Queridas familias;
Neste terceiro día, queremos informarvos de que os especialistas de Inglés e de Educación Física irán subindo, nas súas seccións do blogue, unhas recomendacións de actividades. A maiores, nós queremos facervos unha nova proposta:
1. REUNIÓN FAMILIAR OU MINIASEMBLEA.
Partindo da proposta de onte, queremos ensinarvos o debuxo que fixo Sabela, dos Millos:
Ademais, deixámosvos unha das cancións habituais na asamblea:
https://youtu.be/hlPQjJB9B_Y
2. TEMPO DE RESPONSABILIDADES.
Recordamos que este é un tempo para fomentar a súa autonomía, polo que as tarefas a realizar deben ser sinxelas e adecuadas para que as poidan facer con independencia, algúns exemplos a maiores poden ser: poñer os cubertos para colocar a mesa.
3. TEMPO DE TRABALLO EN CALMA.
Un tempo para a concentración, a atención e o traballo en silencio.
A proposta que vos facemos hoxe é a seguinte: Xa que temos varios días por diante nos que non deben acudir á rúa, podemos traer a rúa á casa. A idea é crear unha tenda na casa! Para isto, Só precisamos folletos que teñamos do super ou, se non tedes, podedes debuxar vós ou imprimirlles obxectos que poden colorear e recortar (tamén se pode facer con obxectos reais).
Ademais, poden crear as moedas e billetes e incluso poñerlle prezo aos alimentos (1€, 2€ e 3€). Tamén podedes aproveitar para que escriban os nomes dos alimentos. Lembrade que o importante é a conciencia fonolóxica. Vós podedes ir dicíndolle o son das letras e que eles e elas vaian escribindo. Nestas idades, importa máis a correspondencia son-grafía que a calidade de grafía. Tamén poden usar selos de letras de estampar ou ordenar letras de madeira ou magnéticas,... ou o que teñades pola casa.
Dispoñémolos nunha superficie, como unha caixa de cartón, levamos moedeiros/bolsos e a xogar! Un exemplo:
Extraído de:
http://aprendiendoconjulia.com/2016/11/imprimible-ninos-jugar-las-tiendas-supermercados/
4. XOGOS EN MOVEMENTO.
O movemento nestas idades é fundamental para a aprendizaxe.
A proposta de hoxe é unha actividade de movemento a realizar nun espazo no que poidan desplazarse: https://www.youtube.com/watch?v=8wuxQI3MOmM
E unha proposta para a volta á calma, na que con ela podemos recordar algúns dos animais do mar e as súas características: https://www.youtube.com/watch?v=LOYxOzMUgAY
5. TEMPO DE MERENDA.
Lembrade as indicacións sanitarias de tratar de manter unha alimentación saudable nestes días. Tamén pode ser un momento para asignar tarefas e responsabilidades aos máis pequenos: que sexan eles e elas quen laven a froita a consumir ou que sexan os que unten o queixo no pan,....
6. TEMPO DE CONTO.
A proposta de conto de hoxe é ´A mellor sopa do mundo´:
https://www.youtube.com/watch?v=qhaJBOWxURk
https://youtu.be/B3WSToSVhzo
Outra idea pode ser que eles e elas creen o seu propio conto!
7. TEMPO DE XOGO LIBRE.
Este pode ser un tempo para que xoguen sós ou vós con eles e elas. Recordade as posibilidades que poden ter unha caixa de cartón ou a roupa vella.
