicir.
Mirade que abraiada queda esta rapaza ao coñecer algunhas frases feitas do galego (atentos porque explica o seu significado). Coñeciades e utilizabades algunha?
Pídovos que preguntedes na casa o que significan as seguintes frases feitas:
-
Levarse coma o can e o gato
-
Ser de bo dente
-
Ser pan comido
-
Beber a morro
-
Ser uña e carne
-
Estar nas verzas
-
Falar polos cóbados
-
Abrir os ollos
-
Coser e cantar
-
Ser coma un allo
Despois facede esta actividade para comprobar o que aprendestes:
Finalmente, escollede unha, a que máis vos guste, e facede un debuxo dela co seu significado literal.
Por exemplo: falar polos cóbados
Ciencias da Natureza: agora que xa sabemos o que son as máquinas, e que fixestes unhas reconstrucións chulísimas polo maio, imos construír a nosa propia máquina simple. Traballaremos co documento que vos deixo.
Aquí tedes todos os documentos, e en Snappet novas actividades.
Agardo que o pasedes ben con todo o traballo que tedes para hoxe e que aprendades moitas cousas novas.
Ata mañá!